រាជធានីភ្នំពេញ ៖ សាលាដំបូងរាជធានីភ្នំពេញកាលពីព្រឹកថ្ងៃទី៣០ មិថុនា ២០១៥ បានសម្រេចចេញដីកាឃុំខ្លួនឈ្មោះហាយ ស៊ីន ភេទប្រុស អាយុ៣៤ឆ្នាំ ជាមេឃុំជ្រោយស្វាយ ស្រុកស្រែអំបិល ខេត្តកោះកុង ពាក់ព័ន្ធករណីពុករលួយ ដាក់ពន្ធនាគារព្រៃសជាបណ្តោះអាសន្ន ។
ទាក់ទិននឹងការឃុំខ្លួនមេឃុំជ្រោយស្វាយនេះ ត្រូវបានប្រភពព័ត៌មានពីសាលាដំបូងរាជធានីភ្នំពេញឲ្យដឹងថា មុនពេលចាប់ខ្លួន មានលោកជំទាវម្នាក់បានទៅទិញដីនៅស្រុកស្រែអំបិល ខេត្តកោះកុង ក្នុងតម្លៃទឹកប្រាក់ជាង២០ម៉ឺនដុល្លារអាមេរិក ។ ពេលលោកជំទាវទិញដីពីក្រុមហ៊ុនមួយនោះបានហើយ ក៏បានធ្វើលិខិតស្នាមនៅនគរបាលប៉ុស្តិ៍ ហើយនគរបាលប៉ុស្តិ៍បានយកឯកសារនោះទៅរត់ការសុំចុះហត្តលេខាពីលោកមេឃុំ ប៉ុន្តែមេឃុំជ្រោយស្វាយមិនទាន់ស៊ីញ៉េទេ ដោយទាមទារចង់ជួបលោកជំទាវម្នាក់នោះសិន ។
នៅព្រឹកថ្ងៃទី២៨ មិថុនា ២០១៥ លោកជំទាវម្ចាស់ប្រាក់ដែលទិញដីក្រុមហ៊ុនបានណាត់ជួបលោកមេឃុំហាយ ស៊ីន នៅរាជធានីភ្នំពេញ គឺជួបនៅភោជនីដ្ឋានដារ៉ា ស្ថិតនៅសង្កាត់បឹងកក់៣ ខណ្ឌទួលគោក ។ ពេលលោកមេឃុំបានជួបលោកជំទាវ ពេលនោះលោកជំទាវបានប្រគល់ស្រោមសំបុត្រមួយឲ្យទៅមេឃុំ ក៏ត្រូវកម្លាំងអង្គភាពប្រឆាំងអំពើពុករលួយចាប់ខ្លួនតែម្តងទៅ ។ នៅពេលចាប់ខ្លួន ក្នុងស្រោមសំបុត្រនោះឆែកទៅឃើញមានប្រាក់ចំនួន៧.០០០ដុល្លារអាមេរិក ។
ប្រភពព័ត៌មានបន្តឲ្យដឹងទៀតថា ករណីខាងលើនេះគឺអាចចាត់ទុកថា ជាការរៀបចំគម្រោងជាមុនដើម្បីចាប់ខ្លួនមេឃុំជ្រោយស្វាយ ។
ប្រភពព័ត៌មានពីស្រុកស្រែអំបិលខេត្តកោះកុងបានឲ្យដឹងដែរថា អង្គភាពប្រឆាំងអំពើពុករលួយចាប់ខ្លួនមេឃុំ ហាយ ស៊ីន ពិតជាត្រឹមត្រូវហើយ ព្រោះកន្លងមកមេឃុំរូបនេះមានរឿងអាស្រូវច្រើនណាស់ពាក់ព័ន្ធនឹងឈ្មួញរកស៊ីទិញ-លក់ ស៊ីលុយគេដាច់ៗ ធ្វើឲ្យអ្នករកស៊ីក្តៅក្រហាយខ្លាំងណាស់ ៕
ចែករំលែកព័តមាននេះ