រាជធានីភ្នំពេញ ៖ នេះជាលើកទី១ហើយដែលវិនិយោគិនក្រៅប្រទេស បានចាប់អារម្មណ៍ និងប្រកាសលក់គម្រោងអចលនទ្រព្យនៅប្រទេសរបស់ខ្លួនដល់អ្នកវិនិយោគកម្ពុជា ។ អ្នកវិនិយោគក្រៅប្រទេសដែលមកប្រកាសលក់អចលនទ្រព្យនាពេលនេះ គឺមកពីប្រទេសម៉ាឡេស៊ី ហើយគម្រោងអចលនទ្រព្យដែលប្រកាសលក់នោះ ក៏ស្ថិតនៅប្រទេសម៉ាឡេស៊ីដែរ ។ នៅថ្ងៃទី២៧ និង២៨ មិថុនា ខាងមុខនេះ គម្រោងទីក្រុងដាម៉ាន់សារ៉ា របស់ក្រុមហ៊ុនអភិវឌ្ឍន៍ម៉ាឡេស៊ី នឹងចាប់ផ្ដើមលក់ជូនដល់អ្នកវិនិយោគកម្ពុជា នៅសាលទទួលបដិសណ្ឋារកិច្ច សណ្ឋាគាររ៉ាហ្វ៊ល ឡឺ រ៉ូយ៉ាល់ រាជធានីភ្នំពេញ ក្នុងនោះក្រុមហ៊ុនអចលនទ្រព្យ CBRE ជាភ្នាក់ងារប្រឹក្សាគម្រោងជាមួយនឹងក្រុមហ៊ុនបរទេសមួយនេះ ។
លោកKenny Wong Koon Keng នាយកគ្រប់គ្រងទូទៅប្រធានផ្នែកលក់និងទីផ្សារនៃក្រុមហ៊ុនហ្គូខូលេន បានមានប្រសាសន៍នៅក្នុងសន្និសីទសារព័ត៌មានមួយកាលពីពេលកន្លងទៅនេះថា ការសាងសង់ទីក្រុងដាម៉ាន់សារ៉ានេះ ជិតបញ្ចប់បានជាស្ថាពរហើយ ។ រីឯលំនៅឋាននឹងប្រគល់ឲ្យតាមគោលការណ៍សាងសង់ និងលក់។ ជាមួយនឹងការបញ្ចប់គម្រោងប្រកបដោយគុណភាពដែលបានផ្ដល់ឲ្យ បានបញ្ចូលនូវ សម្ភារដែលមានតម្លៃខ្ពស់ បំពាក់ដល់លំនៅឋាននីមួយៗ ការបង្កើតជាទីក្រុងមួយនៅក្នុងទីក្រុង និងច្រកចេញចូលជាច្រើនតាមរយៈមហាវិថីនានា ស្ថានីយ ផ្លូវឆ្លងកាត់ដ៏មមាញឹកជាច្រើនដែលនឹងត្រូវសាងសង់ជាប់ទីក្រុងដាម៉ាន់សារ៉ា ។
លោកបន្តថា កម្ពុជាគឺជាប្រទេសទី២ ដែលគម្រោងមួយនេះបានប្រកាសលក់បន្ទាប់ពីប្រទេសសិង្ហបុរី ។ យើងសង្ឃឹមថា ការប្រកាសលក់គម្រោងនាពេលនេះ នឹងទទួលបានការគាំទ្រពីអ្នកវិនិយោគកម្ពុជា រួមទាំងអ្នកមានជីវភាពធូរធារ ហើយចង់បញ្ជូនកូនៗទៅសិក្សានៅប្រទេសម៉ាឡេស៊ី ដូចនេះកូនៗរបស់ពួកគាត់មានកន្លែងស្នាក់នៅស្រាប់ដោយមិនបាច់ភ័យព្រួយ ហើយជាកន្លែងដែលល្អ និងមានសក្ដានុពល។ ម្យ៉ាងទៀតនៅពេលឪពុកម្ដាយចង់ទៅលេងកូនៗដែលសិក្សានៅទីនោះ ក៏មានកន្លែងស្រាប់ សម្រាប់ស្នាក់នៅដែរ ។
កញ្ញា អាន់ សុធីតា នាយកប្រតិបត្តិជាន់ខ្ពស់នៃក្រុមហ៊ុនCBRE បានឲ្យដឹងថា យើងកំពុងមើលឃើញនិន្នាការរីកចម្រើននៃការវិនិយោគទូទាំងប្រទេសជាមួយតំបន់អាស៊ាននិងតំបន់នេះកំពុងពង្រឹងកម្លាំងរបស់ខ្លួនកាន់តែខ្លាំង ។ ប្រទេសកម្ពុជាដែលកំពុងសម្លឹងរកការវិនិយោគ និងយល់ឃើញថា តម្លៃអចលនទ្រព្យនៅទីក្រុងដាម៉ាន់សារ៉ា មានភាពសមរម្យ ចំណែកឯគម្រោងសាងសង់ត្រូវបានបង្កើតឡើងប្រកបដោយគុណភាពពិសេសដែលធ្វើឡើងដោយអ្នកម៉ៅការសាងសង់សំខាន់ៗរបស់ក្រុមហ៊ុនហ្គូខូលេន (GoucoLand ) គឺក្រុមហ៊ុនសាងយ៉ុង (Ssangyoung) របស់ប្រទេសកូរ៉េខាងត្បូង ។
គួរបញ្ជាក់ថា គម្រោងទីក្រុងដាម៉ាន់សារ៉ា មកដល់ពេលនេះ លក់បានប្រមាណ៥០%ហើយ ។ គម្រោងនេះបើតាមការបញ្ជាក់ពីក្រុមហ៊ុនចំណាយអស់ទឹកប្រាក់វិនិយោគ៧០០លានដុល្លារ ដែលជាទឹកប្រាក់វិនិយោគសុទ្ធពីក្រុមហ៊ុនGoucoLand របស់ប្រទេសម៉ាឡេស៊ី ៕
ចែករំលែកព័តមាននេះ