ខេត្តរតនគិរី ៖ ជនជាតិចារ៉ាយមួយគ្រួសារមានទីលំនៅភូមិជ្រុង ឃុំកក់ ស្រុកបរកែវ ត្រូវអ្នកភូមិចោទថា ចេះអាបធ្មប់ និងមានប្រទាលស៊ីមនុស្សបានគំរាមកំហែងសម្លាប់ទាំងពូជនោះ ដោយពួកគេបាននាំគ្នារត់ចេញពីភូមិមកសុំស្នាក់នៅក្នុងអធិការដ្ឋានស្រុក
បើតាមលោករចំ គីន អាយុ៤៨ឆ្នាំ ជនជាតិចារ៉ាយ និងប្រពន្ធឈ្មោះរម៉ាម ភ្សិ អាយុ៣៥ឆ្នាំ ជនជាតិចារ៉ាយ ប្រាប់ឱ្យដឹងថា ក្រុមគ្រួសារពួកគាត់មានសមាជិក១១នាក់ ហើយកន្លងមក ត្រូវអ្នកក្នុងភូមិចោទថា ចេះធ្មប់ ចេះអាប និងមានប្រទាលស៊ីមនុស្ស ត្រូវបានគេគំរាមសម្លាប់ជាញឹកញាប់ ដោយមានការភ័យខ្លាចនោះ ក្រុមគ្រួសារគាត់បានផ្លាស់ទីលំនៅចំនួន២ដងមកហើយ ដោយលើកទី១-ផ្លាស់ទៅនៅឃុំតាកុកច្រាយ ស្រុកអូរយ៉ាដាវ និងទី២-ឃុំបរខាំ ស្រុកបរកែវ លុះត្រឡប់ចូលស្រុកកំណើតវិញ ក៏ត្រូវអ្នកភូមិគំរាមទៀត ទើបនាំគ្នាមកស្នាក់នៅអធិការដ្ឋាន ស្រុកបរកែវតែម្តង។
លោកម៉ៅ សាន់ អធិការស្រុកបរកែវប្រាប់ឱ្យដឹងថា ដោយមានការប្រជុំថ្នាក់ដឹកនាំខេត្ត និងថ្នាក់ដឹកនាំស្រុកបរកែវនោះ បានអនុញ្ញាតឱ្យក្រុមគ្រួសារខាងលើនេះ មកស្នាក់នៅក្នុងអធិការដ្ឋានស្រុកបរកែវមួយរយៈសិន ដើម្បីធានាសវុត្ថិភាពជូនពួកគាត់ ។
កោះសន្តិភាពបានធ្វើបទសម្ភាសន៍ជាមួយគ្រួសារខាងលើហើយ ពួកគាត់មានការសប្បាយចិត្តយ៉ាងខ្លាំង សមត្ថកិច្ចនិងថ្នាក់ដឹកនាំខេត្តបានកំពុងកាពារជូនក្រុមគ្រួសារគាត់យ៉ាងល្អ និងសុំថ្លែងអំណរគុណតាមរយៈកោះសន្តិភាពដែរ ។
ចែករំលែកព័តមាននេះ