រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី២៦ ឧសភា បានជួបសំណេះសំណាលជាមួយយុវជនពិការចំនួន៦រូបដែលទទួលបានជ័យលាភីពីកម្មវិធីប្រកួតជាសាកលផ្នែកបច្ចេកវិទ្យាព័ត៌មានពិការភាពនៅទីក្រុងប៊ូសាន
រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី២៦ ឧសភា បានជួបសំណេះសំណាលជាមួយយុវជនពិការចំនួន៦រូបដែលទទួលបានជ័យលាភីពីកម្មវិធីប្រកួតជាសាកលផ្នែកបច្ចេកវិទ្យាព័ត៌មានពិការភាពនៅទីក្រុងប៊ូសាន នៃសាធារណរដ្ឋកូរ៉េកន្លងទៅ នៅវិមានសន្តិភាព ។
លោក អ៊ាង សុផល្លែត ជំនួយការសម្តេចអគ្គមហាសេនាបតីតេជោ ហ៊ុន សែន បានប្រាប់ឱ្យដឹងថា នៅក្នុងកម្មវិធីប្រកួតជាសាកលផ្នែកបច្ចេកវិទ្យាព័ត៌មានពិការភាពនោះមានវិញ្ញាសា៤ គឺ ១-e DESIGN ២-e CREATIVE ៣-e LIFEMAP និង ៤-e TOOL ដែលមានបេក្ខជនសរុបទាំងអស់២៧០នាក់ចូលរួម ។ ដោយឡែកកម្ពុជា ដែលមានបេក្ខភាពចូលរួម៦រូបនោះសុទ្ធសឹងតែបានទទួលមេដាយមាសទាំងអស់គ្នា ថែមទាំងបានទទួលមេដាយជើងឯកមាសទៀតផង ។
បេក្ខជនទាំង៦រូបនេះមាន ១-យុវជន កែវ ចាន់ឧត្តម បានទទួលមេដាយជើងឯកមាស១ មេដាយមាស១ និងមេដាយប្រាក់២, ២-យុវជន ហែម វិច្ឆិកាណុន បានទទួលមេដាយមាស១ មេដាយប្រាក់១ មេដាយសំរឹទ្ធិ១, ៣-យុវជន ធី ផូណា បានទទួលមេដាយមាស១ មេដាយប្រាក់១, ៤-យុវជន ញ៉ុត សុភឿន បានទទួលមេដាយមាស១ មេដាយប្រាក់១, ៥-យុវជន ញ៉ាញ់ ផានិត បានទទួលមេដាយមាស១ ប្រាក់១ និង៦-យុវជន ទិន សុធា បានទទួលមេដាយមាស១ មេដាយប្រាក់១ ។
សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍ថា នេះជាមោទនភាពណាស់ចំពោះកម្ពុជាយើងដែលមានបេក្ខជនចូលរួម៦រូបហើយទទួលបានមេដាយ៦ និងមេដាយជើងឯកមាសទៀតផង ។ ជ័យលាភីទាំង៦នេះ ថ្វីដ្បិតកាយសម្បទាពិការមែន តែមិនពិការចិត្តទេ គឺមានភាពឈ្លាសវៃ ។ កម្ពុជាមានភាពឈ្លាសវៃ និងមានស្នាដៃជាប្រវត្តិសាស្ត្រកន្លងមក។ ចំពោះជ័យលាភីទាំង៦រូបនេះ សម្តេចអគ្គមហាសេនាបតីតេជោ ហ៊ុន សែន មានប្រសាសន៍ថា រាជរដ្ឋាភិបាលជាគោលការណ៍ផ្តល់នូវក្របខ័ណ្ឌជូនដល់ជ័យលាភីទាំង៦រូបនេះ នៅក្នុងក្រសួងសង្គមកិច្ច អតីតយុទ្ធជន និងយុវនីតិសម្បទា ។ ទន្ទឹមនឹងនេះ សម្តេចតេជោនាយករដ្ឋមន្ត្រីបានប្រគល់រង្វាន់លើកទឹកចិត្តជាប្រាក់ចំនួន៣ពាន់ដុល្លារអាមេរិកក្នុងម្នាក់សម្រាប់ជ័យលាភី និងជូនគ្រូ៣នាក់ ក្នុងម្នាក់ៗ១ពាន់ដុល្លារអាមេរិក ជាថវិកាផ្ទាល់របស់សម្តេចតេជោ និងសម្តេចកិត្តិព្រឹទ្ធបណ្ឌិត ។
សូមបញ្ជាក់ថា កម្មវិធីប្រកួតនេះ គឺមានការរៀបចំដោយ UNESCAP និងរដ្ឋាភិបាលសាធារណរដ្ឋកូរ៉េ ដោយមានកិច្ចសហប្រតិបត្តិការជាមួយអង្គការលទ្ធភាពពលកម្មរបស់កូរ៉េ (KSRPD) ៕
ខាងក្រោមនេះជាវិដេអូឃ្លីបរបស់យុវជន ញ៉ុត សុភឿន ម្ចាស់ជ័យលាភីម្នាក់ក្នុងចំណោម៦នាក់របស់កម្ពុជា ពីកម្មវិធីប្រកួតជាសាកលផ្នែកបច្ចេកវិទ្យាព័ត៌មានពិការភាពនៅទីក្រុងប៊ូសាន នៃសាធារណរដ្ឋកូរ៉េ ។ តើយុវជនញ៉ុត សុភឿន មានបំណងប្រាថ្នាយ៉ាងណាដែរ?
ចែករំលែកព័តមាននេះ