ខេត្តព្រះសីហនុ ៖ កាលពីវេលាព្រឹកថ្ងៃទី២៥ ឧសភា ២០១៥ ប្រជាពលរដ្ឋចំនួន ១១៨ គ្រួសារ ដែលមានលំនៅដ្ឋានស្ថិតនៅ
តំបន់តាលៈសែនជ័យ ភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុបានមកជួបជុំប្រមូលផ្តុំគ្នានៅខាងមុខសាលាខេត្តព្រះសីហនុ ។
តំណាងប្រជាពលរដ្ឋដែលមានចំនួនខាងលើ បានអោយដឹងថា ការប្រមូលផ្តុំជួបជុំគ្នានាពេលនេះ ក្នុងគោលបំណងស្វែងរកការអន្តរាគមន៍ពីអាជ្ញាធរខេត្តព្រះសីហនុ និង ដើម្បីបានដាក់ពាក្យប្តឹងជំទាស់ទៅនឹងចំណាររបស់លោក ទិត្យ វុទ្ធី អភិបាលស្រុកព្រៃនប់ ដែលបានចុះហត្ថលេខាអោយក្រុមហ៊ុន ជៀក គឹមឡុង បានធ្វើប័ណ្ណកម្មសិទ្ធិនៅលើដីរបស់ប្រជាពលរដ្ឋ ដែលកំពុងតែរស់នៅសព្វថ្ងៃ។
នៅក្នុងខ្លឹមសារបណ្តឹងរបស់ប្រជាពលរដ្ឋបានបញ្ជាក់អោយដឹងថា ពួកគាត់ទាំង ១១៨ គ្រួសារ បានរស់នៅលើដីនេះ ចាប់តាំងពីឆ្នាំ ១៩៩៣ មកម្ល៉េះ និង បានប្រកបរបរដាំដំណាំ ទទួលបានអាស្រ័យផលកើតជាកូន ពូនជាចៅ ជាច្រើនឆ្នាំមកហើយ មិនដែលមានបញ្ហាជាមួយក្រុមហ៊ុនណាមួយឡើយ។ ទើបតែនៅពេលដើមខែមករា ឆ្នាំ ២០១៥ កន្លងមកនេះ ស្រាប់តែមានក្រុមហ៊ុន ជៀក គឹមឡុង រួមជាមួយមន្ត្រីជំនាញការិយាល័យរៀបចំដែនដី នគរូបនីយកម្ម និង សំណង់ ស្រុកប្រៃនប់ គ្រោងនឹងចុះមកវាស់វេងដីធ្លីដែលពួកគាត់កំពុងតែរស់នៅ និង ផ្តល់កម្មសិទ្ធិស្របច្បាប់ទៅអោយក្រុមហ៊ុនខាងលើនោះ ។
យោងតាមពាក្យបណ្តឹងតវ៉ារបស់តំណាងប្រជាពលរដ្ឋ ចុះថ្ងៃទី ២៥ ខែ ឧសភា ឆ្នាំ ២០១៥ ដែលមានឈ្មោះ សុខ ចាន់ដារ៉ា , ឡេង វាសនា , ហែម ឡាញ់ , សួន ស្រី , ជិន សារ៉ាត ដែលជាតំណាងប្រជាពលរដ្ឋទាំង ១១៨ គ្រួសារ នៅតំបន់ភូមិ ឃុំ ស្រុកខាងលើ បានអោយដឹងថា បន្ទាប់ពីមានការប្រមូលផ្តុំគ្នានិងបានដាក់ពាក្យបណ្តឹងទៅអាជ្ញាធរខេត្តព្រះសីហនុ សុំការជួយអន្តរាគមន៍រួចមក លោក ស៊ុន ស្រ៊ន់ អភិបាលរងខេត្តព្រះសីហនុ បានទទួលពាក្យបណ្តឹងរបស់ប្រជាពលរដ្ឋ និង សន្យាថា ចុះទៅរកដំណោះស្រាយរវាងក្រុមហ៊ុនខាងលើជាមួយប្រជាពលរដ្ឋអោយបានសមរម្យ។
បន្ទាប់មកទៀតប្រជាពលរដ្ឋក៏បានធ្វើដំណើរមកប្រមូលផ្តុំគ្នានៅខាងមុខសាលាដំបូងខេត្តព្រះសីហនុ ដើម្បីដាក់ពាក្យបណ្តឹងតវ៉ាមួយច្បាប់ទៀតជូនលោកប្រធានសាលាដំបូងខេត្តព្រះសីហនុ ។ នៅក្នុងខ្លឹមសារបណ្តឹងតវ៉ា បានបញ្ជាក់ថា ពួកគាត់សុំធ្វើការបដិសេធតវ៉ាជាមួយ សាលក្រមលេខ ០២(ខ) ចុះថ្ងៃទី ៣០ ខែ មករា ឆ្នាំ ២០១៥ ដែលចុះហត្ថលេខា ដោយលោក គឹម អេង ចៅក្រមសាលាដំបូងខេត្តព្រះសីហនុ និង ជាអនុប្រធាន និង ជាអនុប្រធានសាលាដំបូង ដែលបានសំរេចបង្គាប់អោយ ដែលបានសំរេចបង្គាប់អោយមន្ទីររៀបចំដែនដីនគរូបនីយកម្ម និង សំណង់ខេត្តព្រះសីហនុ ចុះធ្វើការវាស់វែងដី ចំនួន ១៦ ប័ណ្ណ ដែលមានទំហំដីសរុបចំនួន ៨១,៥៩ A ស្ថិតនៅតំបន់តាលៈ ភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ អោយទៅក្រុមហ៊ុន ជៀក & អ៊ីនវេសម៉ិន ជាកម្មសិទ្ធិរបស់ក្រុមហ៊ុន ជៀក គឹមឡុង ជាតំណាង។
នៅក្នុងខ្លឹមសារបណ្តឹង បានបញ្ជាក់ថា សាលក្រមនេះ ខ្ញុំបាទ នាងខ្ញុំ ទាំងអស់គ្នាជាប្រជាពលរដ្ឋដែលរស់នៅក្នុងតំបន់ភូមិ ឃុំ ស្រុកខាងលើ យល់ឃើញថា មានភាពអយុត្តិធម៌ ណាស់ ដោយក្នុងសវនាការនេះ ធ្វើឡើងដោយគ្មានវត្តមានរបស់ប្រជាពលរដ្ឋ ដែលបានកាន់កាប់អាស្រ័យផលនៅលើផ្ទៃដីនេះ ជាយូរណាស់មកហើយ បានចូលរួមពោលគឺជាការឃុបឃិតគ្នា ក្នុងសវនាការទាំងមូល ដែលជាអំពើអយុត្តិធម៌មួយ ដែលប្រជាពលរដ្ឋទាំង១១៨គ្រួសារខាងលើ មិនអាចទទួលយកបានឡើយ។
ប្រជាពលរដ្ឋទាំង ១១៨ គ្រួសារ សំណូមពរដល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធិបណ្ឌិត មេត្តាជួយអន្តរាគមន៍ បានផ្តល់ភាពយុត្តិធម៌ដល់ប្រជាពលរដ្ឋក្រីក្រផង ស្របតាមពាក្យស្លោកពោលថា ទីណាជួបទុក្ខលំបាកទីនោះមានសម្តេចអគ្គមហាសេនាបតី និង លោកជំទាវកិត្តិព្រឹទ្ធិបណ្ឌិត ។
ចែករំលែកព័តមាននេះ