រាជធានីភ្នំពេញ ៖ ដឹកកូនជាអាណិកជនមកពីលេងជីតា ដោយបានឈប់រថយន្តនៅមុខផ្ទះគេ ដើម្បីទៅចូលទិញសាច់កាប់មួយភ្លែត ខណៈនោះកូនជាអាណិកជនអត់ស្រួលខ្លួនបានក្អួតចង្អោរនៅទីនោះ ហើយរថយន្តមួយគ្រឿងទៀតចង់បើកចូលផ្ទះ ធ្វើឱ្យរថយន្តនោះចុចស៊ីផ្លេច្រើនដងផ្អើលគេឯង បណ្តាលឱ្យអាណិកជននោះខឹងផ្ទុះជម្លោះ ក៏យកសំបកដបទឹកសុទ្ធគប់រថយន្តនោះ តែអត់ដល់ទេ ក៏ចុះទៅគោះក្បាលរថយន្ត និងរកវាយអ្នកជិះក្នុងរថយន្តនោះទៀត បង្កឱ្យមានការឈ្លោះប្រកែកគ្នាជិត៣ម៉ោង ផងដែរ ។
ហេតុការណ៍ខាងលើនេះ កើតឡើងកាលពីវេលាម៉ោង០៦ និង៣០នាទីយប់ថ្ងៃទី២៤ ឧសភា ស្ថិតនៅតាមផ្លូវលេខ៣១០ កែងព្រះមុនីវង្ស មុខផ្ទះសំណាក់លីឡាង ក្នុងសង្កាត់បឹងកេងកង៣ ខណ្ឌចំការមន ។
ប្រភពពីឪពុកបុរសអាណិជកជនបានឱ្យដឹងថា មុនពេលកើតហេតុ គាត់ជាឪពុកដឹកកូនប្រុសម្នាក់ទើបមកពីបរទេសមកលេងស្រុកខ្មែរ ដោយបានដឹកដើរលេងជាមួយក្រុមគ្រួសារមានគ្នាចំនួន៥នាក់ជិះរថយន្តកូរ៉ូឡា ពណ៌ទឹកប៊ិច ពាក់ស្លាកលេខភ្នំពេញ 2O-0922 ត្រឡប់មកពីដើរលេងវិញ ។ កូនប្រុសជាអណិកជនចង់ហូបសាច់ផាក់ឡូវ គាត់បានបើករថយន្តឡើងចិញ្ចើមផ្លូវឈប់នៅមុខផ្ទះគេទិញសាច់ផាក់ឡូវ ហើយកូនប្រុស(អាណិកជន) គាត់អត់ស្រួលខ្លួន មានអាការចង់ក្អួតចង្អោរ បានចុះពីលើរថយន្តឈរក្អួត ស្រាប់តែមានរថយន្តម៉ាស្តា ពណ៌ស ពាក់ស្លាកលេខភ្នំពេញ 2AI 5858 មួយគ្រឿង ជិះ២នាក់ប្តី-ប្រពន្ធ បើកមកចូលផ្ទះរបស់គេនៅកន្លែងកើតហេតុ តែចូលអត់រួចដោយសារទើសនឹងរថយន្តកូរ៉ូឡា ទើបម្ចាស់រថយន្តម៉ាស្តា បានចុចស៊ីផ្លេច្រើនដងពេក ធ្វើឲ្យកូនប្រុសដែលជាអណិកជនខឹង បានយកដបទឹកបរិសុទ្ធនៅកាន់ដៃគប់ទៅលើរថយន្តម៉ាស្តា តែគប់អត់ដល់ទេ ក៏ដើរទៅគោះក្បាលរថយន្តធ្វើឱ្យក្រពិតបន្តិចបន្តួច ហើយពេលដែលស្ត្រីជាប្រពន្ធរបស់រថយន្តម៉ាស្តាចុះពីលើរថយន្ត ក៏ត្រូវកូនប្រុស (អាណិកជន) បម្រុងវាយទៀត តែត្រូវសាច់ញាតិឃាត់ទាន់ ។
ហេតុការណ៍ខាងលើនេះ បង្កឱ្យមានការឈ្លោះប្រកែកគ្នាទៅវិញទៅមកយកត្រូវរៀងខ្លួន អស់រយៈពេលជិត៣ម៉ោង ហើយត្រូវខាងរថយន្តម៉ាស្តាទាមទារសំណងចំនួន៣០០០ដុល្លារ តែត្រូវខាងក្រុមអាណិកជនយល់ព្រមសង២៥០០ដុល្លារបញ្ចប់រឿង តែមុននឹងចប់ខាង រថយន្តម៉ាស្តា សុំឱ្យខាងអាណិកជនសុំទោស និងធ្វើកិច្ចសន្យា ទើបព្រមទទួលប្រាក់២៥០០ដុល្លារ ៕
ចែករំលែកព័តមាននេះ