ខេត្តបន្ទាយមានជ័យ ៖ ក្មេងប្រុសម្នាក់ធ្លាក់ពីលើគោយន្តត្រូវគោយន្តកិនចំពាក់កណ្តាលខ្លួនរបួសធ្ងន់ ហើយបានស្លាប់ ខណៈពេលដឹកទៅសង្គ្រោះនៅមណ្ឌលសុខភាពឃុំគោករមៀត ។ ហេតុកាណ៍នេះបានកើតឡើងកាលពីវេលាម៉ោង៨និង៣០នាទីយប់ ថ្ងៃទី២១ ឧសភា ២០១៥ នៅភូមិថ្នល់បំបែក ឃុំគោករមៀត ស្រុកថ្មពួក ។
លោកអនុសេនីយ៍ឯកដាំ សំអៀត នាយប៉ុស្តិ៍រដ្ឋបាលគោករមៀត បានឲ្យដឹងថា ក្មេងប្រុសរងគ្រោះឈ្មោះ ជុក ខេន អាយុ១៤ឆ្នាំ នៅភូមិ៥មិនា ឃុំគោករមៀត ស្រុកថ្មពួក ចំណែកអ្នកបើកបរគោយន្តឈ្មោះ ផាត់ ប៉ោក ភេទប្រុស អាយុ៣៤ឆ្នាំ នៅភូមិជាមួយរងគ្រោះដែរ។
តាមការរៀបរាប់បំភ្លឺពីឈ្មោះផាត់ ប៉ោក ជាម្ចាស់គោយន្តបានឲ្យដឹងថា រូបគេបានបើកគោយន្តដឹកដំឡូងមីពីភូមិក្តិបថ្មយកទៅលក់ នៅភូមិបន្ទាយមានរិទ្ធ(បឹងត្រកួន) ស្រាប់តែពេលនោះជនរងគ្រោះបានរត់តាមឡើងជិះគោយន្តមកជាមួយខ្លួន ពេលបើកមកដល់មុខផ្ទះរបស់ឈ្មោះ ប៊ូ ភេទប្រុស នៅភូមិថ្នល់បំបែក ស្រាប់តែឈ្មោះជុក ខេន បានធ្លាក់ពីលើគោយន្តបណ្តាលឲ្យកង់គោយន្តខាងក្រោយកិនពីលើចំពាក់ កណ្តាលខ្លួនរងរបួសធ្ងន់ ហើយបានស្លាប់ខណៈពេលដឹកដល់មណ្ឌលសុខភាពឃុំគោករមៀត ។
លោកនាយប៉ុស្តិ៍បានបញ្ជាក់ថា តាមការសន្និដ្ឋានក្មេងរងគ្រោះពេលកំពុងជិះគោយន្តដេកលក់ ទើបបណ្តាលឲ្យធ្លាក់ ក៏ត្រូវកង់គោយន្តកិនពីលើតែម្តង ។ ចំពោះសាកសពកុមារារងគ្រោះត្រូវបានប្រគល់ជូនក្រុមគ្រួសារយកទៅចាត់ចែងធ្វើបុណ្យតាមប្រពៃណី រីឯអ្នកបើកបរ និងគោយន្តត្រូវបានឃាត់ទុកនៅប៉ុស្តិ៍រដ្ឋបាល ដើម្បីរៀបសំណុំរឿងបញ្ជូនទៅអធិការដ្ឋាននគរបាលស្រុកថ្មពួកចាត់ការបន្ត៕
ចែករំលែកព័តមាននេះ