រាជធានីភ្នំពេញ ៖ បុរសវ័យចំណាស់មួយក្រុមមានគ្នា៥នាក់ ជិះរថយន្ត២គ្រឿង បាននាំគ្នាចូលទៅផឹកស៊ី និងច្រៀងខារ៉ាអូខេ នៅក្នុងហាង មីលីណែ ស្ថិតតាមផ្លូវជាតិលេខ៦អា តាំងពីម៉ោង៣និង៣០នាទីរសៀល រហូតដល់ម៉ោង៨និង៣០នាទីយប់ ទើបអោយគិតលុយ ។ លុះគិតលុយលើសចំនួន១២ដុល្លារ ប៉ុណ្ណោះធ្វើអោយក្រុមបុរសវ័យចំណាស់ទាំងនោះ កើតទុកមិនសុខចិត្ត ស្រែកឡាំប៉ា ផ្អើលអស់កម្លាំងប៉េអ៊ឹម ប៉ូលីស និងប្រជាជន នៅក្បែរនោះចោមរោមមើល ដែលហេតុការណ៍នេះបានកើតឡើងកាលពីវេលាម៉ោង៩យប់ថ្ងៃទី២០ ខែឧសភា ឆ្នាំ២០១៥ នៅហាង មីលីណែ ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ ។
បើតាមមេការខារ៉ាអូខេបានអោយដឹងថា ក្រុមបុរសវ័យចំណាស់ បានចូលមកផឹកស៊ី និងច្រៀងលេងក្នុងហាងខារ៉ាអូខេ តាំងពីរសៀលមកម្លេះ លុះពេលផឹកស៊ីរហូតដល់យប់ ស្រវឹងស្រឿងៗ ក៏គិតលុយចេញ តែខាងអ្នកគិតលុយ វាយលេខបន្ទប់ច្រឡំ ទើបបណ្តាលអោយលើសថ្លៃទឹកសុទ្ធ២ដប គឺលើសតែ១២ដុល្លារ ប៉ុណ្ណោះ ដែលថ្លៃសរុបគឺ២៤៩ដុល្លារ ។ ក្រោយពីខាងមេការយកវិកាយប័ត្រ មកជូនក្រុមភ្ញៀវទាំងនោះ ហើយភ្ញៀវបានធ្វើការគិតខ្លួនឯងម្តងទៀត ពេលគិតហើយ ឃើញលើសថ្លៃចំណាយ ១២ដុល្លារ ដោយមានបញ្ចូលទឹកសុទ្ធចំនួន២ដប ធ្វើអោយភ្ញៀវទាំងនោះ ឆោឡោ កើតទុកមិនសុខចិត្តទេ និងបាននិយាយថា មិនព្រមបង់លុយអោយទេ ទាល់តែហៅថៅកែមកជួប សួរនាំអោយដឹងខុសត្រូវ ទើបបង់លុយអោយ ។ ទោះបី ខាងមេការ និងអ្នកបំរើក្នុងហាងធ្វើការសំទោស ហើយចេញវិកាយប័ត្រថ្មី អោយយ៉ាងណាក៏ដោយក៏មិនព្រម ទើបបណ្តោយអោយមានការភ្ញាក់ផ្អើលដល់កម្លាំងកងរាជអាវុធហត្ថខណ្ឌ និងប៉ូលីសប៉ុស្តិ៍ជ្រោយចង្វារ មកអន្តរាគមន៍ តែយ៉ាងណាក៏មិនស្តាប់ដែរ ។
លុះប្រកែកគ្នាអស់ចិត្ត ប្រហែលជាជិត២ម៉ោង រាងស្វាងបន្តិច ទើបក្រុមភ្ញៀវទាំងនោះ ធ្វើការទូទាត់លុយអោយ ហើយបាននិយាយថា ការបង់លុយអោយនេះ មិនមែនខ្លួនទទួលកំហុសទេ គឺខ្លួនមិនចង់អោយរឿងវែងឆ្ងាយជាងនេះ ។
បើតាមអ្នករត់ម៉ូតូឌុបដែលបានឈរមើលហេតុការនេះបាននិយាយថា គ្រាន់តែលុយ១២ដុល្លាសោះ ធ្វើអោយខ្មាស់គេដែរ បើអោយលុយធីបនារីៗ ក្នុងហាងអស់រាប់រយមិចមិនថាផង ។ ឯអ្នកខ្លះទៀតបានលើកឡើងថា មើលទៅរូបរាងក៏ដឹងដែរថា ជាអ្នកធ្វើការធំ មានមុខមានមាត់ ស្គាល់សុទ្ធតែអ្នកធំ គ្រាន់តែលុយ១២ដុល្លារ ចាំបាច់ឡាំប៉ាធ្វើអ្វី ចាត់ទុកថា ជ្រុះបាត់ទៅ ហើយម្យ៉ាងទៀត ខាងមេការបានសូមទោសហើយតើ មុននិងក្រោយគង់តែអោយគេដដែល ចាំបាច់អូសបន្លាយអី ដល់ថ្នាក់ជិត២ម៉ោង នេះប្រហែលជាកាលពីដំបូង មិនទាន់អស់ជាតិស្រវឹង លុះក្រោយមករាងស្វាង ទើបដឹងថា ខ្មាស់គេហើយមើលទៅ ។
ក្រោយពេលគិតលុយអោយទៅខាងម្ចាស់ហាងខារ៉ាអូខេហើយ ក្រុមភ្ញៀវទាំងនេះបានជិះរថយន្តត្រឡប់ទៅគេហដ្ឋានរៀងៗខ្លួន ចំណែកឯខាងកម្លាំងមានសមត្ថកិច្ច និងកងរាជអាវុធហត្ថ មិនបានធ្វើកំណត់ហេតុ និងនាំខ្លួនទៅធ្វើការសាកសួរទេ ព្រោះនេះគ្រាន់តែជាករណីស្រវឹងបន្តិចបន្តួចប៉ុណ្ណោះ ៕
ចែករំលែកព័តមាននេះ