ខេត្តកណ្តាល ៖ មន្ត្រីស៊ីម៉ាក់ សហការជាមួយសមត្ថកិច្ចស្រុកល្វាឯម ខេត្តកណ្តាល ចុះទៅយកគ្រាប់ដែលមិនទាន់ផ្ទុះ កាលពីវេលា០៩ និង៣០នាទីព្រឹកថ្ងៃទី២១ ឧសភា ២០១៥ នេះ ស្ថិតនៅក្នុងទឹកទន្លេមេគង្គ ក្នុងភូមិល្វាសលើ ឃុំល្វាស ស្រុកល្វាឯមខេត្តកណ្តាល ។
ខេត្តកណ្តាល ៖ មន្ត្រីស៊ីម៉ាក់ សហការជាមួយសមត្ថកិច្ចស្រុកល្វាឯម ខេត្តកណ្តាល ចុះទៅយកគ្រាប់ដែលមិនទាន់ផ្ទុះ កាលពីវេលា០៩ និង៣០នាទីព្រឹកថ្ងៃទី២១ ឧសភា ២០១៥ នេះ ស្ថិតនៅក្នុងទឹកទន្លេមេគង្គ ក្នុងភូមិល្វាសលើ ឃុំល្វាស ស្រុកល្វាឯមខេត្តកណ្តាល ។
បើតាមលោកវរសេនីយ៍ទោ ជា ថុល អធិការស្រុកល្វាឯមបានឱ្យដឹងថា គ្រាប់ដែលមិនទាន់ផ្ទុះនោះ ជាប្រភេទគ្រាប់ KM៨២ មានទម្ងន់២០០គីឡូក្រាម ដែលសល់ពីសម័យសង្ក្រាម ។
លោកបន្តថា មុននឹងប្រទះឃើញគ្រាប់ខាងលើនោះ គឺដោយសារប្រជាពលរដ្ឋម្នាក់ជាប្រជានេសាទបានជិះទូកនេសាទត្រី ក្នុងទន្លេ ហើយអូសសំណាញ់ទាក់ជាមួយគ្រាប់ ក៏មានការសង្ស័យបានព្យាយាមលើកសំណាញ់អួនឡើង ប៉ុន្តែលើកមិនរួច ដូច្នេះក៏រកវិធីចុះរាវមើល ស្រាប់តែភ្ញាក់ផ្អើលថា អ្វីដែលទាក់សំណាញ់របស់គាត់នោះ គឺជាគ្រាប់បែក ។ ភ្លាមៗនោះ ប្រជានេសាទបានទាក់ទងនឹងរាយការណ៍ជូនអាជ្ញាធរមូលដ្ឋានមានសមត្ថកិច្ច ដើម្បីចុះមកពិនិត្យ ។
លោកអធិការបន្តទៀតថា ក្រោយទទួលបានដំណឹងនេះ លោកបានចុះដឹកនាំកម្លាំងថ្នាក់មូលដ្ឋានចុះទៅពិនិត្យ និងការពារតំបន់នោះ ដើម្បីរក្សាសុវត្ថិភាពបងប្អូនប្រជាពលរដ្ឋដែលចុះទៅនេសាទ ។ ក្រោយមក រូបលោកបានទំនាក់ទំនងខាងមន្ត្រីស៊ីម៉ាក់ ដើម្បីចុះមកពិនិត្យ និងស្ទូចយកទៅរក្សាកន្លែងដែលមានសុវត្ថិភាព ។
លុះនៅព្រឹកថ្ងៃទី២១ ឧសភា នេះ ទើបមន្ត្រីស៊ីម៉ាក់បានសហការជាមួយអាជ្ញាធរមូលដ្ឋានថា ចុះទៅលើកយកគ្រាប់នោះមកដាក់លើគោក ។ ជាមួយគ្នានោះដែរ លោក ជា ថុល បានអំពាវនាវដល់បងប្អូនប្រជាពលរដ្ឋ បើបានឃើញមានគ្រាប់មិនទាន់ផ្ទុះ ត្រូវរាយការណ៍មកសមត្ថកិច្ច ឬដាក់តម្រុយជាសញ្ញាកំណត់ចំណាំ ។
គួររំលឹកផងដែរថា កាលពី២ឆ្នាំមុន គ្រាប់ដែលមិនទាន់ផ្ទុះ១គ្រាប់មានទំហំគ្រាប់ ដែលទើបនឹងប្រទះឃើញ ក៏ត្រូវបានប្រជាពលរដ្ឋប្រទះឃើញនៅស្រុកល្វាឯមនេះដែរ ។ ហើយនេះ ក៏ជាមហាសំណាងមួយដែរ ដែលប្រជានេសាទអូសសំណាញ់ទាក់នឹងគ្រាប់ហើយមិនបានផ្ទុះ បើសិនជាផ្ទុះវិញនោះ មិនដឹងថា ប្រជានេសាទទាំងនោះនឹងរងគ្រោះអ្វីខ្លះទេ ៕
ចែករំលែកព័តមាននេះ