ខេត្តពោធិ៍សាត់ ៖ មុខសញ្ញាចោរលួចមិនចេះរាងចាលម្នាក់ទើបតែចេញពីគុកមិនបានប៉ុន្មានខែផងទៅលួចម៉ូតូគេចំនួនពីរលើកបានចំនួនពីរគ្រឿងត្រូវសមត្ថកិច្ចចាប់ដាក់គុកវិញទៅតាមពាក្យបណ្ដឹងរបស់ម្ចាស់ម៉ូតូកាលពីថ្ងៃទី២៧ មេសា ២០១៥ នៅភូមិតាកែវលើ ឃុំត្នោតជុំ ស្រុកក្រគរ។
ជនសង្ស័យដែលឃាត់ខ្លួននេះឈ្មោះយឹម អ៊ាក់ ភេទប្រុស អាយុ១៧ឆ្នាំ រស់នៅភូមិទួលខ្មែរ ឃុំស្នាមព្រះ ស្រុកបាកាន ។ លោកវរសេនីយ៍ត្រីគុយ ញឿន អនុប្រធានការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តពោធិ៍សាត់ឲ្យដឹងថា ជនសង្ស័យទើបតែចេញពីពន្ធនាគារបានពីរខែប៉ុណ្ណោះពីបទបៀតបៀនកេរ្តិ៍ខ្មាស់។
ការឃាត់ខ្លួននេះធ្វើឡើងតាមពាក្យបណ្ដឹងរបស់ស្ត្រីឈ្មោះកែវ សុខឃឿន អាយុ៣០ឆ្នាំ រស់នៅភូមិក្រាំងតាសែន សង្កាត់ព្រៃញី ក្រុងពោធិ៍សាត់ ដែលបានបាត់ម៉ូតូមួយគ្រឿងម៉ាកហុងដាសេ១២៥ ពណ៌ខ្មៅ ស៊េរី២០០១ ពាក់ស្លាកលេខពោធិ៍សាត់1B.6543 កាលពីព្រឹកថ្ងៃទី២៥ មេសា ហើយបានទៅរកឃើញនៅកន្លែងជួសជុលម៉ូតូភូមិតាកែវលើ ឃុំត្នោតជុំ ស្រុកក្រគរ នៅថ្ងៃទី២៧។
បន្ទាប់ពីទទួលបានព័ត៌មាននេះសមត្ថកិច្ចបានចុះទៅសួរនាំដល់កន្លែងជួសជុលម៉ូតូនោះទើបស្រាវជ្រាវឃាត់ខ្លួនបានជនសង្ស័យតែម្ដង។ នៅចំពោះមុខសមត្ថកិច្ចជនសង្ស័យឈ្មោះយឹម អ៊ាក់ បានសារភាពថា កាលពីថ្ងៃទី២៥ មេសា ២០១៥ខ្លួនពិតជាបានលួចម៉ូតូរបស់ស្ត្រីឈ្មោះកែវ សុខឃឿន នេះមែនដែលដាក់នៅខាងលិចផ្សារថ្មីពោធិ៍សាត់។ បន្ទាប់ពីលួចបានហើយបានជិះយកទៅលក់ឲ្យជាងជួសជុលម៉ូតូនៅភូមិតាកែវលើ ឃុំត្នោតជុំ ស្រុកក្រគរបានលុយចំនួន២៣ម៉ឺនរៀល។
ស្អែកឡើងថ្ងៃទី២៦ ខ្លួនបានទៅលួចម៉ូតូមួយគ្រឿងទៀតម៉ាកសង់កូរ៉េដែលម្ចាស់ដាក់ប្រហែសមិនដកសោទុកនៅម្ដុំគល់ស្ពានថ្មថ្មីខាងមុខសាលាខេត្តពោធិ៍សាត់។ បន្ទាប់ពីលួចបានហើយខ្លួនបានជិះទៅដេកនៅភូមិទួលខ្មែរ ឃុំស្នាមព្រះ ស្រុកបាកានមួយយប់។ ព្រឹកឡើងថ្ងៃទី២៧ បានជិះមកលក់ឲ្យជាងជួសជុលម៉ូតូនៅកន្លែងដដែលក៏ត្រូវសមត្ថកិច្ចឃាត់ជាប់តែម្ដង។
លោកគុយ ញឿន បញ្ជាក់ថា បន្ទាប់ពីឃាត់ខ្លួនជនសង្ស័យបានហើយទើបស្រាវជ្រាវរកម្ចាស់ម៉ូតូសង់កូរ៉េឃើញ គឺឈ្មោះកែវ ហាន នៅភូមិស្វាយលួង ឃុំស្វាយលួង ស្រុកកណ្ដៀង និងបានប្រគល់ម៉ូតូជូនទៅម្ចាស់ដើមវិញ៕
ចែករំលែកព័តមាននេះ