ខេត្តប៉ៃលិន ៖ ផ្លូវលំ១ខ្សែប្រវែងប្រមាណ៣០០ម៉ែត្រ ស្ថិតនៅខាងក្រោយក្បែរកាស៊ីណូម្កុដពេជ្រ និងភោជនីយដ្ឋានបរដឺ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ទទួលរងការខូចខាតស្ទើរទាំងស្រុង អស់រយៈពេលជាច្រើនខែឆ្នាំកន្លង
ខេត្តប៉ៃលិន ៖ ផ្លូវលំ១ខ្សែប្រវែងប្រមាណ៣០០ម៉ែត្រ ស្ថិតនៅខាងក្រោយក្បែរកាស៊ីណូម្កុដពេជ្រ និងភោជនីយដ្ឋានបរដឺ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ទទួលរងការខូចខាតស្ទើរទាំងស្រុង អស់រយៈពេលជាច្រើនខែឆ្នាំកន្លងមកហើយ ដោយសារមានគេបង្ហូរទឹកសម្អុយចេញពីកន្លែងខាងលើ បណ្តាលឱ្យជះក្លិនស្អុយអសោចប៉ះពាល់ដល់សុខភាពផ្លូវដង្ហើមរបស់ប្រជាពលរដ្ឋជាច្រើននាក់ ដែលកំពុងរស់នៅក្បែរនោះ តែគេមិនឃើញអាជ្ញាធរមូលដ្ឋាន ឬអាជ្ញាធរ ស្រុក ខេត្ត ណាម្នាក់អើពើចុះទៅធ្វើការទប់ស្កាត់នោះទេ ។
ជាក់ស្តែង កាលពីរសៀលថ្ងៃទី២០ មេសា ២០១៥ កន្លងទៅនេះ ខណៈអ្នកយកព័ត៌មានចុះទៅពិនិត្យឃើញទឹកស្អុយដែលកំពុងហូររឹមៗ ក្នុងទិសដៅពីកើតទៅលិច បង្កការប៉ះពាល់យ៉ាងខ្លាំងគួរឱ្យយកចិត្តទុកដាក់ផងដែរ ។ ប្រជាពលរដ្ឋជាច្រើននាក់ ដែលរស់នៅក្បែរកន្លែងទឹកសម្អុយហូរលើផ្លូវលំ១ខ្សែនេះ បាននិយាយរៀបរាប់ត្អូញត្អែរឱ្យដឹងថា ជារៀងរាល់ថ្ងៃ ពួកគាត់ពិតជាលំបាកក្នុងការទ្រាំរស់នៅដកដង្ហើមស្រូបយកក្លិនស្អុយអសោចពីទឹកហូរដែលចេញពីខាងក្រោយក្បែរកាស៊ីណូម្កុដពេជ្រ និងភោជនីយដ្ឋានបរដឺនេះខ្លាំងណាស់ ព្រោះជាទឹកហូរចេញពីបន្ទប់ទឹក និងបង្គន់ ហើយបន្តហូរធ្លាក់ចូលទៅក្នុងអូរក្បែរព្រំដែនកម្ពុជា-ថៃ បង្កការប៉ះពាល់យ៉ាងខ្លាំងដល់ប្រជាពលរដ្ឋជាច្រើនគ្រួសារ ដែលកំពុងរស់នៅប្រើប្រាស់ទឹកទាំងនេះ ។
ប្រជាពលរដ្ឋធ្វើការរិះគន់បន្តទៀតថា អាជ្ញាធរស្រុក ខេត្ត និងមន្ទីរបរិស្ថាន គួរតែចុះទៅរៀបចំឱ្យមានសណ្តាប់ធ្នាប់ដូចជា ឱ្យម្ចាស់កាស៊ីណូ ឬភោជនីយដ្ឋាន បង្កើតអាងស្តុកទឹកសម្អុយទាំងនេះឱ្យបានត្រឹមត្រូវ មិនគួរបណ្តែតបណ្តោយឱ្យបង្ហូរទឹកស្អុយ ចេញយ៉ាងអនាធិបតេយ្យបែបនេះនោះទេ ។ ម្យ៉ាងវិញទៀត ការធ្វើបែបនេះ គឺខុសទៅនឹងស្តង់ដារ ព្រោះថា ទឹកម៉ូដ(ទឹកនោម) ឬទឹកលាមក ដែលហូរធ្លាក់ចុះទៅក្នុងអូរ ឬស្ទឹង អាចចម្លងមេរោគដល់បងប្អូនប្រជាពលរដ្ឋ ដែលកំពុងតែប្រើប្រាស់ទឹកទាំងនោះគួរឱ្យព្រួយបារម្ភ ។
ពួកគាត់ក៏មានសំណូមពរឱ្យអាជ្ញាធរមូលដ្ឋានចុះទៅរៀបចំសណ្តាប់ធ្នាប់ត្រង់ចំណុចផ្លូវលំខាងលើ និងមិនត្រូវបណ្តែតបណ្តោយឱ្យម្ចាស់ភោជនីយដ្ឋាន ឬម្ចាស់កាស៊ីណូទាំងនោះបន្តបង្ហូរទឹកស្អុយចូលទៅក្នុងអូរ ព្រែក ឬស្ទឹងនោះឡើយ សុំឱ្យពួកគេធ្វើអាងស្តុកសម្រាប់ខ្លួនឯង នោះទើបមិនមានការប៉ះពាល់ដល់បរិស្ថានផងដែរ ។
ពាក់ព័ន្ធទៅនឹងបញ្ហានេះ លោក មាស សាវ៉ាត មេភូមិផ្សារព្រំ បានឱ្យដឹងតាមទួរស័ព្ទ កាលពីរសៀលថ្ងៃទី២០ មេសា នេះថា ខាងអាជ្ញាធរភូមិ កំពុងតែដើរផ្តិតមេដៃរៃអង្គាសលុយបដិភាគមួយចំនួនពីប្រជាជលរដ្ឋ ដែលរស់នៅក្បែរផ្លូវលំ១ខ្សែនេះ ដើម្បីយកទៅផ្គួបផ្សំជាមួយថវិការដ្ឋ ហើយឱ្យក្រុមហ៊ុនធ្វើផ្លូវឯកជនមួយចុះទៅធ្វើការជួសជុលនៅចុងខែមេសាឆាប់ៗខាងមុខនេះ មិនឱ្យទឹកសម្អុយបន្តហូរលើផ្លូវលំទៀត តែទឹកនេះអាចបន្តហូរធ្លាក់ចូលទៅក្នុងអូរព្រំដែនដដែល៕
ចែករំលែកព័តមាននេះ