ខេត្តឧត្តរមានជ័យ ៖ ក្នុងពិធីបុណ្យចូលឆ្នាំថ្មីប្រពៃណីជាតិខ្មែរជារៀងរាល់ឆ្នាំ គិតចាប់ពីថ្ងៃទី១៤ រហូតដល់ថ្ងៃទី១៧ មេសា ២០១៥ គេសង្កេតឃើញប្រជាពលរដ្ឋខ្មែរគ្រប់ៗរូប បាននាំគ្នាដើរលេង និងលេងល្បែងប្រជាប្រិយកម្សាន្តយ៉ាងសប្បាយរីករាយ នៅតាមទីអារាមនានាយ៉ាងច្រើនកុះករ ក្នុងខេត្តឧត្តរមានជ័យ ។
ដោយឡែក គេក៏សង្កេតឃើញនៅឯប្រាសាទតាមាន់ធំវិញ កន្លងមកជារៀងរាល់ឆ្នាំ មានប្រជាពលរដ្ឋខ្មែរតែងតែនាំគ្នាទៅលេង
កម្សាន្តនៅទីនោះយ៉ាងច្រើន តែនៅក្នុងឆ្នាំនេះ គឺមានប្រជាពលរដ្ឋទៅកម្សាន្តមានការថយចុះ៨០% ខណៈដែលគេដឹងថា មកពីមានការស្អប់ខ្ពើមពីទង្វើក្រុមទាហានសៀម ។
ប្រជាពលរដ្ឋខ្មែរដែលចូលទៅលេងកម្សាន្តនៅប្រាសាទតាមាន់ធំ បាននាំគ្នាត្អូញត្អែរថា មកលេងកម្សាន្តនៅទីនេះមិនសប្បាយចិត្តទេ ពីព្រោះនៅជុំវិញតួប្រាសាទ រកតែមើលទិដ្ឋភាពធម្មជាតិ ដែលស្ថិតនៅជុំវិញមិនឃើញសោះ ឃើញតែស្បៃសំណាញ់ពណ៌ខៀវដែលក្រុមទាហានសៀមយកមកធ្វើការហ៊ុមព័ទ្ធជាប់នឹងខឿនប្រាសាទនេះ ជាទង្វើដ៏អាក្រក់របស់ក្រុមទាហានសៀម សូម្បីតែពលរដ្ឋខ្មែរចូលទៅទីនោះ ទាហានសៀមបានដើរតាមមើល និងដាក់កម្លាំងឈរយាមគ្រប់ច្រកផងដែរ ធ្វើដូចជាប្រាសាទរបស់ខ្លួនអ៊ីចឹង ។
ទាក់ទិននឹងហេតុការណ៍បែបនេះ កោះសន្តិភាពបានជួបឧត្តមសេនីយ៍ត្រី នាក់ វង្ស មេបញ្ជាការរង និងជានាយសេនាធិការកងពលតូចថ្មើរជើងលេខ៤២ បានមានប្រសាសន៍ថា ក្នុងពិធីបុណ្យចូលឆ្នាំថ្មីប្រពៃណីជាតិខ្មែរម្តងៗ លោកបានសង្កេតឃើញប្រជាពលរដ្ឋយើងបាននាំគ្នាសប្បាយរីករាយទៅលេងល្បែងប្រជាប្រិយតាមទីអារាម និងប្រពលរដ្ឋខ្មែររាប់ពាន់នាក់ ក៏នាំគ្នាមកកម្សាន្តនៅឯប្រាសាទតាមាន់ធំផងដែរ តាំងពីមិនទាន់មានផ្លូវស្រួល រហូតដល់មានផ្លូវចាក់ដល់ប៊ីតុង ។
តែដោយឡែក ក្នុងពិធីបុណ្យចូលឆ្នាំថ្មីប្រពៃណីជាតិឆ្នាំ២០១៥នេះ ប្រជាពលរដ្ឋខ្មែរដែលចូលមកលេងកម្សាន្តបានត្រឹមតែ២០%ប៉ុណ្ណោះ ដោយសាតែមានអ្នកខ្លះ បានមកលេងជាញឹកញាប់ហើយ និងមានការធុញទ្រាន់ក៏អាចថា បញ្ហាមួយទៀត ប្រជាពលរដ្ឋមួយចំនួនទៀតយល់ឃើញថា មកលេងនៅទីនេះបានឃើញតែតួប្រាសាទ រីឯទិដ្ឋភាពនៅជុំវិញមិនបានឃើញទេ ធ្វើឱ្យពួកគាត់មិនសប្បាយ ទើបមិននាំគ្នាមកលេងនៅទីនេះ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ