រាជធានីភ្នំពេញ ៖ ស្នាដៃថ្មីរបស់ផលិតកម្មមុត ថារី រឿង «បេះដូងក្រៅទ្រូង» ដែលជាទឹកដៃនិពន្ធរបស់កវីល្បីឈ្មោះលោកគង្គ ប៊ុនឈឿន នឹងចេញជារូបរាងនៅពេលខាងមុខ បន្ទាប់ពីលោកមុត ថារី ដឹកនាំក្រុមការងារធ្វើពិធីក្រុងពលីកាលពីព្រឹកថ្ងៃទី៣១ មីនា ២០១៥ នៅម្តុំព្រែកហូរ ខេត្តកណ្តាល ដោយមានតារាមួយចំនួនចូលរួមផងដែរ។
ថ្លែងប្រាប់អ្នកយកព័ត៌មានយើងក្នុងពិធីក្រងពលីរឿងថ្មីមានចំណងជើងថា «បេះដូងក្រៅទ្រូង» លោកមុត ថារី បានមានប្រសាសន៍ថា «យើងបានទទួលគោលការណ៍អនុញ្ញាតពីក្រសួងព័ត៌មានបានឧបត្ថម្ភជាថវិការផលិតទាំងស្រុង ហើយគោលដៅរបស់លោកផលិតឡើង ដើម្បីចាក់ផ្សាយនៅលើកញ្ចក់ទូរទស្សន៍ជាតិកម្ពុជា។ នេះជាទុនបង្វឹលមានន័យថា គឺលោកផលិតហើយប្រគល់ជូនដល់ទទក ជួយទុនមកលោកវិញ ក៏លោកផលិតរឿងបន្តទៀត។ លោកបានផ្អាកថតរឿងជាង១ឆ្នាំ បន្ទាប់ពីស្នាដៃចុងក្រោយរឿង «ជីវិតលោកកីយ៍សិល្បៈ» របស់ទូរទស្សន៍អាស៊ីអាគ្នេយ៍ តែលោកនៅផលិតរឿងខ្លះៗដែរ មិនទាន់ចោលនៅឡើយទេ។ បន្ទាប់ពីថតរឿងនេះ រូបលោកមានជំនឿចិត្តថា កាលណាយើងផលិតរឿងមួយដែលល្អ និងមានការផ្ចិតផ្ចង់ប្រឹងប្រែងរបស់យើង ពិតជារំពឹងថា មានការគាំទ្រច្រើន ព្រោះថា រឿងនេះជារឿងបែបមនោសញ្ចេតនា និងជាស្នាដៃនិពន្ធប្រលោមលោកតាំងពីឆ្នាំ១៩៩៩ របស់លោកគង្គ ប៊ុនឈឿន ដែលលោកបានសុំការអនុញ្ញាតគាត់សុំបើកជារឿងភាគ ដោយលោកយកបំបែកបន្ថែមមួយវគ្គទៀត ដោយច្នៃសាច់រឿងឲ្យកាន់តែប្រសើរ។ អតីតតារាសម្តែងរូបនេះបន្តថា រឿងនេះក្នុងរវាង២ថ្ងៃត្រូវផលិតឲ្យបាន២ភាគ ដោយសាច់រឿងមានសរុបប្រមាណ១២ទៅ១៥ភាគ។ ក្នុង១២ភាគពេលដែលយើងបញ្ចាំងយើងចាប់ផ្តើមបង្វិលទុនបន្តទៀត។ ចំណែករឿងលោកមិនធ្វើជាភាគវែងនោះទេ សាច់រឿងមួយៗយើងច្នៃពី១២ទៅ១៥ភាគ ប៉ុន្តែបើយើងយកមកដាក់បញ្ចាំងវិញ គឺប្រហែលជាបានច្រើន ព្រោះបញ្ចាំងត្រឹមតែ៣០នាទី។ លោកបានព្យាយាមថតឲ្យចប់នៅពាក់កណ្តាលខែឧសភាហើយ លោកនឹងប្រគល់កាត់រួចរាល់ជូនទូរទស្សន៍រយៈពេលមួយមុនទូរទស្សន៍បញ្ចាំង១ខែ លោកក៏ត្រូវមានទុនបង្វិលថតរឿងថ្មី ដើម្បីឲ្យទូរទស្សន៍គាត់បញ្ចាំងបណ្តើរចប់តទៅរឿងថ្មីទៀត នេះជាគោលការណ៍របស់លោក។ បន្ថែមពីលើនេះលោកក៏គ្រោងរៀបចំកម្មវិធីថ្មីដែលមានឈ្មោះថា «៧នាទីនៃសិល្បៈ» ដែលនិយាយពីសកម្មភាពសិល្បៈរបស់តួមានខុស ឬត្រូវ ដោយអាចស្នើដល់ទូរទស្សន៍ជាតិ ដើម្បីចាក់ផ្សាយកម្មវិធីថ្មីនេះ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ