ខេត្តស្វាយរៀង ៖ ប្រជាពលរដ្ឋឃុំថ្មីធ្វើស្រែក្នុងមួយឆ្នាំបានបីដង ក៏ប៉ុន្តែមានការប្រឈមនឹងកង្វះទឹកដាក់ស្រែក្នុងចុងរដូវប្រាំង មូលហេតុដោយសារប្រព័ន្ធប្រឡាយ និងអូររាក់ ហើយប្រជាពលរដ្ឋមួយចំនួនបង្ខំចិត្តបុកអណ្តូងបូមទឹកដាក់ស្រូវដែលធ្វើឲ្យទិន្នផលស្រូវថយចុះ និងចំណាយថវិកាច្រើន ហើយតម្លៃស្រូវលក់បានថោកទូទាត់ការចំណាយខ្ពស់ទទួលប្រាក់ចំណេញតិចតួចអ្នកខ្លះខាតដើម។
បើតាមកសិករម្នាក់ឈ្មោះគឹម ក្អាត់ ភេទប្រុស អាយុ៥១ឆ្នាំ ជាជនពិការជើងស្តាំ រស់នៅភូមិអូរ ឃុំថ្មីស្រុកកំពង់រោទិ៍ បានឲ្យដឹងកាលពីរថ្ងៃទី៣០ មីនា ២០១៥ ថា រូបគាត់មានស្រែចំនួន៦ហិកតាបានបង្កបង្កើនផលក្នុង១ឆ្នាំបីដង គឺធ្វើស្រែពូជស្រូវអ៊ីអ៊ែរ(IR៥៤)លើកទី១ចាប់ផ្តើមពីខែឧសភាដល់ខែកក្កដា ទិន្នផលក្នុងមួយហិកតា៧តោន បើមានទឹកគ្រប់គ្រាន់។ លើកទី២ ធ្វើនៅក្នុងខែកញ្ញាច្រូតកាត់ខែធ្នូ ទិន្នផលក្នុង១ហិកតា៨តោនទៅ៩តោនតម្លៃស្រូវ១គីឡូគិតជាលុយខ្មែរ៧០០រៀល ចំណេញគិតជាដុល្លារក្នុងមួយហិកតា៧៥០ដុល្លារ។
លើកទី៣ចាប់ផ្តើមពីខែមករាដល់ខែមីនា ហើយខ្វះទឹក២ខែគឺក្នុងខែកុម្ភៈ និងមីនា ទិន្នផលថយចុះក្នុងមួយហិកតាបាន៤តោនទៅ៥តោនប៉ុណ្ណោះ គឺអាចខាតដោយសារការចំណាយប្រាក់ខ្ពស់ គឺប្រើពូជជីDAP២បាវ ក្នុង១បាវ៧៧០.០០០ដុងជីអ៊ុយរ៉េ៣បាវ ក្នុងមួយបាវ៤២០.០០០ដុង ជី២០-២០-១៥ ចំនួន៤បាវក្នុង១បាវ ៦២០.០០០ដុង ប្រើថ្នាំសម្លាប់សត្វល្អិត២លានដុង ប្រេងបូមទឹកអស់៤៥០លីត្រ(១៥ពីដុង) ៣០លីត្រតម្លៃ៤សែនដុង បើគិតជាមធ្យមក្នុង១ហិកតាចំណាយប្រាក់អស់១០លានដុង ស្មើប្រាក់ដុល្លារ៥០០ដុល្លារ។ ស្រូវ១គីឡូតម្លៃ៤២៥០ដុងស្មើ៦៥០រៀល គឺគ្មានចំណេញទេដោយចំណាយខ្ពស់។
ទាក់ទិនករណីនេះដែរលោកសំពាន់ មេឃុំថ្មីបានមានប្រសាសន៍ថា ឃុំថ្មីមាន៦ភូមិ គឺភូមិព្រៃវល្ល័ ភូមិអូរភូមិកោះត្រាច ភូមិថ្មី ភូមិវាលម្អម និងភូមិជប់ព្រីង មានប្រជាពលរដ្ឋរស់នៅចំនួន១.៧៦៧គ្រួសារ មនុស្សសរុប៦១៩៦នាក់ ស្រី៣២៤២នាក់ មានផ្ទៃដីសរុប៤.០០០ហិកតា ក្នុងនោះផ្ទៃដីបង្កបង្កើនផល៣៥១៣ហិកតា ហើយស្រូវវស្សាគឺធ្វើតិចតួចប្រមាណ២៥០ហិកតាប៉ុណ្ណោះ។ ដោយតំបន់ជាប់ព្រំដែនហើយទឹកលិចជាទូទៅ គឺធ្វើស្រែប្រាំងក្នុងមួយឆ្នាំបីដង លើកទី២ផែនការ៣.០០០ហិកតាគឺសម្រេចតាមផែនការលើកទី៣នេះសម្រេចបាន២២៦៧ហិកតា។
នៅដើមខែមីនានេះប្រឈមខ្វះទឹកមន្ទីរធនធានទឹក និងឧតុនិយមខេត្តបានយកគ្រឿងចក្រមកស្តារប្រឡាយ និងអូរដោយប្រជាពលរដ្ឋម្ចាស់ស្រែចូលរួមផ្តល់ប្រេងម៉ាស៊ូត គឺបានស្តារប្រឡាយ និងអូរយកទឹកសង្គ្រោះស្រូវទាន់ពេល ដូច្នេះសូមអំពាវនាវសុំរាជរដ្ឋាភិបាលមេត្តាផ្តល់ថវិកាស្តារប្រពន្ធ័ប្រឡាយ និងអូរដាវដែលសព្វថ្ងៃរាក់គោកទឹកបណ្តាលឲ្យខ្វះទឹកបូមដាក់ស្រែ ហើយបើបុកអណ្តូងគឺបូមទឹកបានតិចចំណាយប្រាក់ច្រើនខាតមិនចំណេញឡើយមានតែស្តារប្រឡាយមេឡើងវិញ ជាពិសេសស្តារអូរដាវដែលជាប់ព្រំដែនកម្ពុជា-វៀតណាមទើបអាចផ្គត់ផ្គង់ទឹកបាន៕
ចែករំលែកព័តមាននេះ