ខេត្តសៀមរាប ៖ កាលពីពេលកន្លងទៅថ្មីៗនេះ មានក្រុមអ្នកតាមដានបទល្មើសនេសាទគ្រប់ប្រភេទបានបង្ហាញថា មានឧបករណ៍នេសាទខុសច្បាប់ដូចជា ប័រ, អ៊ុយ, រុញស៊ីប, អូសអួន, អូសយ៉ាំងកាវ, សាច់ស្បៃមុងក្រឡាញឹកជាដើម កំពុងកើតមានដូចភ្លៀងរលឹមឡើងវិញ នៅតាមមាត់ព្រែកនានាក្នុងភូមិសាស្ត្រផ្នែករដ្ឋបាលជលផលចុងឃ្នៀស ទើបគេដាក់ការសង្ស័យថា សមត្ថកិច្ចជំនាញមួយ ចំនួនបានទទូលលាភសក្ការៈពីក្រុមឈ្មួញ ដែលជាជនជាតិវៀតណាម បានប្រព្រឹត្តបទល្មើសនេសាទគ្រប់ប្រភេទទាំងនោះ ជាច្រើនឆ្នាំមកហើយ ។
គេសង្កេតឃើញថា ពីមួយឆ្នាំទៅមួយឆ្នាំ ផលត្រីកាន់តែថយចុះជាលំដាប់ ដែលបណ្តែតបណ្តោយឱ្យពលរដ្ឋមួយចំនួនបង្ខំចិត្តទទួលទានត្រីចិញ្ចឹមដែលគេយកមកលក់នៅតាមទីផ្សារទៅវិញ ព្រោះត្រីធម្មជាតិត្រូវបានហិនហោចស្ទើរទាំងស្រុងទៅហើយ បើមិនទប់ស្កាត់ទាន់ពេលវេលា។
ប្រភពបានឱ្យដឹងថា នៅក្នុងភូមិសាស្ត្រសង្កាត់ចុងឃ្នៀស, កំពង់ភ្លុក, មានសកម្មភាពបទល្មើសនេសាទជាច្រើនប្រភេទកំពុងកើតមានជាយូរឆ្នាំមកហើយ ក្រោមការគ្រប់គ្រងផ្ទាល់របស់លោកព្រិន្ទ សាវិននាយខណ្ឌរដ្ឋបាលជលផលខេត្តសៀមរាប, នាយផ្នែកចុងឃ្នៀស លោកស្រី កែវសុភ័ក្ត (ប្រុស) បានធ្វើឲ្យបទល្មើសកើតឡើងដូចភ្លៀងរលឹម ក្នុងដើមឆ្នាំ២០១៥ នេះ ដោយពុំមានចំណាត់ការ របស់អាជ្ញាធរពាក់ព័ន្ទជុំវិញខេត្ត ជាពិសេសជំនាញជលផលនោះទេ ហើយករណីនេះគេបានដាក់ការសង្ស័យថា មានការឃុបឃិតគ្នាជាប្រព័ន្ធ ។
ប្រភពបានបន្តឱ្យដឹងថា បទល្មើសជាច្រើនប្រភេទ ដែលកើតមានច្រើនជាងគេ គឺនៅក្នុងភូមិសាស្ត្រស្រុកប្រាសាទបាគង, និងក្រុងសៀមរាប ក្រោមការគ្រប់គ្រងដោយសមត្ថកិច្ចចម្រុះ ជាពិសេសខាងជំនាញរដ្ឋបាលជលផលដែលមានតួនាទីការពារតំបន់ទាំងនោះឱ្យបានស្ថិតស្ថេរ ។ ប្រភពបានបន្តទៀតថា ក្រុមអ្នកនេសាទនៅតំបន់នោះតែងតែមិនហ៊ានមើលរំលងសមត្ថកិច្ចខាងលើនេះទេ បើមិនដូច្នេះ គេនឹងមានវិធានការបង្ក្រាបយកស្នាដៃជូនថ្នាក់លើមើលលេងជាក់ជាមិនខាន។
ប្រភពបានបន្តទៀតថា ទាក់ទិននឹងការលើកឡើងខាងលើនេះដែរ នាយផ្នែកចុងឃ្នៀស លោកស្រី កែវសុភ័ក្ត បានមានប្រសាសន៍តាមទូរស័ព្ទ កាលពីពេលកន្លងទៅថា លោកទទួលស្គាល់ថា នៅក្នុងភូមិសាស្ត្រដែលលោកគ្រប់គ្រង គឺពិតជាមានមួយចំនួនមែន ប៉ុន្តែលោកបានឲ្យប្រជានេសាទធ្វើការកែប្រែឡើងវិញ គឺពីវែងមកខ្លីបាន៦០%។ លោកបន្តថា ចំពោះករណីនេះថា លោកទទួលលុយពីបទល្មើសនេសាទនោះពិតជាមិនមាននោះទេ តែលោកបានលើកឡើងថា ចំពោះកូនចៅរបស់លោកវិញ បានទទួលលុយពីបទល្មើសខ្លះៗដែរ ។
ជុំវិញករណីចោទប្រកាន់ខាងលើនេះដែរ លោកព្រិន្ទ សាវិន នាយខណ្ឌរដ្ឋបាលជលផលខេត្តសៀមរាប មិនអាចសុំការពន្យល់ពីលោកបានទេនៅព្រឹកថ្ងៃទី៣០ខែមិនា ជុំវិញបញ្ហាបទល្មើសនេសាទដែលកើតមានពេញផ្ទៃបឹងទន្លេសាបនៃខេត្តសៀមរាបដោយទូរស័ព្ទរបស់លោកហៅចូលគ្មានអ្នកលើក។
ចែករំលែកព័តមាននេះ