រាជធានីភ្នំពេញ ៖ ក្រសួងសាធារណការនិងដឹកជញ្ជូន បានប្រកាសជម្រាបជូនដល់ប្រធានមន្ទីរសាធារណការ និងដឹកជញ្ជូនរាជធានី-ខេត្ត ឲ្យលុបបំបាត់ប៉ុស្តិ៍ជញ្ជីងថ្លឹងបែបអនាធិបតេយ្យ នៅតាមដងផ្លូវតាមបណ្តាខេត្តមួយចំនួនដែលផ្គើនទៅនឹងសេចក្តីប្រកាសរបស់ក្រសួងនាពេលកន្លងមក ។ ការប្រកាសនេះ គឺបន្ទាប់ពីមានបាតុភាពមួយបានកើតឡើងរហូតដល់មានការដេញបាញ់រថយន្តដឹកស្រូវដូចដេញបាញ់ឧក្រិដ្ឋជន ហើយពេលចាប់បានក៏នាំគ្នាវាយទាត់ធាត់យ៉ាងសាហាវថែមទៀត ដោយកម្លាំងមានសមត្ថកិច្ច ។
លិខិតដែលចុះហត្ថលេខាដោយលោក លឹម ស៊ីដេនីន ប្រធានគណៈកម្មាធិការសម្របសម្រួលអចិន្ត្រៃយ៍នៃក្រសួងសាធារណការ និងដឹកជញ្ជូន កាលពីថ្ងៃទី២៧ ខែមីនា ឆ្នាំ២០១៥ បាន ជម្រាបទៅប្រធានមន្ទីរសាធារណការ និងដឹកជញ្ជូនរាជធានី-ខេត្ត ទូទាំងប្រទេសទាំងអស់ឲ្យលុបបំបាត់ប៉ុស្តិ៍ជញ្ជីងថ្លឹងបែបអនាធិបតេយ្យ តាមដងផ្លូវថ្នល់ក្នុងដែនសមត្ថកិច្ចរបស់ខ្លួន ។
ក្នុងលិខិតបានលើកឡើងថា តាមរយៈនៃសេចក្តីប្រកាសព័ត៌មាន ក៏ដូចជាលិខិតស្នើសុំគាំទ្រ និងជួយអន្តរាគមន៍ពីអាជ្ញាធររាជធានី-ខេត្ត ដែលក្រសួងសាធារណការ និងដឹកជញ្ជូន បានផ្សព្វផ្សាយ និងចម្លងជូនគ្រប់មន្ទីរសាធារណការ និងដឹកជញ្ជូនរាជធានី-ខេត្ត ក្នុងគោលដៅធានាឲ្យបាន ការគ្រប់គ្រង ការដឹកជញ្ជូនលើសទម្ងន់កម្រិតកំណត់ និងការលុបបំបាត់ប៉ុស្តិ៍ជញ្ជីងថ្លឹងបែបអនាធិបតេយ្យតាមផ្លូវថ្នល់ ។
ក្រសួងសូមវាយតម្លៃខ្ពស់ចំពោះស្មារតីយកចិត្តទុកដាក់ពីសំណាក់ប្រធានមន្ទីរមួយចំនួនដែលបាននិងកំពុងខិតខំចូលរួមអនុវត្តការលុបបំបាត់ប៉ុស្តិ៍ជញ្ជីងថ្លឹងបែបអនាធិបតេយ្យតាមដងផ្លូវក្នុងដែនសមត្ថកិច្ចយ៉ាងសកម្ម ។ ដោយឡែក នៅក្នុងដែនសមត្ថកិច្ចរបស់មន្ទីរសាធារណការ និងដឹកជញ្ជូនមួយចំនួន នៅតែមានការដាក់ប៉ុស្តិ៍ជញ្ជីងថ្លឹងបែបអនាធិបតេយ្យ និងបង្កជាបញ្ហានៅតាមដងផ្លូវថ្នល់នៅឡើយ ដែលទង្វើទាំងអស់នេះបាននិងកំពុងផ្គើនទៅនឹងសេចក្តីប្រកាសរបស់ក្រសួង ។
លិខិតរបស់លោកប្រធានគណៈកម្មាធិការសម្របសម្រួលអចិន្ត្រៃយ៍ នៃក្រសួងសាធារណការ និងដឹកជញ្ជូនបានបន្តថា ដើម្បីធានាបាននូវសេចក្តីថ្លៃថ្នូរ សណ្តាប់ធ្នាប់សាធារណៈ និងរបៀបរៀបរយសង្គម មន្ទីរសាធារណការ និងដឹកជញ្ជូន រាជធានី-ខេត្ត ត្រូវដាក់ចេញនូវវិធានការយ៉ាងម៉ឺងម៉ាត់លុបបំបាត់ឲ្យអស់ការដាក់ប៉ុស្តិ៍អនាធិបតេយ្យ ក្រោមរូបភាពត្រួតពិនិត្យការដឹកជញ្ជូនលើសទម្ងន់កម្រិតកំណត់ ។ ដោយឡែកក្នុងករណីដែលជនបង្កស្ថិតនៅហួសពីសមត្ថកិច្ច មន្ទីរត្រូវរាយការណ៍ជូនអាជ្ញាធរមានសមត្ថកិច្ចឱ្យជួយអន្តរាគមន៍ ។
គួរបញ្ជាក់ថា កន្លងមក ក្រសួងសាធារណការ និងដឹកជញ្ជូន ធ្លាប់បានប្រកាសឲ្យលុបបំបាត់ប៉ុស្តិ៍អនាធិបតេយ្យរូចទៅហើយ ប៉ុន្តែនៅតែឃើញមានប៉ុស្តិ៍អនាធិបតេយ្យកើតមានដដែល។ អ្វីដែលក្រសួងចេញប្រកាសជម្រាបដល់មន្ទីរសាធារណការ និងដឹកជញ្ជូន រាជធានី-ខេត្តទូទាំងប្រទេសនេះឲ្យលុបបំបាត់ជញ្ជីងអនាធិបតេយ្យ គឺបន្ទាប់ពីក្រុមមន្ត្រីជញ្ជីងចល័តនៅខេត្តត្បូងឃ្មុំ សហការជាមួយសមត្ថកិច្ចចម្រុះ ដាក់ប៉ុស្តិ៍ជញ្ជីងថ្លឹង អនាធិបតេយ្យ កាលពីយប់ថ្ងៃទី១៩ ខែមីនា ឆ្នាំ២០១៥ បង្កឲ្យមានការដេញបាញ់រថយន្តដឹកស្រូវរបស់ប្រជាពលរដ្ឋ និងចាប់ចងអ្នកបើករថយន្ត រួមទាំងព្រូរថយន្ត ធ្វើទារុណកម្មយ៉ាងសាហាវព្រៃផ្សៃ ។ អំពើរបស់ក្រុមសមត្ថកិច្ចនេះ ត្រូវបានប្រជាពលរដ្ឋវាយតម្លៃ និងរិះគន់ថា ជាអំពើអមនុស្សធម៌បំផុតដែលមិននឹកស្មានដល់ ហើយបច្ចុប្បន្ន កងរាជអាវុធហត្ថលើផ្ទៃប្រទេសកំពុងបើកការស៊ើបអង្កេតជុំវិញការកើតមានអំពើដ៏យង់ឃ្នងនេះ ៕
ចែករំលែកព័តមាននេះ