ខេត្តបន្ទាយមានជ័យ ៖ ម្ចាស់ទីតាំងសាខាលក់សំបុត្ររថយន្តក្រុងយីហោចាន់ ពៅ មានទីតាំងជាប់ដងផ្លូវជាតិលេខ៥ ក្នុងភូមិក្បាលកោះ សង្កាត់ និងក្រុងប៉ោយប៉ែត ត្រូវកម្លាំងកងរាជអាវុធហត្ថឃាត់ខ្លួនពីបទចែកចាយថ្នាំញៀន និងលាក់ទុកឧបករណ៍ខុសច្បាប់ (កាំភ្លើងជ័របាញ់គ្រាប់កង់ និងកាំបិទសាម៉ូរ៉ៃ)។
ហេតុការណ៍នេះបានកើតឡើងកាលពីវេលាម៉ោង៩ព្រឹក ថ្ងៃទី២៩ មីនា ២០១៥។ ជនសង្ស័យជាម្ចាស់សាខាលក់សំបុត្ររថយន្តក្រុងឈ្មោះចាន់ ពៅ ភេទប្រុស អាយុ៣៨ឆ្នាំ មានទីលំនៅក្នុងភូមិកើតហេតុ។ ជាមួយនិងការឃាត់ខ្លួនជនសង្ស័យខាងលើអាវុធហត្ថក្រុងឆែកឆេររកឃើញថ្នាំញៀនប្រភេទមេតំហ្វេតាមីនWY ពណ៌ផ្កាឈូកចំនួន៥គ្រាប់នៅក្នុងហោប៉ៅអាវជនសង្ស័យ និងរកឃើញអាវុធខ្លីជ័រប្រភេទកាំភ្លើងខ្យល់បាញ់គ្រាប់កង់០១ដើម កាំបិតសាមួរ៉ៃ០១ដើមលាក់ទុកក្នុងបន្ទប់លក់សំបុត្ររថយន្តក្រុងនោះ។
លោកជា ដា មេបញ្ជាការអាវុធហត្ថក្រុងប៉ោយប៉ែតបានប្រាប់កោះសន្តិភាពតាមទូរស័ព្ទថា ក្រោយពីមានសេចក្ដីរាយការណ៍ពីបណ្ដាញថា ទីតាំងសាខាលក់សំបុត្ររថយន្តក្រុងខាងលើមានលាក់ទុកអាវុធខ្លី និងក្រោយពីទទួលបទបញ្ជាពីលោកឧត្តមសេនីយ៍ឱ បូរិន មេបញ្ចាការអាវុធហត្ថខេត្តលោកបានដឹកនាំកម្លាំងចុះទៅទីតាំងសង្ស័យឃាត់ខ្លួនឈ្មោះចាន់ ពៅ ជាជនសង្ស័យ ហើយធ្វើការឆែកឆេរអនុលោមតាមបទបញ្ជាពីលោកព្រះរាជអាជ្ញាអមសាលាដំបូងខេត្តទើបរកឃើញវត្ថុតាងថ្នាំញៀន និងអាវុធខ្លីជ័រ និងកាំបិតសាមួរ៉ៃដែលជនសង្ស័យលាក់ទុក។
មេបញ្ជាការអាវុធក្រុងប្រាប់ថា ជនសង្ស័យ និងវត្ថុតាងក្រោយធ្វើកំណត់ហេតុសួរនាំចប់ នឹងកសាងសំណុំរឿងបញ្ជូនទៅទីបញ្ជាការអាវុធហត្ថខេត្តដើម្បីចាត់ការបន្តតាមនិតិវិធីច្បាប់។ គួរបញ្ជាក់ថា ករណីឃាត់ខ្លួន និងឆែកឆេរទីតាំងសង្ស័យខាងលើអាវុធហត្ថក៏បានហៅជនសង្ស័យ៤នាក់ផ្សេងទៀតសួរនាំដែរ ប៉ុន្តែដោយសារថាក្រៅពីឈ្មោះចាន់ ពៅ សុទ្ធតែជាកម្មករអូសរទេះ អូសឥវ៉ាន់ឲ្យពលករទៅទីនោះមិនជាប់ពាក់ព័ន្ធនឹងបទល្មើសសមត្ថកិច្ចបានឲ្យពួកគេទាំង៤នាក់ត្រឡប់ទៅលំនៅឋានវិញហើយ៕
ចែករំលែកព័តមាននេះ