ខេត្តសៀមរាប៖ ក្រុមមន្ត្រីកំពុងតែប្រឹងប្រែងក្នុងការចុះអង្កេតរកមូលហេតុពិតប្រាកដ ដែលនាំឲ្យកុមារ និងមនុស្សពេញវ័យជាង៦០០នាក់នៅឃុំពង្រលើ ស្រុកជីក្រែង ធ្លាក់ខ្លួនឈឺដោយមានអាការៈចុកពោះ រាករូស ក្អួតចង្អោរ ព្រមទាំងឈឺក្បាលផងដែរ បន្ទាប់ពីពួកគេបានទទួលទាននំបុ័ងដាក់សាច់ប៉ាតេ ផ្តល់ជូនដោយអង្គការទស្សនៈពិភពលោក(world vision) កាលពីព្រឹកថ្ងៃសុក្រ ទី២៧ មីនា កន្លងទៅ។
អភិបាលរង និងជាអ្នកនាំពាក្យសាលាខេត្តសៀមរាបលោកប៊ុន ថាឬទ្ធិ បានមានប្រសាសន៍កាលពីរសៀលថ្ងៃទី២៨ មីនា ថា ថ្វីបើកិច្ចប្រឹងប្រែងក្នុងការជួយសង្គ្រោះជនរងគ្រោះត្រូវបានបញ្ចប់ដោយជោគជ័យ ក៏យើងត្រូវចាំបាច់ចាត់ឲ្យមានការស៊ើបអង្កេតយ៉ាងយកចិត្តទុកដាក់បំផុតរកមូលហេតុពិត ជាពិសេសទៅលើប្រភពនុំបុ័ងដើម្បីបង្កាកុំឲ្យមានមហន្តរាយធ្ងន់ធ្ងរថែមទៀត។
គួររំលឹកថា ចាប់តាំងពីយប់ថ្ងៃទី២៧ រហូតដល់យប់ថ្ងៃទី២៨ មីនា យ៉ាងហោចណាស់ក៏មានកុមារ និងមនុស្សពេញវ័យប្រមាណជាង៦០០នាក់ រស់នៅឃុំពង្រលើ ស្រុកជីក្រែង បានធ្លាក់ខ្លួនឈឺជាបន្តបន្ទាប់ ដោយមានអាការៈដូចៗគ្នា គឺចុកពោះ រាករូស ក្អួតចង្អោរ ព្រមទាំងឈឺក្បាលផងដែរ បន្ទាប់ពីពួកគេបានទទួលទាននំបុ័ងដាក់សាច់ប៉ាតេ ផ្តល់ជូនដោយអង្គការទស្សនៈពិភពលោក(world vision) កាលពីព្រឹកថ្ងៃសុក្រ ទី២៧ មីនា កន្លងទៅ។
ទាក់ទិនទៅនឹងបញ្ហានេះដែរ អភិបាលរងខេត្ត និងជាអ្នកនាំពាក្យសាលាខេត្តសៀមរាប លោក ប៊ុន ថាឬទ្ធិ បានឲ្យដឹងថា កាលពីព្រឹកថ្ងៃទី២៧ មីនា ២០១៥ កន្លងទៅ អង្គការទស្សនៈពិភពលោក(world vision) សហការជាមួយអាជ្ញាធរស្រុកជីក្រែង បានរៀបចំទិវាប្រឆាំងពលកម្មកុមារនៅក្នុងបរិវេណសាលារដ្ឋមួយក្នុងភូមិចែក ឃុំពង្រលើ ស្រុកជីក្រែង ដោយមានសិស្សានុសិស្សចំនួន៧៧៨នាក់ និងអាណាព្យាបាលរបស់ពួកគេប្រមាណជាងមួយរយនាក់ផ្សេងទៀតចូលរួម។
លោកបាបញ្ចាក់បន្ថែមថា នៅក្នុងកិច្ចប្រជុំនោះអង្គការ world vision បានផ្តល់ជូនដល់អ្នកចូលរួមនូវកញ្ចប់អាហារ ក្នុងម្នាក់ៗមួយកញ្ចប់ រួមមាននំបុ័ងដាក់សាច់ប៉ាតេ និងទឹកបរិសុទ្ធមួយដបផងដែរ ហើយរយៈពេលបុន្មានម៉ោងក្រោយមកពួកបានធ្លាក់ខ្លួនឈឺ។
លោកបានបន្ថែមតាមព័ត៌មានដំបូងៗនុំបុ័ងទាំងនោះត្រូវបានអ្នកចាត់ចែងកម្មវិធីនៃអង្គការ( world vision ) ប្រមូលទិញពីកន្លែងពីរផ្សេងគ្នា គឺមួយផ្នែកទិញពីផ្សារដំដែក ស្រុកសូត្រនិគមន៏ និងមួយផ្នែកទៀតទិញពីទីប្រជុំជនឃុំសង្វើយ ស្រុកជីក្រែង ក៏ប៉ុន្តែប្រភពចុងក្រោយបានលាតត្រដាងថា នំបុ័ងទាំងនោះទិញពីហាងយីហោពន្លឺព្រះអាទិត្យ នៅក្នុងក្រុងសៀមរាប មុននឹងត្រូវបានគេប្រែក្លាយទៅជានុំបុ័ងដាក់សាច់(នំបុ័ងប៉ាតេ) នៅកន្លែងទាំងពីរខាងលើ។
ទោះជាយ៉ាងណាលោកបានបន្ថែមថា រហូតមកទល់ពេលនេះគេនៅមិនទាន់ដឹងឲ្យពិតប្រាកដពីមូលហេតុនៃអាការជម្ងឺនោះនៅឡើយទេ គ្រាន់តែសន្និដ្ឋានជំហានដំបូងថា នេះជាការពុលផ្តើមចេញពីនំបុ័ង ដែលមានដាក់បន្លែស្រស់បាញ់ថ្នាំគីមី (ត្រសក់) សាច់ប៉ាតេ នឹងជ្រក់ ច្រើនជាងទឹកបរិសុទ្ធ។
នៅក្នុងដំណាក់កាលដំបូងនៃការស៊ើបអង្កេតនោះ ថ្វីបើនៅមិនទាន់មានការបង្ហាញនូវលទ្ធផលភ្លាមៗនៅឡើយ ក៏ប៉ុន្តែនៅព្រឹកថ្ងៃអាទិត្យទី ២៩ មីនានេះ សមត្ថកិច្ចមួយក្រុមរួមមានប៉ូលិសការិយាល័យប្រឆាំងបទល្មើសសេដ្ឋកិច្ចខេត្ត មន្ត្រីកាំកុងត្រួលបានសម្រេចបិទដំណើរការអជីវកម្មហាង នំបុ័ងមួយ យីហោពន្លឺព្រះអាទិត្យ មានទីតាំងនៅក្នុងភូមិបន្ទាយចាស់ សង្កាត់ស្លក្រាម ក្រុងសៀមរាបជាបណ្តោះអាសន្ន ដែលគេរកឃើញថា ជាអ្នកផ្គត់ផ្គងនំបុ័ងទៅអង្គការទស្សនៈពិភពលោក។
លោកវរសេនីយ៍ទោ សឿន សេន នាយករិយាល័យនគរបាលប្រឆាំងបទល្មើសសេដ្ឋកិច្ចខេត្តដែលបានដឹកនាំកម្លាំងចុះទៅបិទហាងនំបុ័ងខាងលើបានថ្លែងថា ការបិទដំណើរការអជីវកម្មឡនំបុ័ងនេះ គឺត្រូវបានស្នើយោបល់ពីតំណាងអយ្យការ ហើយបើសិនជាលទ្ធផលនៃការពិសោធន៍ឃើញថា មិនមានជាតិពុលដូចការសង្ស័យ គាត់នឹងត្រូវបានអនុញ្ញាតឲ្យដំណើរការដូចធម្មតាវិញ។
គួរកត់សំគាល់ថា កាលពីព្រឹកថ្ងៃទី២៨ មីនា ២០១៥ កន្លងទៅ បុគ្គលិកសុខាភិបាលជាច្រើននាក់ រួមទាំងរថយន្តសង្គ្រោះប្រមាណជាង១០គ្រឿងត្រូវបានបញ្ជូនទៅកាន់កន្លែងកើតហេតុ ដើម្បីជួយសង្គ្រោះជនរងគ្រោះ ក្នុងនោះមានជនរងគ្រោះប្រមាណ៦៥នាក់ ស្ថិតនៅក្នុងស្ថានការធ្ងន់ធ្ងរត្រូវបានបញ្ជូនមកសង្គ្រោះនៅក្នុងមន្ទីរពេទ្យស្រុកសូត្រនិគមន៍ និងមន្ទីរពេទ្យកុមារអង្គរ។
ប្រធានមន្ទីរសុខាភិបាលខេត្តសៀមរាបលោកគ្រួស សារ៉ាត ដែលបានដឹកនាំមន្ត្រីសុខាភិបាលចុះអន្តរគមន៏ដល់ទីកន្លែងកើតហេតុបានថ្លែងប្រាប់តាមទូរសព្ទ័នៅព្រឹកថ្ងៃទី២៩ មីនា នេះថា តួរលេខចុងក្រោយដែលស្រង់បានគឺអ្នកជម្ងឺបានកើនឡើងរហូតដល់ជាង៦១០នាក់ទៅហើយ ក៏ប៉ុន្តែរហូតមកទល់ពេលនេះមិនមានជនរងគ្រោះណាម្នាក់បានស្លាប់នោះទេ ហើយបច្ចុប្បន្នភាគច្រើនបានធូរស្បើយត្រឡប់ទៅផ្ទះវិញដែរ នៅសល់តែប្រមាណ៥០នាក់ប៉ុណ្ណោះកំពុងបន្តតាមដានពីស្ថានភាពជម្ងឺ។
លោកបានបញ្ជាក់បន្ថែមថា ករណីខាងលើមន្ទីរសុខាភិបាលមិនបានធ្វើការស៊ើបអង្កេតទៅលើមូលហេតុនៃការទេ គឺទុកឱ្យអាជ្ញាធរជាអ្នកដំណើរការស៊ើបអង្កេត។ ក៏ប៉ុន្តែលោកបង្ហើបថា ករណីនេះទំនងជាពិបាកក្នុងការតាមដានរកមូលហេតុពិត ដោយសាតែពុំមានសំណាកនំបុ័ងណាមួយបន្សល់សម្រាប់យកទៅពិសោធន៍នោះទេ។
លោកបានពន្យល់តាមក្បួនវេជ្ជសាស្ត្រថា ករណីនេះទំនងជាមិនអាចបង្កដោយសារជាតិគីមីដែលគេសង្ស័យនៅលើផ្លែត្រសក់ស្រសៗនោះទេ គឺអាចបង្កឡើងដោយជ្រក់ដែលអ្នកធ្វើគ្មានអនាម័យ និងទុករយៈពេលយូរពេក ដែលបង្កឲ្យមេរោគវាយលុកយ៉ាងដូច្នេះ ។ លោកថាការពុលនេះមិនមែនពុលតែអ្នកចលរួមប្រជុំទេ សូម្បីតែអ្នកកែឆ្ច្នៃនំបុ័ងហ្នឹងក៏ពុលដែរ គឺមានចំនួន៥២នាក់៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ