ខេត្តបន្ទាយមានជ័យ ៖ អាជ្ញាធរស្រុកកាលពីព្រឹកថ្ងៃទី២៦ មីនា បានដឹកនាំសមត្ថកិច្ចចម្រុះចុះផ្សព្វផ្សាយសេចក្តីជូនដំណឹងដល់ប្រជាពលរដ្ឋមួយក្រុមដែលនាំគ្នាទៅសង់ខ្ទមចំនួន២៧៧ខ្នង តាមបែបអនាធិបតេយ្យ
ខេត្តបន្ទាយមានជ័យ ៖ អាជ្ញាធរស្រុកកាលពីព្រឹកថ្ងៃទី២៦ មីនា បានដឹកនាំសមត្ថកិច្ចចម្រុះចុះផ្សព្វផ្សាយសេចក្តីជូនដំណឹងដល់ប្រជាពលរដ្ឋមួយក្រុមដែលនាំគ្នាទៅសង់ខ្ទមចំនួន២៧៧ខ្នង តាមបែបអនាធិបតេយ្យ ជាខ្ទមហោះហើរ មិនដឹងពីពេលណាមកទេ ពាសពេញដីដែលមានម្ចាស់ ហើយត្រូវចោទប្រកាន់ថាជាការរំលោភយកដីកម្មសិទ្ធិរបស់គេ និងក្រុមហ៊ុននៅស្រុកម៉ាឡៃ ។
លោក អែម សុខា អភិបាលស្រុកម៉ាឡៃ និងជាប្រធានគណៈកម្មការដោះស្រាយវិវាទដីធ្លីស្រុកថ្លែងថា ដោយមានសេចក្តីជូនដំណឹងពីអភិបាលខេត្ត និងជាប្រធានគណៈកម្មការដោះស្រាយវិវាទដីធ្លីខេត្ត បានឱ្យគណៈកម្មការដោះស្រាយវិវាទដីធ្លីស្រុក ដឹកនាំកម្លាំងចម្រុះរួមមានកងរាជអាវុធហត្ថស្រុក និងនគរបាលស្រុក ព្រមទាំងមន្ត្រីជំនាញធ្វើការផ្សព្វផ្សាយសេចក្តីជូនដំណឹងដល់ជនមួយក្រុមដែលនាំគ្នាលួចសង់ខ្ទមបែបអនាធិបតេយ្យរំលោភលើដីបងប្អូនប្រជាពលរដ្ឋ១៤គ្រួសារ មានផ្ទៃដីចំនួន៦៤ហិកតា និងដីក្រុមហ៊ុនហៃសួរ មានចំនួន២.២០០ហិកតា នៅបឹងជង្រុក និងប្រាសាទក្រៅ ស្ថិតក្នុងភូមិអូរអំពិល ឃុំទួលពង្រ ស្រុកម៉ាឡៃ ។
លោកអភិបាលស្រុកបន្តថា ក្រោយពេលត្រួតពិនិត្យ ក្រុមគណៈកម្មការចម្រុះបានចុះរាប់ខ្ទម ដែលសង់រំលោភលើដីកម្មសិទ្ធិរបស់អ្នកដទៃ និងក្រុមហ៊ុន២កន្លែង មានចំនួន២៧៧ខ្នង ដែលមានអ្នកទៅសម្ងំរស់នៅប្រមាណ៥០% និង៥០%ទៀតគ្មានអ្នករស់នៅទេ គឺសង់ទុកចោលសម្រាប់ចាំដីដែលខ្លួនរំលោភ ។ មិនតែប៉ុណ្ណោះមានមនុស្សផ្សេងទៀតចំនួន១២០គ្រួសារ បានបន្តចូលទៅរំលោភយកដីដែលមានម្ចាស់ ដោយកំពុងដើរបោះតម្រុយចែកព្រំដីគ្នាបែបអនាធិបតេយ្យបានចំនួន៩០គ្រួសារ និងបានចុះដកតម្រុុយនោះចោលនៅចំណុចបឹងដំរី ។
អតីតមេបញ្ជាការវរលេខ៦៧ទ័ពខ្មែរក្រហម ស្រុកម៉ាឡៃ បានប្រាប់ថា អង្គភាពវរសេនាតូចលេខ៦៧ អតីតខ្មែរក្រហមមានជនពិការចុះក្នុងបញ្ជីចំនួន៤៩នាក់ ដែលរងគ្រោះដោយសារគ្រាប់មីន ហើយក្រោយពេលសមាហរណកម្ម រាជរដ្ឋាភិបាលបានបែងចែកដីរួចរាល់ហើយ ។
លោកថា ពេលនេះស្រាប់តែមានជនពិការចំនួន២៣០នាក់មិនដឹងមកពីណា បានមករំលោភយកដីប្រជាពលរដ្ឋនិងក្រុមហ៊ុន និងសង់ខ្ទមអនាធិបតេយ្យតាមរយៈមេខ្យល់ដែលធ្វើឱ្យអាជ្ញាធរប្រញាប់ដោះស្រាយ ហើយមិនដឹងថា តើខ្ទមហោះហើរទាំងនេះត្រូវដោះស្រាយដោយវិធីណានៅឡើយទេ ព្រោះពួកគេមកសម្ងំសង់ខ្ទមតាមចិត្ត អត់មានអាជ្ញាធរណារារាំងភ្លាមៗទេ ។ ទុកទាល់តែសង់ពេញដី ទើបលើកគ្នាមកប្រកាសឱ្យរុះរើ ។
ម្ចាស់ដីនិយាយថា បើមិនដោះស្រាយទេ អនាធិបតេយ្យក្នុងសង្គម និងផ្ទុះឡើងឥតឈប់ឈរ ។ ជាពិសេស មេខ្យល់ដែលនាំបង្កើតតំបន់អនាធិបតេយ្យនេះ ត្រូវតែកម្ចាត់ ។
តាមការកត់សម្គាល់ មកពីម្ចាស់ទឹកម្ចាស់ដីតំបន់នោះ សង្ស័យរដ្ឋអំណាចជើង១០ ។ ព្រោះពេលទើបចាប់ផ្តើមដំបូង ហេតុម៉េចមិនទៅបណ្តេញ ? ទុកដល់ពេញដីទើបកម្រើក បែបយ៉ាប់បន្តិចហើយ…
ចែករំលែកព័តមាននេះ