ខេត្តស្វាយរៀង ៖ កំលាំងនគរបាលការិយាល័យព្រហ្មទណ្ឌកំរិតស្រាលដែលដឹកនាំដោយលោក គៀង សុទ្ធរោ ព្រះរាជអាជ្ញារងអមសាលាដំបូងខេត្តស្វាយរៀង កាលពីល្ងាចថ្ងៃទី២៥ មីនា បានឆ្មក់ចូលទៅបង្ក្រាប
ខេត្តស្វាយរៀង ៖ កំលាំងនគរបាលការិយាល័យព្រហ្មទណ្ឌកំរិតស្រាលដែលដឹកនាំដោយលោក គៀង សុទ្ធរោ ព្រះរាជអាជ្ញារងអមសាលាដំបូងខេត្តស្វាយរៀង កាលពីល្ងាចថ្ងៃទី២៥ មីនា បានឆ្មក់ចូលទៅបង្ក្រាបទីតាំងរកស៊ីបិទតែមម៉ូតូមួយកន្លែងនៅចំណុចទល់មុខសួនច្បារតាឌី ដែលស្ថិតក្នុងភូមិរោងបន្លែ សង្កាត់ស្វាយរៀង ក្រុងស្វាយរៀង។
នៅក្នុងសកម្មភាពចុះបង្ក្រាបទីតាំងខាងលើនេះ សមត្ថកិច្ចដកហូតបានម៉ូតូចំនួន២គ្រឿង និងឃាត់ខ្លួនបុរសម្នាក់ដែលជាម្ចាស់ទីតាំង នាំទៅធ្វើការសាកសួរនៅការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលខេត្ត។
លោកវរសេនីយ៍ឯក កែវ សុថា នាយការិយាល័យព្រហ្មទណ្ឌកំរិតស្រាលបានឱ្យដឹងថា ការដកហូតម៉ូតូ និងនាំខ្លួនម្ចាស់ទីតាំងខាងលើនេះ គឺគ្រាន់តែដើម្បីធ្វើការសាកសួររកឯកសាររបស់ម៉ូតូទាំង២គ្រឿងនេះប៉ុណ្ណោះ ព្រោះសមត្ថកិច្ចសង្ស័យថា ទីតាំងខាងលើនេះពាក់ព័ន្ធនឹងការទទួលផលចោរកម្ម និងក្លែងលិខិតសាធារណៈ ហើយម៉ូតូទាំង២នេះអាចជាប់ពាក់ពន្ធ័នឹងរឿងខុសច្បាប់អ្វីមួយ។
ដោយឡែកបុរសដែលត្រូវសមត្ថកិច្ចឃាត់ខ្លួន និងក្រុមគ្រួសារបានអះអាងថា ម៉ូតូទាំង២គ្រឿងនេះ គេទិញស្របច្បាប់យកមកសំរាប់ជិះនៅក្នុងគ្រួសារប៉ុណ្ណោះ ហើយផ្ទះរបស់គេក៏មិនបានរកស៊ីទទួលបញ្ចាំ ឬទិញលក់របស់ខុសច្បាប់អីដែរ។
ទោះជាយ៉ាងណាក៏ដោយប្រជាពលរដ្ឋក្រុងស្វាយរៀងកំពុងរង់ចាំមើលក្រោយពីសមត្ថកិច្ចធ្វើការសាកសួរហើយ តើការពិតវាយ៉ាងណា ហើយទាំងម៉ូតូ និងមនុស្សគេនឹងចាត់ការបែបណា តែគេសង្ឃឹមថាសកម្មភាពចុះបង្ក្រាបបទល្មើសនេះវានឹងមិនមែនជាសកម្មភាពកៀបស៊ីនោះទេ៕
ចែករំលែកព័តមាននេះ