ខេត្តកំពង់ឆ្នាំង ៖ កាណូតបាឡាស្មាច់មានបំពាក់ដោយម៉ាស៊ីនមួយគ្រឿងដែលលិចបាត់ក្នុងទន្លេ កាលពីជាង១ខែមុនដោយគ្រោះថ្នាក់ចរាចរណ៏ផ្លូវទឹក ត្រូវបានប្រជានេសាទបង់សំណាញ់ជាប់ បង្កឱ្យភ្ញាក់ផ្អើលកាលពីវេលាម៉ោង៥ល្ងាច ថ្ងៃទី២៥ មីនា ២០១៥ នៅចំណុចក្បាលកោះចោរ ស្ថិតក្នុងភូមិកាម៉ាល់ ឃុំប្រឡាយមាស ស្រុកកំពង់លែង ហើយនៅព្រឹកថ្ងៃបន្ទាប់បានយកមកប្រគល់ឱ្យមន្ត្រីនគរបាលចរាចរណ៍ជើងទឹកនៃស្នងការដ្ឋាននគរបាលខេត្តដើម្បីទុកប្រគល់ជូនម្ចាស់ដើមវិញ។
លោក ធៀម សុង នាយនគរបាលចរាចរណ៍ជើងទឹករបស់ស្នងការដ្ឋាននគរបាលខេត្តបានមានប្រសាសន៏រំឮកពីប្រវត្តិកាណូតនោះថា កាលពីយប់ថ្ងៃទី៨ កុម្ភៈ ២០១៥ មានករណីកាណូតនេសាទជនជាតវៀតណាម បានបុកជាមួយកាណូតបាឡាស្មាច់ខាងលើនេះ បណ្តាលឱ្យអ្នកជិះលើកាណូតបាឡាស្មាច់ ឈ្មោះ អ៊ី ចម្រុង អាយុ១៧ឆ្នាំ ភេទប្រុស បានបែកក្បាលលង់ទឹកស្លាប់ ឈ្មោះ អ៊ូ តូរ៉ូ ភេទប្រុស អាយុ១៦ឆ្នាំ រងរបួស និងឈ្មោះ ម៉ែន ស្រីណាក់ អាយុ១៥ឆ្នាំ ភេទស្រីបានរងរបួស ។
ក្រោយកើតហេតុ សមត្ថកិច្ចបានកសាងសំណុំរឿងចាប់ជនជាតិវៀតណាមបញ្ជូនទៅតុលាការ ដែលពេលនេះកំពុងឃុំខ្លួននៅឡើយ ។ ចំណែកសពជនរងគ្រោះ២ថ្ងៃក្រោយពេលកើតហេតុ គឺនៅថ្ងៃទី១០ កុម្ភៈ ទើបគេប្រទះឃើញ ប៉ុន្តែកាណូតបាឡាស្មាច់ខាងលើនេះបានបាត់រហូត ម្ចាស់ខំព្យាយាមរក តែមិនឃើញទើបតែនៅរសៀលថ្ងៃទី២៥ មីនានេះ អ្នកនេសាទដែលជាជនជាតិខ្មែរអ៊ិស្លាមបានបង់សំណាញ់ទៅជាប់ ហើយបានស្រង់មកទាំងកាណូតទាំងម៉ាស៊ីននៅជាប់ជាមួយគ្នា ។
លោកនាយការិយាល័យបានបន្តថា ក្រោយពីបានទទួលកាណូតពីអ្នកនេសាទខ្មែរអ៊ិស្លាមខាងលើនេះហើយ លោកបានទូរស័ព្ទទៅម្ចាស់ឱ្យមកទទួលយកទៅជួសជុល ហើយត្រូវបានម្ចាស់កាណូតមានឈ្មោះ ឆាយ ចំរើន បាននិយាយថា គាត់នឹងមកទទួលយកទៅជួសជុលលាបថ្នាំថ្មីឡើងវិញ តែមិនយកទៅប្រើប្រាស់ទេ ពេលជួសជុលហើយនឹងយកដាក់វត្តប្រគេនព្រះសង្ឃសម្រាប់ប្រើប្រាស់ ដើម្បីឧទិ្ទសកុសលនេះជូនដល់សពដែលបានស្លាប់ដោយសារគ្រោះថ្នាក់ចរាចរណ៍ផ្លូវទឹកនេះផងដែរ៕
ចែករំលែកព័តមាននេះ