រាជធានីភ្នំពេញ ៖ ផ្ទុយពីម្ចាស់មូលនិធិមួយចំនួនដែលរំពឹងតែការអំពាវនាវរកជំនួយមួយមុខ អ្នកនាងសារីណា ភរិយាលោកស៊ុក សុភា អះអាងថា នាងមានគម្រោងបង្កើតកម្មវិធីតន្ត្រីសប្បុរសធម៌
រាជធានីភ្នំពេញ ៖ ផ្ទុយពីម្ចាស់មូលនិធិមួយចំនួនដែលរំពឹងតែការអំពាវនាវរកជំនួយមួយមុខ អ្នកនាងសារីណា ភរិយាលោកស៊ុក សុភា អះអាងថា នាងមានគម្រោងបង្កើតកម្មវិធីតន្ត្រីសប្បុរសធម៌ ឬកម្មវិធីរាត្រីសមោសរជាច្រើន ប្រមូលប្រាក់ជួយទុគ៌តជននៅកម្ពុជា។ អ្នកនាងសារីណា និងស្វាមីសន្យាប្រឹងប្រែង ដើម្បីធ្វើឱ្យមូលនិធិដែលបង្កើតឡើង ក្លាយជាប្រយោជន៍កាន់តែទូលាយ នាពេលខាងមុខ ។
ក្នុងបទសម្ភាសន៍ជាមួយភ្នាក់ងារកោះសន្ដិភាពពីប្រទេសអូស្ត្រាលី កាលពីពេលថ្មីៗនេះអ្នកនាងសារីណា ជាភរិយារបស់លោកស៊ុក សុភា បានអះអាងថា ក្នុងរយៈពេលប៉ុន្មានសប្ដាហ៍នេះនាងនិងស្វាមី បានទទួលការជ្រោមជ្រែងយ៉ាងពេញទំហឹង ពីសប្បុរសជនទាំងក្នុង និងក្រៅប្រទេស ដើម្បីប្រមូលប្រាក់ជួយដល់អ្នកសិល្បៈ៣គ្រួសារ និងទុគ៌តជនម្នាក់តាមហ្វេសប៊ុក ។ នាងទទួលប្រាក់គិតជាដុល្លារបានជិត៥ពាន់ដុល្លារ ដោយចាត់ចែងប្រគល់ឱ្យដល់ក្រុមគ្រួសារលោកស៊ីន ស៊ីសាមុត ជាង២ពាន់ដុល្លារ តារាចម្រៀងជើងចាស់ដែលរងគ្រោះថ្នាក់ចរាចរ លោកនូ ស៊ិប ចំនួន៥០០ដុល្លារ អ្នកអាយ៉ៃធ្លាក់ខ្លួនវង្វេងវង្វាន់លោកតាផ្លុង មឿក ចំនួន៥០០ដុល្លារ និងអ្នកបញ្ជាចរាចរណ៍ប្រចាំថ្ងៃ ដោយមិនមានបៀវត្សលោកហោ ម៉ៅ ដែលធ្លាក់ខ្លួនឈឺចំនួន១.១០០ដុល្លារ ។
អ្នកនាងសារីណា និយាយថា «ជាការណ៍ពិតខ្ញុំ និងស្វាមីទើបតែអំពាវនាវកាលពីថ្ងៃទី១៤ កុម្ភៈ ទេ ប៉ុន្តែយើងទទួលបានរហូតដល់ជាង៤ពាន់ដុល្លារអាមេរិក ហើយបើគិតជាប្រាក់អូស្ត្រាលីគឺច្រើនជាងនេះ ព្រោះភាគីអ្នកជួយមូលនិធិយើងគាត់ផ្ដល់ជាប្រាក់អូស្ត្រាលី» ។
អ្នកនាងសារីណា បានដាក់ឈ្មោះមូលនិធិរបស់ខ្លួនថា «SS Fundraising for Cambodia» ដែលមានន័យថា «មូលនិធិរៃអង្គាសប្រាក់របស់លោកស៊ុក សុភា និងអ្នកនាងសារីណា» ដើម្បីជួយដល់ទុគ៌តជននៅកម្ពុជា ។ អ្នកនាងសារីណា ស្នើឱ្យអ្នកលេងហ្វេសប៊ុក ហើយដឹងពីទុក្ខវេទនារបស់ទុគ៌តជនណាម្នាក់ សូមបង្ហោះរូបភាពចូលទំព័រហ្វេសប៊ុករបស់នាង និងស្នើឱ្យសប្បុរសជនដែលមានបំណងចង់ចែករំលែកប្រាក់ផ្ទាល់ខ្លួន សូមទាក់ទងនាងតាមរយៈហ្វេសប៊ុក Sarina Zuzanna AlNic ឬអាចទាក់ទងមកក្រុមការងាររបស់នាង ប្រចាំនៅស្រុកខ្មែរ តាមរយៈទូរសព្ទលេខ 089 25 36 36 ក៏បាន ដោយនាងនិងក្រុមការងារ ធានាប្រគល់ប្រាក់ជូនដល់ទុគ៌តជនមិនឱ្យបាត់បង់ប្រាក់របស់សប្បុរសជនមួយចំណែកណាឡើយ ។ នាងនឹងធ្វើឱ្យមានតុល្យភាពក្នុងការចាត់ចែងជំនួយ ដោយសារតែនាងនិងស្វាមី ក៏ដូចជាក្រុមការងារសហការប្រចាំនៅប្រទេសកម្ពុជា សុទ្ធតែបានរួមគ្នាធ្វើកិច្ចការនេះដោយស្ម័គ្រចិត្ត និងការលះបង់ដូចគ្នា ។ គោលបំណងនៃមូលនិធិនេះ គឺនាងឃើញក្រុមទុគ៌តជននៅកម្ពុជាបានទទួលការយកចិត្តទុកដាក់ពីសប្បុរសជនទាំងក្នុង និងក្រៅប្រទេស និងមានជីវភាពល្អមួយកម្រិត ។
អ្នកនាងសារីណានិងលោកស៊ុក សុភា ជាស្វាមី គ្រោងរៀបចំតន្ត្រីសប្បុរសធម៌ធំមួយនៅប្រទេសអូស្ត្រាលី បន្ទាប់ពីមើលឃើញថា មធ្យោបាយក្នុងការរៃអង្គាសប្រាក់ដែលបានធ្វើឡើង គឺមិនអាចអំពាវនាវទៅកាន់សប្បុរសជនយូរ អង្វែង ។ អ្នកនាងសារីណា និយាយថា «ខ្ញុំនិងបងភា គិតគ្នារួចហើយថា ត្រូវធ្វើយ៉ាងម៉េចដើម្បីប្រមូលប្រាក់បានជួយដល់អ្នកទីទ័លក្រទាំងនោះ បើកុំតែខ្ញុំសរសៃខ្ចី ហើយកូននៅតូចពេក គឺខ្ញុំនឹងធ្វើឱ្យខ្លាំងតែម្ដង ដើម្បីយកប្រាក់មកជួយអ្នកទុគ៌តជន ហើយកុំភ័យខ្ញុំ និងក្រុមការងារធ្វើបុណ្យ គឺមិនកិបកេងជំនួយទាំងនោះទេ ព្រោះយើងសុទ្ធតែធ្វើបញ្ជីឱ្យម្ចាស់ជំនួយបានឃើញ និងដាក់ឈ្មោះពួកគាត់ពេលយកទៅប្រគល់ឱ្យ» ។
បន្ទាប់ពីជោគជ័យ ប្រមូលប្រាក់បានជិត៥ពាន់ដុល្លារអាមេរិកក្នុងនោះជូនក្រុមគ្រួសារលោកស៊ីន ស៊ីសាមុត ជូនលោកហោ ម៉ៅ ជូនលោកនូ ស៊ិប និងជូនលោកតាផ្លុង មឿក មក អ្នកនាងសារីណា និង ក្រុមការងារបន្តអំពាវនាវស្វែងរកប្រាក់ជួយដល់ទុគ៌តជនមួយចំនួនទៀត ដោយស្នើឱ្យចូលមើលហ្វេសប៊ុក Sarina Zuzanna AlNic របស់នាង ដើម្បីជ្រាបពីសកម្មភាពដែលនាង និងស្វាមីបានធ្វើ ។
ក្រុមគ្រួសារលោកស៊ីន ស៊ីសាមុត លោកហោ ម៉ៅ លោកនូ ស៊ិប និងលោកតាផ្លុង មឿក បានថ្លែងអំណរគុណដល់ប្ដីប្រពន្ធលោកស៊ុក សុភា ដែលផ្ដើមបង្កើតឱ្យមានមូលនិធិនេះឡើង ។ ធៀបនឹងអ្នកសិល្បៈផ្សេងទៀត ដែលបានទៅរស់នៅប្រទេសក្រៅដូចគ្នា អ្នកនាងសារីណា និងលោកស៊ុក សុភា ត្រូវគេចាត់ទុកជាតារាដែលមានទឹកចិត្តសប្បុរសធម៌គួរឱ្យសរសើរ ។
ម្ចាស់មូលនិធិនាងសារីណា ថ្លែងថា ក្នុងពេលដ៏ខ្លីខាងមុខ អ្នកនាងនឹងស្វះស្វែងលើសកម្មភាពជួយជីកអណ្ដូងទឹកស្អាត ជួយបង្កើតមុខរបរឱ្យជនទុគ៌ត និងជួយសាងសង់ផ្ទះដល់អ្នកខ្វះខាតជាដើម ដើម្បីជួយឱ្យអ្នកក្រីក្រទាំងនោះ មានក្ដីសង្ឃឹមជាថ្មី ។ ដូច្នេះហើយទើបនាង សិក្សាពីការជួលហាងនៅប្រទេសអូស្ត្រាលី និងទាក់ទងតារាខ្មែរដែលទៅច្រៀងនៅទីនោះ ធ្វើតន្ត្រីសប្បុរសធម៌មួយដើម្បីប្រមូលប្រាក់ចាត់ចែងក្នុងកិច្ចការសប្បុរសធម៌នាពេល ឆាប់ៗខាងមុខ ៕
ចែករំលែកព័តមាននេះ