រាជធានីភ្នំពេញ ៖ បុរសម្នាក់ខ្យល់គរស្លាប់នៅក្នុងបន្ទប់របស់ខ្លួន បង្កឱ្យមានការភ្ញាក់ផ្អើល កាលពីវេលាម៉ោង០៥ និង៣០នាទីព្រឹកថ្ងៃទី០៣ មីនា ២០១៥ ស្ថិតនៅចំណុចផ្ទះលេខ៧៩៨ ក្នុងភូមិទ្រា៣ សង្កាត់បឹងទំពុន ខណ្ឌមានជ័យ ។
ប្រភពបានឱ្យដឹងថា បុរសរងគ្រោះត្រូវបានស្គាល់ឈ្មោះសៀង មិន អាយុ៣៤ឆ្នាំ ជាអ្នកកាប់ឆ្អឹងគោលក់ បច្ចុប្បន្នស្នាក់នៅទីតាំងកើតហេតុ ។
ប្រភពពីស្ត្រីជាបងស្រីបង្កើតបានរៀបរាប់ឱ្យដឹងថា នៅនៅយប់ថ្ងៃទី០២ ពួកគាត់ និងប្អូនប្រុសរងគ្រោះបានអង្គុយនិយាយគ្នាលេងនៅសំយ៉ាបមុខផ្ទះតាំងពីម៉ោង១០ រហូតដល់ម៉ោង១រំលងអធ្រាត្រឈានចូលថ្ងៃទី០៣ ទើបនាំគ្នាចូលសម្រាក ។ លុះវេលាព្រឹកឡើង ម៉ោង០៥ និង៣០នាទី រូបគាត់បានឡើងទៅគោះទ្វារបន្ទប់ ហៅឱ្យទៅដឹកឆ្អឹងគោ ប៉ុន្តែមិនឃើញប្អូនឆ្លើយតបបន្តិចសោះ ទើបរូប គាត់សម្រេចបើកទ្វារចូលទៅ ក៏ឃើញប្អូនប្រុសរបស់ខ្លួនរឹងដៃរឹងជើងអស់ទៅហើយ ។
ភ្លាមនោះ គាត់បានស្រែកឆោរឡោរឡើងបង្កឱ្យមានការភ្ញាក់ផ្អើលដល់ប្រជាពលរដ្ឋ និងអ្នកជិតខាងនាំគ្នាមកជួយអន្តរាគមន៍ យកប្រេងកូឡា និងថ្នាំផ្សេងៗ ដើម្បីលាបក្រែងអាចដឹងខ្លួនវិញ ប៉ុន្តែទោះបីជាយ៉ាងណា ប្អូនប្រុសគាត់បានស្លាប់បាត់ទៅហើយ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ