រាជធានីភ្នំពេញ ៖ ស្ត្រីម្នាក់ជាម្ចាស់ហាងថតចម្លងឌីស ដែលលួចធ្វើអាជីវកម្មគ្មានច្បាប់អនុញ្ញាត ត្រូវបានចៅក្រមស៊ើបសួរសាលាដំបូងរាជធានីភ្នំពេញសម្រេចចេញដីកាឃុំខ្លួនដាក់ពន្ធនាគារជាបណ្តោះអាសន្នកាលពីរសៀលថ្ងៃទី២ មីនា ២០១៥ ក្រោយពីតំណាងអយ្យការបានធ្វើការចោទជាផ្លូវការក្រោមបទថតចម្លងឌីសដោយគ្មានការអនុញ្ញាត ។
ស្ត្រីរូបនេះឈ្មោះ ខុម គឹមស៊ាន អាយុ៣៣ឆ្នាំ មានទីលំនៅខាងលិចវត្ដស្ទឹងមានជ័យ ផ្ទះលេខ៧៥ ភូមិថ្មី សង្កាត់ស្ទឹងមានជ័យ ខណ្ឌមានជ័យ បានត្រូវសមត្ថកិច្ចនគរបាលការិយាល័យកម្មសិទ្ធិបញ្ញានៃនាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃឃាត់ខ្លួន កាលពីរសៀលថ្ងៃទី២៧ កុម្ភៈ ២០១៥ ។
ដើមចមដែលនាំឲ្យមានការឃាត់ខ្លួននេះ បានកើតឡើងក្នុងខណៈពេលដែលសមត្ថកិច្ចនគរបាលទទួលបានព័ត៌មានពីសកម្មភាពនៃការលួចថតចម្លងឌីសយកទៅចែកចាយលក់នៅតាមទីផ្សារដោយគ្មានច្បាប់អនុញ្ញាតត្រឹមត្រូវ សមត្ថកិច្ចក៏បានដឹកនាំកម្លាំងចុះទៅឆែកឆេររកវត្ថុតាងដើម្បីដាក់បន្ទុកលើជនត្រូវចោទ ។ កិច្ចប្រតិបត្តិការនោះដឹកនាំ ដោយលោក មាស ចន្ទ័ពិសិដ្ឋ ព្រះរាជអាជ្ញារងអមសាលាដំបូងរាជធានីភ្នំពេញ ។
ក្នុងការឆែកឆេរនេះសមត្ថកិច្ចបានដកហូតឌីសចម្រៀង ឌីសរឿងភាគថៃមួយចំនួន ម៉ាស៊ីនកុំព្យូទ័រសម្រាប់ផលិតឌីសជាង៣០គ្រឿង និងម៉ាស៊ីនទឹកថ្នាំចំនួន៤គ្រឿង រួមទាំងវត្ថុតាងមួយចំនួនទៀត ។
ក្រោយពីឆែកឆេរសមត្ថកិច្ចបានឃាត់ខ្លួនស្ត្រីឈ្មោះ ខុម គឹមស៊ាន ម្ចាស់ហាងបញ្ជួនទៅនាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃដើម្បីធ្វើការសាកសួរ ។ បន្ទាប់ពីសាកសួរសមត្តកិច្ចបានកសាងសំណុំរឿងបញ្ជួនទៅកាន់សាលាដំបូងរាជធានីភ្នំពេញទើបតំណាងអយ្យការធ្វើការចោទប្រកាន់ជាផ្លូវការ និងបានចាត់បញ្ជួនបន្តទៅចៅក្រមស៊ើបសួរសម្រេចឃុំខ្លួនដាក់ពន្ធនាគារជាបណ្តោះអាសន្ន៕
ចែករំលែកព័តមាននេះ