ខេត្តកណ្តាល ៖ បុរសម្នាក់បានធ្វើអត្តឃាតខ្លួនឯង ដោយចង.កនឹងក្រម៉ា នៅលើដើមស្វាយ កាលពីម៉ោង៦ព្រឹក ថ្ងៃទី៣០ ខែមករា ឆ្នាំ២០១៥ នៅក្នុងដីឡូត៍មួយកន្លែង ស្ថិតក្នុងភូមិលើ ឃុំព្រែកអញ្ចាញ ស្រុកមុខកំពូល ខេត្តកណ្តាល ។ បុរសដែលចង.កសម្លាប់ខ្លួនមានឈ្មោះ គង់ គាង អាយុ៣៧ឆ្នាំ មុខរបរ កម្មករសំណង់ មានទីលំនៅ ភូមិស្វាយអាត់លើ ឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល ។
ប៉ូលីសស្រុកមុខកំពូលបានឱ្យដឹងថា នៅថ្ងៃទី២៩ ខែមករា វេលាម៉ោង៥ ល្ងាច ក្រោយពីសំរាកពីការងារធ្វើសំណង់ ជនរងគ្រោះបានទៅទិញត្រី នៅចំណុចកំពង់ដរស្វាយអាត់ ក្នុងភូមិកើតហេតុខាងលើ រហូតដល់ម៉ោង៦ល្ងាច ជនរងគ្រោះបានត្រឡប់មកវិញ ដោយមានយួរបេដុងដាក់ត្រីប្រហែល១០គីឡូក្រាមរួចហើយអង្គុយធ្វើត្រីសំរាប់ធ្វើប្រហុក ។ មួយសន្ទុះក្រោយមកក៍មានឈ្មោះអ៊ូ វ៉ាត ភេទស្រី មានទីលំនៅភូមិឃុំកើតហេតុខាងលើ មកជួយធ្វើត្រី រហូតដល់ម៉ោង៨ និង៣០នាទីយប់ ទើបធ្វើត្រីហើយ ។
ប៉ូលីសបានបន្តថា បន្ទាប់មកជនរងគ្រោះក៏បានចងអង្រឹងដេកនិយាយទូរស័ព្វ នៅក្រៅរោង ចំណែកឈ្មោះ ពេជ្រ លីន ដេកនៅក្នុងរោងធ្វើសំណង់ចម្ងាយពីជនរងគ្រោះប្រហែល៥ម៉ែត្រពីគ្នា ។ លុះដល់ព្រឹកថ្ងៃទី៣០ ខែមករា វេលាម៉ោង៦ ព្រឹក ឈ្មោះពេជ្រ លីន បានភ្ញាក់ដឹងខ្លួន ហើយបាត់ជនរងគ្រោះពីអង្រឹង ឃើញដូចនេះក៍បានដើររកជនរងគ្រោះ ស្រាប់តែឃើញជនរងគ្រោះចង.កសម្លាប់ខ្លួននឹងក្រម៉ាពណ៌សក្រហម ក្រឡាការ៉ូ នៅលើដើមស្វាយ ។ ភ្លាមៗនោះក៏បានរាយការណ៍ទៅសមត្ថកិច្ច ក្រោយមក សមត្ថកិច្ចធ្វើការពិនិត្យសាកសពរួច បានសន្និដ្ឋានថា ជនរងគ្រោះ បានចង.កសម្លាប់ខ្លួនដោយខ្លួនឯង ។ បច្ចុប្បន្នសពជនរងគ្រោះ ត្រូវបានក្រុមគ្រួសារយកទៅធ្វើបុណ្យតាមប្រពៃណីខ្មែរ ៕
ចែករំលែកព័តមាននេះ