ខេត្តបាត់ដំបង ៖ គណៈកម្មការត្រួតពិនិត្យលុបបំបាត់លើឧសថក្លែងក្លាយនិងសេវាសុខាភិបាលខុសច្បាប់ខេត្តបាត់ដំបងដើម្បីកាត់
បន្ថយភាពក្រីក្ររបស់ប្រជាពលរដ្ឋបានបង្កើតឡើងដោយមានស្ថាប័នតុលាការ ស្នងការនគរបាល អាវុធហត្ថ សុខាភិបាលនិងស្ថាប័នពាក់ព័ន្ឋជាច្រើនទៀតបានមកចូលរួមប្រជុំនៅក្នុងសាលាខេត្តបាត់ដំបងវេលារសៀលថ្ងៃទី២៩ ខែមករា ឆ្នាំ២០១៥ ក្រោមអធិតីភាពលោក ស៊ូ អារ៉ាហ្វាត់ អភិបាលរងខេត្តបាត់ដំបងនិងប្រធានអនុប្រធានមន្ទីរគ្រប់ទាំងអស់បានមកចូលរួមដើម្បីពិនិត្យវាយតម្លៃទប់ស្កាត់លើកស្ទួយវិស័យសុខាភិបាលដើម្បីសុខភាពដល់មហាជនទូទៅឲ្យទទួលបានភាពល្អប្រសើរឡើងវិញបន្ទាប់ពីមានករណីឆ្លងមេរោគអេដស៍នៅក្នុងភូមិឃុំរកា ស្រុកសង្កែ ខេត្តបាត់ដំបង ចំនួន២២៦នាក់ កន្លងមកថ្មីៗនេះ ។
លោក វឿង ប៊ុនរេត ប្រធានមន្ទីរសុខាភិបាលខេត្តបានអានសារាចរណែនាំនិងសេចក្តីសម្រេចចេញពីក្រសួងសុខាភិបាលដោយបង្កើតឲ្យមានគណះកម្មការនេះជាថ្មីទៀតបន្ថែមលើគណះកម្មការចាស់ដែលមានតាំងពីឆ្នាំ២០០០ដើម្បីផ្សព្វផ្សាយការពារលើកស្ទួយវិស័យសុខាភិបាលនិងចូលមកដល់ឆ្នាំ២០០៥ ក្រសួងចេញសេចក្តីសម្រេចឲ្យមានគណៈកម្មការចុះអង្កេតត្រួតពិនិត្យជាប្រចាំរហូតដល់ឆ្នាំ២០០៩ដោយមានសកម្មភាពនយោបាយឃោសនានិងបាតុកម្មនៅតាមតំបន់ផងនោះការចុះត្រួតពិនិត្យអង្កេតស្រាវជ្រាវក៏បានបន្ថយព្រោះចៀសវាងកុំឲ្យច្របូកច្របល់ក្នុងបញ្ហានយោបាយ ។
លោកបានបង្ហាញពីតួលេខក្នុងការគ្រប់គ្រងស្ថាប័នឯកជនដែលបានសុំច្បាប់បើកជាឱសថស្ថាន ឱសថស្ថានរងនិងមណ្ឌលព្យាបាលផ្សេងៗទៀតនៅក្នុងខេត្តបាត់ដំបងដែលមានច្បាប់ចេញដោយក្រសួងសុខាភិបាលក្នុងឆ្នាំ២០០៨ មាន១៣៦កន្លែង ក្នុងនោះគ្មានច្បាប់៨៦ កន្លែងត្រូវបានណែនាំ ក្នុងឆ្នាំ២០០៩មានកើនឡើងរហូតដល់១៥៦កន្លែង គ្មានច្បាប់ចំនួន១៨កន្លែងក្នុងឆ្នាំ២០១០កើនឡើង៣២៣កន្លែង គ្មានច្បាប់០៣កន្លែង ក្នុងឆ្នាំ២០១១កើនឡើង៣៩០កន្លែងគ្មានច្បាប់០១កន្លែង ក្នុងឆ្នាំ២០១២កើនឡើង៤៤៩កន្លែងបានចុះបញ្ជីទាំងអស់តែក្រោយៗមក ទៀតការបើកជាទ្រង់ទ្រាយតូចតាចលួចលាក់កើនឡើងសរុបឆ្នាំ២០១៣មានចំនួន៤៩៦កន្លែងនិងឆ្នាំ២០១៤មានការធ្លាក់ចុះមកនៅចំនួន៤៧៥កន្លែង ព្រោះមានការត្រួតពិនិត្យមើលការបើកគ្មានច្បាប់ត្រូវបានហាមឃាត់ ។ លោកបានបែងចែកមិនចំពោះតែឱសថស្ថាននិងឱសថស្ថានរងនិងកន្លែងទទួលបើកកាព្យាបាលជាឯកជននោះទេគឺបានត្រួតពិនិត្យមើលផ្ទះលក់ទំនិញគ្រប់មុខដែលមានទាំងថ្នាំពេទ្យផងដែរនោះពេលនេះមានការកើនឡើងដល់ទៅ៦៧៥កន្លែង ក្នុងតំបន់ធំៗតាមស្រុកនិងចុងកាត់មាត់ញកទៀតអាចកើនឡើងដល់ចំនួន១១៩៨កន្លែងកំពុងតែគ្រប់គ្រងបន្តពេលបច្ចុប្បន្នហើយគណកម្មការថ្មីនេះពិនិត្យនិងមានវិធានការដើម្បីវាយតម្លៃទប់ស្កាត់ជាបន្តទៀតពីព្រោះសារាចរនែនាំរបស់ក្រសួងសុខាភិបាលអាចបញ្ជូនអ្នកល្មើសច្បាប់ទៅដល់ស្ថាប័នតុលាការក្រោយពីមានកើតហេតុការណ៍ឆ្លងមេរោគអេដស៍នៅបាត់ដំបងនេះក្នុងនោះក៏ត្រូវពិនិត្យមើលផងដែរដែលមាននិស្សិតពេទ្យឆ្នាំថ្មីមួយចំនួនកំពុងយកសញ្ញាប័ត្រចេញពីសាលាថ្មីៗគ្មានបទពិសោធន៍គ្រប់គ្រាន់ហើយចុះមកសុំច្បាប់បើកធ្វើការព្យាបាលជាទូទៅតាមតំបន់មួយចំនួនផងដែរ ។
លោក ស៊ូ អារ៉ាហ្វាត់ អភិបាលរងខេត្តបានបញ្ជាក់អំពីចំណាប់អារម្មណ៍ការឆ្លងមេរោគអេដស៍នៅភូមិរកានេះកំពុងតែជះឥទ្ឋិពលចាប់អារម្មណ៍ដល់អន្តរជាតិដែលកំពុងរៀបចំជាជំនួយផ្សេងៗមកជួយដល់ប្រជាជនកម្ពុជាហើយលោកក៏សុំបញ្ជាក់ចំនួនតួលេខឲ្យបានច្បាស់លាស់ផងដែរចៀសវាងអ្នកដែលមានផ្ទុកមេរោគអេដស៍ហើយមិនបានទទួលការថែទាំឲ្យបានគ្រប់ៗគ្នាហើយពេលនេះក្រសួងសុខាភិបាលក៏បានប្រគល់អំណាចតួនាទីតាមកម្រិតឲ្យមកអាជ្ញាធរខេត្តគ្រប់គ្រងដោយផ្ទាល់មួយចំនួនផងដែរ ។
ចែករំលែកព័តមាននេះ