ខេត្តព្រៃវែង ៖ កសិករចំនួន២ភូមិនៅឃុំអ្នកលឿង ស្រុកពាមរក៌ ដែលប្រកបរបរដាំសណ្តែកក្រហមជាច្រើនឆ្នាំមកហើយនោះបានត្អូញត្អែថា ឆ្នាំនេះសណ្តែកក្រហមរបស់ពួកគាត់ទទួលបានទិន្នផល
ខេត្តព្រៃវែង ៖ កសិករចំនួន២ភូមិនៅឃុំអ្នកលឿង ស្រុកពាមរក៌ ដែលប្រកបរបរដាំសណ្តែកក្រហមជាច្រើនឆ្នាំមកហើយនោះបានត្អូញត្អែថា ឆ្នាំនេះសណ្តែកក្រហមរបស់ពួកគាត់ទទួលបានទិន្នផលតិចខ្លាំងណាស់ ដោយសារតែអាកាសធាតុមិនអំណោយផល ជាហេតុធ្វើឱ្យពួកគាត់ព្រួយបារម្ភ ព្រោះចំណូលពីការបង្កបង្កើនផលមួយនេះធ្លាក់ចុះខ្លាំងធ្វើឱ្យប៉ះពាល់ដល់ជីវភាពរបស់ពួកគាត់ ។
ស្ត្រីកសិករញ៉ែម យឿន បានរៀបរាប់ថា កសិករនៅភូមិស្ទឹងស្លូត និងភូមិស្ទឹងសន្តិភាព ពេលនេះកំពុងមមាញឹកប្រមូលផលសណ្តែក ។ គាត់ថា ឆ្នាំមុនអាកាសធាតុអំណោយផលធ្វើឱ្យសណ្តែកចេញផ្កាបានល្អ និងផ្តល់ទិន្នផលបានខ្ពស់ ដោយគិតជាធម្យមក្នុង១ហិកតា ទទួលផលបានជាង១តោន ។ ចំណែកតម្លៃនៅលើទីផ្សារក្នុង១គីឡូក្រាមថ្លៃ៤ពាន់រៀល ក្រោយពីទូទាត់ថ្លៃជី ថ្នាំបាញ់ និងថ្លៃកម្មកររួច នៅសល់ចំណេញជិត២លានរៀលដែរ គ្រាន់បានដោះស្រាយជីវភាពគ្រួសារ ។ ប៉ុន្តែឆ្នាំនេះសណ្តែករបស់ពួកគាត់មិនសូវបានផលទេ ដោយសារតែអាកាសធាតុមិនសូវអំណោយផល ឯតម្លៃសណ្តែកលើទីផ្សារក៏ចុះថោកទៀតគឺចុះពី៤.០០០រៀល មកនៅត្រឹម៣.៤០០រៀលប៉ុណ្ណោះ ធ្វើឱ្យពួកគាត់បារម្ភជាខ្លាំងពីជីវភាពប្រចាំថ្ងៃ ។
គាត់បញ្ជាក់ថា ដំណាំសណ្តែកក្រហមនេះ គេចាប់ផ្ដើមដាំក្រោយរដូវទឹកស្រក គឺនៅក្នុងខែវិច្ឆិកា ហើយអាចប្រមូលផលបាននៅក្នុងខែមករា គឺប្រើរយៈពេល៣ខែ ។ នៅពេលសណ្តែកទុំម្ចាស់ចម្ការត្រូវជួលកម្មករជាច្រើននាក់ដើរបេះដោយដៃ រួចទើបយកផ្លែទៅបោកយកគ្រាប់ ដោយអ្នកខ្លះបោកនឹងដៃ ហើយអ្នកខ្លះទៀតគេបោកនឹងម៉ាស៊ីនទៅតាមចំនួនតិចឬច្រើន។ ប៉ុន្តែបច្ចុប្បន្ននេះ ដោយសារតែបញ្ហាតម្លៃសណ្តែកនៅលើទីផ្សារប្រែប្រួលមិននឹងនរគួបផ្សំកត្តាអាកាសធាតុផងនោះ ធ្វើឱ្យកសិករមួយចំនួនបាក់ទឹកចិត្តលែងចង់ប្រកបរបរនេះទៀតហើយ ដោយពួកគាត់ងាកទៅរកដាំដំណាំផ្សេងៗជំនួសវិញ ៕
ចែករំលែកព័តមាននេះ