រាជធានីភ្នំពេញ ៖ ឆ្នាំ២០១៤កន្លងមក ជាឆ្នាំដែលមានលក្ខណៈល្អប្រសើរសម្រាប់វិស័យអចលនទ្រព្យ ជាពិសេសវិស័យដីធ្លី ហើយក៏ជាឆ្នាំដែលមានគម្រោងអភិវឌ្ឍន៍ច្រើនផងដែរសម្រាប់ប្រទេសកម្ពុជា ។
រាជធានីភ្នំពេញ ៖ ឆ្នាំ២០១៤កន្លងមក ជាឆ្នាំដែលមានលក្ខណៈល្អប្រសើរសម្រាប់វិស័យអចលនទ្រព្យ ជាពិសេសវិស័យដីធ្លី ហើយក៏ជាឆ្នាំដែលមានគម្រោងអភិវឌ្ឍន៍ច្រើនផងដែរសម្រាប់ប្រទេសកម្ពុជា ។ ទោះជាយ៉ាងណា នៅតាមតំបន់ផ្សេងៗក្នុងរាជធានី សន្ទុះនៃកំណើនទាំងសកម្មភាព និងតម្លៃ ក៏ខុសគ្នាៗទៅតាមតំបន់ដែលសក្ដានុពលនៃការវិនិយោគផងដែរ ។
លោកប៉ូ អ៊ាវគង់ ប្រធានគ្រប់គ្រងទូទៅក្រុមហ៊ុនអចលនទ្រព្យ អេស៊ារៀល អុីស្ទេត បានមានប្រសាសន៍ថា តម្លៃ និងសកម្មភាពដីធ្លីតាមតំបន់នានាក្នុងរាជធានី គឺមានសន្ទុះកើនឡើងមិនដូចគ្នាទេ ។ តំបន់ដែលមានសកម្មភាពវិនិយោគ និងតម្លៃខ្ពស់ជាងគេគឺខណ្ឌចំការមន ដែលនៅតែជាតំបន់មានចំណាប់អារម្មណ៍ខ្លាំងពីអ្នកវិនិយោគ មិនថាក្នុង និងក្រៅស្រុកទេ ។ តំបន់នេះ បើគិតជាទឹកប្រាក់វិនិយោគរាប់លានដុល្លារអាមេរិក ដែលវិនិយោគទៅលើលំនៅឋាន អគារខុនដូរ និងអគារពាណិជ្ជកម្មសំខាន់ៗជាដើម ។ បន្ទាប់ពីខណ្ឌចំការមន គឺខណ្ឌទួលគោក ក៏ជាតំបន់មួយមានសក្តានុពលល្អប្រសើរមួយដែរ ដែលគិតជាភាគរយកើនឡើងគួរឱ្យកត់សម្គាល់។ បើពិនិត្យមើលជាក់ស្ដែងតំបន់ទួលគោកនេះ មានការកើនឡើងទាំងលំនៅឋានទំនើបៗ និងអគារសំខាន់ៗដូចជា សាលារៀន មន្ទីរពេទ្យជាដើម។ ក្រៅពីនោះ តំបន់ដែលយើងអាចចាត់ទុកថាជាប់ចំណាត់លេខ៣ គឺខណ្ឌសែនសុខ ថ្វីដ្បិតតែជាតំបន់ថ្មីទើបអភិវឌ្ឍន៍ក្តី តែគម្រោងវិនិយោគមានច្រើន ដែលយើងអាចសង្កេតដោយជាក់ស្ដែងឃើញមានបុរីលំនៅឋាន ជាច្រើនបានកកើតនៅក្នុងតំបន់នោះ ។
លោកឌឹត ចណ្ណា ប្រធានគ្រប់គ្រងក្រុមហ៊ុន វី អិម ស៊ី (VMC) បានឱ្យដឹងដែរថា ឆ្នាំ២០១៤ ជាឆ្នាំមួយដែលធ្វើឱ្យវិស័យអចលនទ្រព្យមានការកើនឡើងខ្លាំង នេះបើនិយាយនៅក្នុងរាជធានីភ្នំពេញ ដោយមិនទាន់រាប់បញ្ចូលតំបន់ដីធ្លីនៅតាមបណ្ដាខេត្ត ដែលមិនទាន់កើនឡើងខ្លាំងប៉ុន្មាន ។
លោកបន្តថា តំបន់ដែលជាចំណាប់អារម្មណ៍របស់អ្នកវិនិយោគ ឬអាចថាតំបន់ដែលមានសកម្មភាពខ្លាំងប្រចាំឆ្នាំ២០១៤កន្លងមកនេះ ភាគច្រើនជាតំបន់ស្ថិតនៅកណ្ដាលក្រុង ។ ដោយសារសកម្មភាពនៃការវិនិយោគទៅលើតំបន់នៅកណ្ដាលក្រុងងើបឡើងយ៉ាងនេះហើយ ទើបបានជាតម្លៃដីធ្លី នៅតាមតំបន់ទាំងនោះ នៅតែរក្សាតម្លៃខ្ពស់ដដែល ជាក់ស្ដែងនៅខណ្ឌចំការមននេះជាដើម ។ ដូចយើងបានឃើញស្រាប់ថា តំបន់នៅកណ្ដាលក្រុង អគារធំៗខ្ពស់ បានងើបឡើងជាបន្តបន្ទាប់ ដែលមានខុនដូ អគារការិយាល័យ ផ្សារទំនើបជាដើម ។
លោក គីម ហ៊ាង ប្រធានក្រុមហ៊ុនខ្មែរ រៀលអុីស្ទេត បានមានប្រសាសន៍ដែរថា នៅតាមតំបន់នីមួយៗក្នុងរាជធានីភ្នំពេញមិនដូចគ្នាទេ តំបន់ខ្លះតម្លៃដីធ្លីកើនឡើងរហូតដល់៥០ភាគរយ ឯតំបន់ផ្សេងៗទៀតកើនប្រមាណតែជាង២០ភាគរយ ។ បើសរុបទូទាំងរាជធានីទាំងមូល ដីធ្លីកើនឡើងជាមធ្យមចន្លោះពី២០ភាគរយទៅ៤០ភាគរយ ។ តំបន់ដែលមានការកើនឡើងខ្ពស់ជាតំបន់ដែលសាងសង់លំនៅឋាន តំបន់ពាណិជ្ជកម្ម ជាក់ស្ដែងនៅបឹងកេងកង និងទន្លេបាសាក់ ។ តំបន់ទាំងនេះ ដីធ្លីកើនឡើងខ្លាំងប្រាកដមែន មានដីខ្លះនៅតំបន់បឹងកេងកងតម្លៃជាង៧ពាន់ដុល្លារអាមេរិកក្នុងមួយម៉ែត្រការ៉េ ។
លោកបន្ថែមថា ចំពោះការកើនឡើងនៃតម្លៃដីធ្លីនេះដែរ ក៏អាស្រ័យទៅលើការអភិវឌ្ឍរបស់រាជរដ្ឋាភិបាលដែរ ដូចជាគម្រោងអភិវឌ្ឍន៍ផ្លូវថ្នល់ ស្ពានអាកាស ទីក្រុងរណបជាដើម។ ជាក់ស្ដែងដីធ្លីនៅតំបន់ខណ្ឌជ្រោយចង្វា ពីមុនតម្លៃត្រឹមតែ៨០០ដុល្លារអាមេរិកក្នុងមួយម៉ែត្រការ៉េ តែពេលនេះវាឡើងរហូតដល់៣ពាន់ដុល្លារអាមេរិកក្នុងមួយម៉ែត្រការ៉េ តែតំបន់ផ្សេងទៀតនៅជាយក្រុង ហាក់ដូចជាមិនឡើងខ្លាំងប៉ុន្មានទេ ៕
ចែករំលែកព័តមាននេះ