រាជធានីភ្នំពេញ ៖ ក្នុងជំនួបពិភាក្សាជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី២៣ ធ្នូ នៅវិមានសន្តិភាពទីស្តីការនាយករដ្ឋមន្ត្រី លោកទ្រឿង តិនសាង ប្រធានរដ្ឋនៃសាធារណរដ្ឋសង្គមនិយមវៀតណាម មានប្រសាសន៍ថា ទាំងគណបក្ស ទាំងរដ្ឋាភិបាល និងប្រជាជនវៀតណាម សូមសម្តែងនូវការអបអរសាទរយ៉ាងជ្រាលជ្រៅបំផុតចំពោះរាជរដ្ឋាភិបាលកម្ពុជាដែលទទួលបាននូវការអភិវឌ្ឍលើគ្រប់វិស័យ ។
ការរីកចម្រើនទាំងនេះបានមកក្រោមព្រះរាជកិច្ចដឹកនាំរបស់ព្រះករុណាព្រះមហាក្សត្រកម្ពុជា-ព្រឹទ្ធសភា រដ្ឋសភា ពិសេសសម្តេចតេជោនាយករដ្ឋមន្ត្រី ដែលជាកម្លាំងស្នូលក្នុងការនាំមកនូវលទ្ធផលដ៏ធំធេងរបស់កម្ពុជា ក្នុងដំណាក់កាលបច្ចុប្បន្ន ។ លោកប្រធានរដ្ឋវៀតណាម បានមានប្រសាសន៍ចូលរួមអបអរសាទរចំពោះប្រទេសកម្ពុជា ដែលបានកែទម្រង់ជាវិជ្ជមាននៅក្នុងប្រទេសគឺជាកត្តានាំទៅដល់ប្រជាជនកម្ពុជាមានជំនឿទុកចិត្តក្នុងការជំរុញកម្ពុជាឆ្ពោះទៅកាន់ការអភិវឌ្ឍប្រកបដោយចីរភាព ។ លោកមានជំនឿយ៉ាងមុតមាំចំពោះគណបក្សប្រជាជនកម្ពុជា ដែលនឹងនាំកម្ពុជាឆ្ពោះទៅកាន់ការអភិវឌ្ឍកាន់តែខ្លាំងឡើងថែមទៀតនៅពេលអនាគត ។ ជាមួយនេះ សម្តែងនូវការរីករាយចំពោះទំនាក់ទំនងរវាងប្រទេសទាំងពីរកម្ពុជា-វៀតណាម ពិសេសលើការពង្រឹងនិងពង្រីកទំនាក់ទំនងរវាងប្រទេសទាំងពីរតាមទិសដៅដែលរដ្ឋាភិបាលទាំងពីរបានយល់ស្របគ្នា ។
លោក ទ្រឿង តិនសាង មានប្រសាសន៍បន្តថា កិច្ចសហប្រតិបត្តិការរវាងប្រទេសទាំងពីរបានផ្តល់នូវលក្ខណៈពិសេសដល់ការជំរុញកំណើនពាណិជ្ជកម្ម និងវិនិយោគ ពោលគឺបានទទួលនូវលទ្ធផលផ្លែផ្លា និងគួរជាទីមោទនភាពបំផុត ។ តាមរយៈនេះ លោកស្នើសុំឱ្យមានការយកចិត្តទុកដាក់ពីសំណាក់រដ្ឋាភិបាលនៃប្រទេសទាំងពីរ ដើម្បីផ្តល់នូវអនុសាសន៍យ៉ាងណាជំរុញពាណិជ្ជកម្មរវាងប្រទេសទាំងពីរឱ្យកើនដល់៥ពាន់លានដុល្លារនៅឆ្នាំ២០១៥ដូចបានកំណត់ទុក ។ សម្តេចតេជោ ហ៊ុន សែន មានប្រសាសន៍ថា ការរីកចម្រើនរបស់ប្រទេសវៀតណាមជះឥទ្ធិពលដល់ការអភិវឌ្ឍរបស់កម្ពុជា ពោលគឺបញ្ហាពាណិជ្ជកម្មប្រទេសទាំងពីរយើងត្រូវតែសម្រេចឱ្យបាន៥ពាន់លានដុល្លារនៅឆ្នាំ២០១៥។
សម្តេចតេជោនាយករដ្ឋមន្ត្រីមានប្រសាសន៍បន្តទៀតថា ប្រទេសទាំងពីរគប្បីជំរុញប្រជាពលរដ្ឋនៅតាមព្រំដែនធ្វើពាណិជ្ជកម្មរវាងគ្នានឹងគ្នា ដោយមិនមានដាក់របាំងខាងប្រើប្រាស់រូបិយប័ណ្ណរបស់ប្រទេសណាឡើយ។ ជាពិសេសទៅទៀតនោះ ដើម្បីសម្រេចបាននូវទំហំពាណិជ្ជកម្ម៥ពាន់លានដុល្លារនៅឆ្នាំ២០១៥ គប្បីលើកស្ទួយវិស័យទេសចរណ៍ ពោលគឺកាលពីឆ្នាំ២០១៣កម្ពុជាទទួលភ្ញៀវទេសចរវៀតណាមប្រមាណ៨៥ម៉ឺននាក់ ហើយការជំរុញកំណើនភ្ញៀវទេសចរវៀតណាមកកាន់កម្ពុជានោះ គឺជាកត្តាមួយចូលរួមចំណែកពង្រីកទំហំពាណិជ្ជកម្មរវាងប្រទេសទាំងពីរផងដែរ ។ សម្តេចតេជោនាយករដ្ឋមន្ត្រី ហ៊ុន សែន បានវាយតម្លៃខ្ពស់ចំពោះប្រទេសទាំងពីរដែលបានគាំទ្រគ្នាទាំងនៅក្នុងបញ្ហាតំបន់និងអន្តរជាតិ ៕
ចែករំលែកព័តមាននេះ