ខេត្តព្រះសីហនុ ៖ នៅខែវិច្ឆិកាកន្លងទៅនេះ បរិមាណទំនិញឆ្លងកាត់កំពង់ផែស្វយ័តក្រុងព្រះសីហនុ មិនសូវមានស្ទុះdខ្លាំងក្លានោះទេ ព្រោះជិតដាច់ឆ្នាំបែបនេះក្រុមហ៊ុននីមួយៗជាប់រវល់នឹងការបិទបញ្ជីក្រុមហ៊ុនរបស់ខ្លួន ។ នេះបើតាមការអះអាងរបស់លោកជា សំបាត់ ប្រធាននាយកដ្ឋានផែនការស្ថិតិកំពង់ផែស្វយ័តក្រុងព្រះសីហនុ ។
លោកបន្តថា ទំនិញឆ្លងកាត់កំពង់ផែនៅវិច្ឆិកា កន្លងមក នៅតែក្សាបានតួលេខប្រហាក់ប្រហែលកាលពីខែតុលាកន្លងមកដែរ ។ តួយ៉ាងគិតត្រឹម១១ខែក្នុងឆ្នាំ២០១៤នេះ បរិមាណទំនិញឆ្លងកាត់កំពង់ផែកើនឡើងប្រមាណ១៤,៦៩% បើធៀបនឹងរយៈពេលដូចគ្នាកាលពីឆ្នាំមុន ។
លោកបន្ថែមថា នៅខែធ្នូនេះ ទំនិញឆ្លងកាត់កំពង់ផែប្រហែលមិនអាចកើនឡើងលើសពីនេះទៀតទេ ព្រោះនៅចុងឆ្នាំក្រុមហ៊ុនភាគច្រើនត្រូវការបិទស្តុករបស់ខ្លួន តែវាក៏អាចមានការប្រែប្រួលដែរ ព្រោះនៅឆ្នាំកន្លងមកយើងក៏ធ្លាប់បានជួបប្រទះម្តងម្កាលដែរ ។
យោងតាមរបាយការណ៍ដែលផ្តល់ដោយកំពង់ផែស្វយ័តក្រុងព្រះសីហនុបានបង្ហាញថា គិតត្រឹម១១ខែដើមឆ្នាំ២០១៤ បរិមាណទំនិញឆ្លងកាត់កំពង់ផែមានចំនួន៣.១២៩.១៨២តោន បើធៀបនឹងរយៈពេលដូចគ្នាកាលពីឆ្នាំ២០១៣ មានចំនួន២.៧២៨.៣២២តោន ពោលគឺកើនឡើងប្រមាណ១៤,៦៩% ។ ក្នុងនោះទំនិញជាកុងតឺន័រកើនឡើង១៨,២៣% ទំនិញទូទៅកើនឡើង១១,២២% និងទំនិញជាប្រេងកើនឡើង៨,៧៣% ។ ដោយឡែកចំពោះមុខទំនិញនាំចូលដូចជាសម្ភារផ្សេងៗធ្លាក់ចុះប្រមាណ២៥,៤៨% គ្រឿងចក្រធ្លាក់ចុះ១៤,៦០% លោហៈធាតុធ្លាក់ចុះ៣២,៦៧% តែទំនិញជាធ្យូងថ្មបានកើនឡើង៧៤,៣៣%។ រីឯមុខទំនិញនាំចេញដូចជា ដំឡូងមីកើនឡើង១៣៤,៤៣% ទំនិញទូទៅធ្លាក់ចុះ៥៨,៣០% អង្ករដាក់ក្នុងកុងតឺន័រធ្លាក់ចុះ១០,៨៨% នេះបើធៀបរយៈពេល១១ខែដូចគ្នាកាលពីឆ្នាំ២០១៣ ៕
ចែករំលែកព័តមាននេះ