រាជធានីភ្នំពេញ ៖ អគ្គិភ័យដែលឆាបឆេះផ្ទះប្រជាពលរដ្ឋនៅក្នុងសង្កាត់ទួលសង្កែកាលពីវេលាម៉ោងជាង៦ល្ងាចថ្ងៃទី ២០ ធ្នូ ២០១៤ នេះមកដល់ពេលនេះបានរលត់ទៅវិញទាំងស្រុងហើយ។ គ្រោះអគ្គិភ័យនេះបានលេបត្របាក់ផ្ទះប្រជាពលរដ្ឋអស់ទាំងស្រុងចំនួន៣៣ខ្នង ដែលភាគច្រើនសាងសង់ឡើងពីឈើនិងដំបូលប្រក់សង្ក័សី ។
ក្នុងករណីគ្រោះអគ្គិភ័យនេះផងដែរស្នងការដ្ឋាននគរបាលរាជធានីភ្នំពេញបានបញ្ចេញរថយន្តពន្លត់អគ្គិភ័យចំនួន១៦គ្រឿង និងរថយន្តពន្លត់អគ្គិភ័យរបស់អង្គរភ្នំពេញមួយគ្រឿងដែលសរុបទាំងអស់១៧គ្រឿង បានចេញអន្តរាគមន៍បាញ់បង្រា្កបនូវអំណាចភ្លើងដ៍សន្ធោសន្ធៅ រហូតបានរលត់អស់ទាំងស្រុងទៅវិញ ។ បើទោះជារថយន្តពន្លត់អគ្គិភ័យជាច្រើនគ្រឿងមិនអាចជួយសង្រ្គោះផ្ទះប្រជាពលរដ្ឋរងគ្រោះខាងលើបាន ក៏ប៉ុន្តែការអន្តរាគមន៍នេះបានជួយបាញ់ការពារមិនឱ្យមានការឆាបឆេះឆ្លងរាលដាលទៅលំនៅឋានដ៍ទៃទៀត ដែលអាចនាំឱ្យមានគ្រោះមហន្តរាយកាន់តែខ្លាំង ។
បើតាមសាក្សីនៅនឹងកន្លែងកើតហេតុបានប្រាប់ឱ្យដឹងថា គ្រោះអគ្គិភ័យខាងលើបណ្តាលមកពីទុស្សេខ្សែភ្លើងដែលផ្តើមចេញពីផ្ទះប្រជាពលរដ្ឋឈ្មោះរិទ្ធី លក់ចាប់ហួយ ខណៈដែលម្ចាស់មិនបាននៅផ្ទះ។
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ