ខេត្តបាត់ដំបង ៖ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង និងលោក ច័ន្ទ សុផល អភិបាលខេត្ត រួមទាំងមន្ត្រីនានានៅក្នុងខេត្តផង បានចុះសួរសុខទុក្ខប្រជាពលរដ្ឋដែលជឿថា បានឆ្លងមេរោគអេដស៍ជាង១០០នាក់នៅភូមិរកា ឃុំរកា ស្រុកសង្កែ
ខេត្តបាត់ដំបង ៖ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង និងលោក ច័ន្ទ សុផល អភិបាលខេត្ត រួមទាំងមន្ត្រីនានានៅក្នុងខេត្តផង បានចុះសួរសុខទុក្ខប្រជាពលរដ្ឋដែលជឿថា បានឆ្លងមេរោគអេដស៍ជាង១០០នាក់នៅភូមិរកា ឃុំរកា ស្រុកសង្កែ កាលពីព្រឹកថ្ងៃទី១៨ ធ្នូ ។ ខណៈនោះដែរ កម្លាំងសមត្ថកិច្ចដឹកនាំដោយលោក នួន សាន ព្រះរាជអាជ្ញាអមសាលាដំបូងខេត្ត ក៏បានចុះឆែកឆេរលំនៅឋានលោកគ្រូពេទ្យឯកជនម្នាក់ ដែលសង្ស័យថា មានជាប់ពាក់ព័ន្ធនឹងសំណុំរឿងចម្លងមេរោគអេដស៍ដល់អ្នកភូមិនេះ ។
ក្នុងរយៈពេលខ្លីនៃការជួបសួរសុខទុក្ខប្រជាពលរដ្ឋជាង៣៥០នាក់ ដែលមានអ្នកឆ្លងមេរោគអេដស៍ជាង១០០នាក់ចូលរួមផង លោករដ្ឋមន្ត្រី ម៉ម ប៊ុនហេង បានបង្ហាញពីការយកចិត្តដាក់ចំពោះប្រជាពលរដ្ឋដែលរងគ្រោះដោយសារការឆ្លងមេរោគអេដស៍នេះ ។ លោករដ្ឋមន្ត្រីបានមានប្រសាសន៍ផ្ដល់កម្លាំងចិត្តដល់អ្នកផ្ទុកមេរោគអេដស៍ទាំងនោះឱ្យមានការតស៊ូ និងកុំឱ្យបាក់ទឹកចិត្តចំពោះជំងឺនេះ ។ លោកថ្លែងថា ក្រសួងសុខាភិបាល ក៏ដូចអាជ្ញាធរខេត្ត នឹងប្រឹងប្រែងគ្រប់បែបយ៉ាងឱ្យអស់លទ្ធភាព ទាំងកម្លាំងចិត្ត ទាំងកម្លាំងកាយក្នុងការជួយព្យាបាលជូនប្រជាពលរដ្ឋដោយមិនគិតកម្រៃ ។ លោករដ្ឋមន្ត្រីបានជំរុញឱ្យក្រុមគ្រូពេទ្យត្រូវប្រឹងប្រែងថែមទៀតទាំងការផ្ដល់ទំនុកចិត្ត ទាំងការផ្ដល់សេវាព្យាបាលជូនដល់ប្រជាពលរដ្ឋ ។
ជាមួយគ្នានេះដែរ លោករដ្ឋមន្ត្រីក្រសួងសុខាភិបាល និងលោក ច័ន្ទ សុផល អភិបាលខេត្ត ក៏បានចែកអំណោយជាសម្ភារប្រើប្រាស់មួយចំនួនជូនដល់អ្នកផ្ទុកមេរោគអេដស៍ និងប្រជាពលរដ្ឋដែលបានចូលរួមប្រមាណ៣៥០នាក់ផងដែរ ។ នៅវេលាម៉ោង១១ព្រឹកថ្ងៃដដែល ក្រោយពីបញ្ចប់ការសាកសួរសុខទុក្ខរបស់លោករដ្ឋមន្ត្រីក្រសួងសុខាភិបាល លោក នួន សាន ព្រះរាជអាជ្ញាអមសាលាដំបូងខេត្ត លោកឧត្តមសេនីយ៍ត្រី ស ថេត ស្នងការនគរបាលខេត្ត និងលោកឧត្តមសេនីយ៍ត្រី ទិត្យ ប៊ុណ្ណា អនុប្រធានាយកដ្ឋានបច្ចេកទេសវិទ្យាសាស្ត្រក្រសួងមហាផ្ទៃ បានដឹកនាំកម្លាំងសមត្ថកិច្ចជាច្រើននាក់ចុះឆែកឆេរលំនៅឋានលោកគ្រូពេទ្យឯកជន ឈ្មោះយ៉ែម ជ្រិន នៅភូមិរកា ឃុំរកា ស្រុកសង្កែភ្លាមៗដែរ ដើម្បីស្វែងរកវត្ថុតាងនានាដែលពាក់ព័ន្ធ ខណៈគ្រូពេទ្យរូបនេះត្រូវបានសមត្ថកិច្ចឃាត់ខ្លួនជាស្រេចនៅស្នងការដ្ឋាននគរបាលខេត្ត បន្ទាប់ពីនាំខ្លួនទៅសួរនាំកាលពីល្ងាចថ្ងៃទី១៧ ធ្នូ ។
លោក ជេត វណ្ណនី ស្នងការរងនគរបាលខេត្ត ឱ្យដឹងថា ការចុះឆែកឆេរផ្ទះគ្រូពេទ្យឯកជនឈ្មោះ យ៉ែម ជ្រិន អាយុ៥៥ឆ្នាំនេះ ធ្វើឡើងដោយកម្លាំងនគរបាលនាយកដ្ឋានបច្ចេកវិទ្យាសាស្ត្រ ក្រសួងមហាផ្ទៃ កម្លាំងនគរបាលបច្ចេកទេសស្នងការដ្ឋានខេត្ត និងមន្ត្រីមន្ទីរសុខាភិបាលខេត្ត និងមានកិច្ចសហការពីក្រុមអង្គការ CPU ផងដែរ ។ លោកស្នងការរងថ្លែងថា មានតម្រុយ និងអំណះអំណាងជាច្រើនដែលនាំឱ្យមានការសង្ស័យទៅលើសកម្មភាពមិនប្រក្រតីក្នុងការព្យាបាលអ្នកជំងឺរបស់គ្រូពេទ្យរូបនេះ ។ លោកគ្រូពេទ្យឯកជន យ៉ែម ជ្រិន ត្រូវគេសង្ស័យថា ប្រើប្រាស់សម្ភារពេទ្យដដែលៗដើម្បីព្យាបាលអ្នកជំងឺជាច្រើននាក់ ជាហេតុនាំឱ្យមានការឆ្លងរាលដាលនូវមេរោគអេដស៍ដ៏កាចសាហាវដល់ប្រជាពលរដ្ឋនៅក្នុងភូមិ ប៉ុន្តែលោកមិនទាន់ដឹងថា នេះជាការពិតឬបែបណាទេ ព្រោះជាការងារបច្ចេកទេសរបស់គ្រូពេទ្យ និងមន្ត្រីជំនាញ បុ៉ន្តែគ្រូពេទ្យឯកជន យ៉ែម ជ្រិន កំពុងសួរនាំនៅស្នងការដ្ឋានខេត្តហើយ ។
លោកគ្រូពេទ្យ យ៉ែម ជ្រិន បានទទួលរងនូវការថ្កោលទោសយ៉ាងខ្លាំងនៅព្រឹកថ្ងៃទី១៨ធ្នូ ពីសំណាក់ជនរងគ្រោះដែលបានឆ្លងជំងឺអេដស៍។ ពួកគាត់ចោទប្រកាន់ត្រង់ៗទៅលើគ្រូពេទ្យ យ៉ែម ជ្រិន ថា ជាអ្នកចម្លងមេរោគអេដស៍ដល់ពួកគាត់ តាមរយៈការប្រើប្រាស់ម្ជុលចាក់ថ្នាំច្របូកច្របល់។ អ្នកផ្ទុកមេរោគអេដស៍ជាច្រើននាក់ សុទ្ធតែបានលើកហេតុផលដូចៗគ្នាអំពីសកម្មភាពចាក់ថ្នាំរបស់លោកគ្រូពេទ្យរូបនេះ ។ ពួកគាត់និយាយថា គ្រូពេទ្យនេះបានប្រើម្ជុល ឬខ្សែសេរ៉ូមដដែលៗចាក់ឱ្យអ្នកជំងឺម្ដងម្នាក់ៗ ផ្លាស់ប្ដូរគ្នាក្នុងពេលតែមួយ ជាហេតុនាំឱ្យមានការឆ្លងមេរោគអេដស៍ដល់មនុស្សពេញភូមិបែបនេះ។ អ្នកស្រី ក្រង់ លឿន អាយុ៤១ឆ្នាំ បានផ្ដល់បទសម្ភាសន៍ជាមួយកោះសន្តិភាពនៅព្រឹកថ្ងៃទី១៨ ធ្នូថា កូនស្រីគាត់អាយុ៩ឆ្នាំម្នាក់បានឆ្លងមេរោគអេដស៍ដែរ ។ កូនស្រីគាត់ធ្លាប់កើតជំងឺគ្រុនឈាមច្រើនលើកច្រើនសា ដែលគ្រូពេទ្យជ្រិន ជាអ្នកចាក់ថ្នាំ និងព្យូរសេរ៉ូមព្យាបាលឱ្យ បុ៉ន្តែគាត់មិនដែលចាប់អារម្មណ៍អំពីការប្រើប្រាស់ម្ជុលចាក់ថ្នាំទេ ។ មានថ្ងៃមួយ អ្នកស្រីបានឃើញលោកគ្រូពេទ្យជ្រិន ដកខ្សែសេរ៉ូមពីអ្នកជំងឺម្នាក់ភ្លាមៗ មកចាក់បន្តឱ្យកូនស្រីគាត់ ដែលមានជាប់ឈាមនៅគល់ម្ជុលផង តែអ្នកស្រីមិនបានសួរនាំទេ ព្រោះសំអាងថា គាត់ជាគ្រូពេទ្យ ។
មកដល់ពេលនេះ ស្រាប់តែកូនស្រីគាត់មានផ្ទុកមេរោគអេដស៍ ទើបអ្នកស្រីចាប់អារម្មណ៍ទៅលើរឿងនេះ ។ ដោយឡែក លោក វិន បិត អនុប្រធានភូមិរកា បានប្រាប់កោះសន្តិភាពដែរថា ក្រោយពេលផ្ទុះជំងឺអេដស៍នេះបានប៉ុន្មានថ្ងៃ លោកគ្រូពេទ្យ យ៉ែម ជ្រិន បានគេចខ្លួនបាត់ពីមូលដ្ឋានដោយគ្មានដំណឹង ។ គ្រានោះគាត់បានដើរសួរនាំព័ត៌មានពីប្រជាពលរដ្ឋក្នុងភូមិជាច្រើននាក់ពាក់ព័ន្ធនឹងលោកគ្រូពេទ្យជ្រិន ។ លោកវិន បិត បញ្ជាក់ថា អ្នកភូមិជាច្រើននាក់សុទ្ធតែអះអាងដូចការលើកឡើងរបស់ស្ត្រីខាងលើនេះដែរ ។ តាមចម្លើយរបស់អ្នកជំងឺភាគច្រើនប្រាប់ថា គ្រូពេទ្យជ្រិន បានប្រើសឺរាំងចាក់ថ្នាំរួមគ្នា ដោយសារមិនចង់ចំណាយប្រាក់ទិញសម្ភារពេទ្យច្រើន បុ៉ន្តែគាត់មិនទាន់ដឹងថា ចម្លើយនេះជាការពិតឬយ៉ាងណាទេ ព្រោះនេះគ្រាន់តែជាការអះអាងរបស់ប្រជាពលរដ្ឋនៅក្នុងភូមិតែប៉ុណ្ណោះ ។
ជុំវិញការឆែកឆេរផ្ទះលោកគ្រូពេទ្យ យ៉ែម ជ្រិន ឯណោះវិញ គេនៅមិនទាន់ដឹងថា តើសមត្ថកិច្ច និងមន្ត្រីជំនាញរកឃើញអ្វីខ្លះដែលជាភស្ដុតាងសម្រាប់ដាក់បន្ទុកទេ ។ បើតាមលោកជេត វណ្ណនី ស្នងការរងនគរបាលខេត្ត ដែលកំពុងចុះពិនិត្យជាមួយកម្លាំងជំនាញដែរឱ្យដឹងថា សមត្ថកិច្ចជំនាញ និងមន្ត្រីសុខាភិបាលកំពុងត្រួតពិនិត្យវត្ថុតាងជាច្រើនដែលនៅរាយប៉ាយពាសពេញដីទាំងនៅក្នុងផ្ទះ និងនៅក្រៅផ្ទះគ្រូពេទ្យរូបនេះ ។ ក្នុងនោះក៏គេបានប្រទះឃើញកន្លែងដុតបំផ្លាញកាកសំណល់សម្ភារពេទ្យផងដែរ ដែលគេសង្ស័យថា កូនប្រសាគ្រូពេទ្យនោះជាអ្នកដុតចោលកាលពីថ្ងៃទី១៧ ធ្នូ ពេលដឹងថា ឪពុកខ្លួនមានបញ្ហា ។ លោកបន្តថា មន្ត្រីជំនាញកំពុងតែប្រមូលយកវត្ថុតាងទាំងនោះទៅរក្សាទុកដើម្បីពិសោធន៍ បុ៉ន្តែនេះជាជំនាញរបស់ក្រុមបច្ចេកទេសពេទ្យសុទ្ធសាទក្នុងការស្វែងរកវត្ថុតាងទាំងនេះ ។
បើតាមប្រភពពីគ្រូពេទ្យបញ្ជាក់ថា ការចុះត្រួតពិនិត្យ និងរកវត្ថុតាងនានានៅក្នុងផ្ទះលោកគ្រូពេទ្យឯកជននោះ នៅមិនទាន់អាចវាយតម្លៃបានថា តើវត្ថុតាងអ្វីខ្លះដែលជាប់ពាក់ព័ន្ធ ហើយវត្ថុតាងណាខ្លះមិនពាក់ព័ន្ធ ។ ពេលនេះក្រុមបច្ចេកទេសគ្រាន់តែប្រមូលយកទៅរក្សាទុកជាបណ្ដោះអាសន្ន ដើម្បីរង់ចាំពិសោធន៍ស្វែងរកការពិតបុ៉ណ្ណោះ ៕
ចែករំលែកព័តមាននេះ