រាជធានីភ្នំពេញ ៖ យុវជន៣នាក់ជិះម៉ូតូឌុបគ្នាតាមផ្លូវត្រូវយុវជន២នាក់ទៀតជិះម៉ូតូដេញតាមវាយនិងបានចោទថាជាចោរឆក់កាបូបពីរនារីម្នាក់ បង្កឱ្យមានការភ្ញាក់ផ្អើលដល់សមត្ថកិច្ចចេញអន្តរាគមន៍ឃាត់ខ្លួនទាំង៥នាក់យកទៅសួរនាំ ។ ហេតុការណ៍នេះកើតឡើងកាលពីវេលាម៉ោង១១ យប់ ថ្ងៃទី១៨ ធ្នូ ២០១៤ នៅចំណុចមុខផ្ទះសំណាក់ទឹកថ្លា តាមបណ្តោយមហាវិថីសហព័ន្ធរុស្ស៊ី ស្ថិតក្នុងសង្កាត់ទឹកថ្លា ខណ្ឌសែសុខ ។
យុវជន៣នាក់ដែលគេចោទថាជាចោរឆក់កាបូបទី១.ឈ្មោះ គង់ ប៉ូឡូ អាយុ១៨ឆ្នាំ ជាសិស្ស ,ទី២.ឈ្មោះ ប៊ុន ណា អាយុ១៧ឆ្នាំ ជាអ្នកសំអាតអនាម័យ និង ទី៣.ឈ្មោះ សុខ ចិត្ត អាយុ១៨ឆ្នាំ ស្នាក់នៅសង្កាត់កាកាប ខណ្ឌពោធិ៍សែនជ័យ ។ ដោយឡែកយុវជនពីរនាក់ ដែលចោទគេទី១.ឈ្មោះ ពេជ្រ សត្យា អាយុ២១ឆ្នាំ និងទី២.ឈ្មោះ ចាន់ តារា អាយុ១៩ឆ្នាំ ។
យោងតាមប្រភពព័ត៌មានពីក្រុមយុវជន៣នាក់ដែលត្រូវគេចោទប្រកាន់ថាជាចោរឆក់កាបូបបានឱ្យ អ្នកយកព័ត៌មានដឹងថា នៅមុនពេលកើតហេតុយុវជន៣នាក់ខាងលើបានជិះម៉ូតូហុងដាឌ្រីមសេ១២៥ ពណ៌ខ្មៅ មួយគ្រឿង ពាក់ស្លាកលេខភ្នំពេញ1BF-3687 ដោយធ្វើដំណើរត្រឡប់មកពីលេងនៅខេត្ត ដោយបានបើកម៉ូតូឌុបគ្នាតាមផ្លូវជាតិលេខ៣ រហូតមកដល់រង្វង់មូលចោមចៅ ក៏ត្រូវបានយុវជនពីរនាក់ផ្សេងទៀតជិះម៉ូតូមួយគ្រឿងឌុបគ្នា បានបើកដេញវាយយុវជន៣នាក់នោះតាមមហាវិថីសហព័ន្ធរុស្ស៊ី និងបានចោទថាយុវជនទាំង៣នាក់ជាចោរឆក់កាបូបពីនារីម្នាក់ខណៈមកដល់ចំណុចកើតហេតុយុវជន៣នាក់បានឈប់ម៉ូតូរត់ឱ្យគេជួយ ។
ដោយឡែកបើតាមយុវជនពីរនាក់ដែលជិះម៉ូតូដេញតាមយុវជន៣នាក់នោះបានឱ្យដឹងថា នៅមុនពេលកើតហេតុពួកគេបានឃើញយុវជន៣នាក់ខាងលើជិះម៉ូតូមួយគ្រឿងឌុបគ្នា ហើយបានធ្វើសកម្មភាពឆក់កាបូបពីនារីម្នាក់ ឃើញដូច្នេះយុវជនទាំងពីរនាក់ក៏បានជិះម៉ូតូដេញតាមរហូត និងស្រែកថាចោរឆក់កាបូបដើម្បីឱ្យគេចេញមកជួយចាប់យុវជនទាំង៣នាក់ខាងលើនេះ ។
ក្នុងហេតុការណ៍ខាងលើនេះបានបង្កឱ្យមានការភ្ញាក់ផ្អើលដល់សមត្ថកិច្ចមូលដ្ឋានចេញមកពិនិត្យនិងធ្វើការអន្តរាគមន៍ដោយជំហានដំបូងសមត្ថកិច្ចបានធ្វើការឃាត់ខ្លួនយុវជនទាំង៥នាក់ខាងលើបញ្ជូនទៅកាន់ប៉ុស្តិ៍នគរបាលរដ្ឋបាលទឹកថ្លាដើម្បីធ្វើការសួរនាំថាជាករណីអ្វីឱ្យពិតប្រាកដ ជាករណីឆក់កាបូប ឬជាករណីទំនាស់ដេញវាយគ្នា ។
ចែករំលែកព័តមាននេះ