ខេត្តកំពង់ឆ្នាំង ៖ ស្ត្រីម្នាក់បានមកទ្រហោយំរៀបរាប់ប្រាប់ភ្នាក់ងារកោះសន្តិភាពដើម្បីអោយជួយដល់កូនស្រីគាត់ផង ព្រោះគាត់គ្មានប្រាក់កាក់សម្រាប់រកកូនស្រីដែលបានបាត់ចេញពីផ្ទះដោយការចាញ់បោកគេនោះទេ ណាមួយប្តីបានគម្រាមថា និងលែងលះគ្នាបើសិនគាត់រកកូនស្រីមិនឃើញទេនោះ។ គាត់បានប្រាប់ថា កូនគាត់បានបាត់ចេញពីផ្ទះចំនួន២០ថ្ងៃហើយ សង្ស័យចាញ់បោកគេយកទៅលក់ ។
ស្ត្រីជាម្តាយឈ្មោះលាវ ពៅ អាយុ៤៤ឆ្នាំ មានទីលំនៅភូមិកំពង់អូស សង្កាត់ផ្សារឆ្នាំង ក្រុងកំពង់ឆ្នាំង បានរៀបរាប់ថា កាលពីថ្ងៃទី០៨ ខែវិច្ឆិកា ឆ្នាំ២០១៤ មានយុវជនម្នាក់នៅក្នុងភូមិជាមួយគ្នាបបួលទៅធ្វើការនៅភ្នំពេញ ហើយក៏បានបាត់ដំណឹងឈឹងរយៈពេល២០ថ្ងៃហើយ ពុំអាចទំនាកទំនងគ្នាតាមទូរស័ព្ទបានឡើយ ធ្វើអោយគាត់មានការព្រួយបារម្មណ៏ជាខ្លាំង ។
ស្ត្រីរូបនោះបានបន្តថា គាត់មានប្តីឈ្មោះឈឺន នៅ អាយុ៤៨ឆ្នាំ ប្រកបរបរនេសាទត្រី ពួកគាត់មានកូន៥នាក់ កូនស្រីរងគ្រោះមានឈ្មោះ ឈឺន ឆដា អាយុ១៨ឆ្នាំ ជាកម្មការិនីធ្វើទឹកសុទ្ធអោយសិប្បកម្មមួយកន្លែង នៅក្នុងក្រុងកំពង់ឆ្នាំង ។ កាលពីថ្ងៃទី០៨ ខែវិច្ឆិកា ឆ្នាំ២០១៤ យុវជនម្នាក់ឈ្មោះ ឡាំ អាយុ ប្រមាណ១៨ឆ្នាំ បានលួងលោមបបួលកូនស្រីរបស់គាត់ថា បើព្រមទៅធ្វើការនៅក្រុងភ្នំពេញ គេមានកន្លែងមួយគេអោយប្រាក់ខែ២០០ដុល្លារ ។ដោយសារជីវភាពក្រុមគ្រួសារក្រីក្រ ឪពុកម្តាយជួលផ្ទះគេនៅ ណាមួយឈ្មោះឡាំ នេះជាអ្នកភូមិជាមួយគ្នាផង គាត់ជាម្តាយក៏បានយល់ព្រមអោយ ឈ្មោះឡាំ នាំកូនស្រីទៅរកការងារធ្វើនៅភ្នំពេញ ។
ពេលទៅធ្វើការក្នុងរយះពេល៥ថ្ងៃដំបូង គាត់បានទូរស័ព្ទទៅកូនស្រីគាត់ តែឈ្មោះឡាំ ជាអ្នកលើទូរសព្ទ័ជំនួសកូនស្រីគាត់ គាត់មិនបានជួបផ្ទាល់មាត់កូនស្រីគាត់ឡើយ ដោយគ្រាន់តែដឹងតាមកូនរយៈឈ្មោះ ឡាំ ថាកូនស្រីគាត់សុខសប្បាយជាធម្មតាទេ ហើយទូរស័ព្ទទៅលើកណា ក៏ជួបតែឈ្មោះឡាំ ដែរ ។ ក្រោយមកក៏បាត់ដំណឹងឈឹងនិងទូរសព្ទ័លែងចូលតែម្តង ។
ប្រភពដដែលបានបន្តថា នៅម៉ោង៣និង៣០នាទីល្ងាច ថ្ងៃទី២៧ ខែវិច្ឆិកា ឆ្នាំ២០១៤ គាត់បានទូរសព្ទ័ចូល ទូរស័ព្ទរបស់កូនគាត់ម្តងទៀត ដោយត្រូវបុរសម្នាក់លើកនិយាយថា គាត់ឈ្មោះ ម៉ាក់ ជាបងប្រុសរបស់ឈ្មោះ ឡាំ ហើយបាននិយាយទៀតថា នៅថ្ងៃទី០៨ វិច្ឆិកា គាត់( ឈ្មោះ ម៉ាក់ ) បានទៅ ទទួលយកនារីឈ្មោះ ឈឺន ឆដា ពីបេនឡានសូរិយាក្រុងភ្នំពេញមែន ប៉ុន្តែនាងនៅបានតែ២ថ្ងៃទេ ក៏បានវិលត្រឡប់ទៅផ្ទះវិញហើយ ។
ស្ត្រីជាម្តាយនារីរងគ្រោះបាននិយាយទាំងទឹកភ្នែករហាមថា គាត់សង្ស័យថា កូនស្រីគាត់ត្រូវគេបោកយកទៅលក់នៅកន្លែងណាមួយ ទើបនាងមិនអាចទូរសព្ទ័មកប្រាប់ឪពុកម្តាយបាន ។ ចំណែកក្រុមគ្រួសារគាត់ក្រីក្រណាស់ គ្មានលុយកាក់ប្តឹងផ្តល់សមត្ថកិច្ចអោយជួយរកកូនគាត់បានទេ ហេតុនេះសំណូមពរ ដល់សារព័ត៌មានកោះសន្តិភាព មេត្តាជួយផ្សាយព័ត៌មានរកកូនអោយគាត់ផង ។ គាត់បានអំពាវនាវដល់អាជា្ញធរគ្រប់ទីកន្លែង បើសិនបានឃើញនារីដូចមានក្នុងរូបថតនេះ សូមមេត្តាជួយផ្តល់ដំណឹងអោយគាត់ផង ឬបើកូនស្រីបានទទួលដំណឹងនេះ សូមកូនទូរសព្ទ័មកអោយអ្នកផ្ទះផងដើម្បីកុំអោយមានការព្រួយបារម្មណ៏ ។
នៅព្រឹកថ្ងៃទី២៨ ខែវិច្ឆិកា ភ្នាក់ងារកោះសន្តិភាពប្រចាំខេត្តកំពង់ឆ្នាំងបានរាយការណ៏ករណីខាងលើនេះ ជូនលោកឧត្តមសេនីយ៏ត្រី ប្រាក់ វុឌ្ឍី ស្នងការនគរបាលខេត្ត ដើម្បីអោយជួយអន្តរាគមហើយ លោកបានសំណូមពរអោយម្តាយនារីរងគ្រោះមក ដាក់ពាក្យបណ្តឹង នៅការិយាល័យនគរបាលប្រឆាំងការជូញដូរខេត្តនៅថ្ងៃទី២៨ ខែវិច្ឆិកានេះ ការដាក់ពាក្យប្តឹងមិនត្រូវបានគេទារប្រាក់អ្វីឡើយ ហើយលោកស្នងការនិយាយថា លោកនឹងអន្តរាគមអោយលោកនាយការិយាល័យ ធ្វើការស្រាវជ្រាវជាបន្ទាប់ក្នុងរឿងខាងលើនេះមិនទុកអោយយូរឡើយ ៕
ចែករំលែកព័តមាននេះ