រាជធានីភ្នំពេញ ៖ ស្ត្រីម្នាក់ឈ្មោះ កុយ កឹមទ្បេង អាយុ៣៩ឆ្នាំ និងកូនស្រីតូចម្នាក់ មានទីលំនៅក្នុងភូមិកោះនរា សង្កាត់និរោធ ខណ្ឌច្បារអំពៅ បានត្រូវបងប្អូនខាងប្តីបណ្តេញចេញពីផ្ទះ បន្ទាប់ពីប្តីរបស់នាងទទួលមរណភាព កាលពីថ្ងៃទី១១ វិច្ឆិកា កន្លងមក ។ ករណីនេះ ត្រូវបានអាជ្ញាធរមូលដ្ឋានដឹកនាំដោយលោក ណុប ផា អភិបាលរងខណ្ឌច្បារអំពៅ ចុះសម្របសម្រួលបើកសោទ្វារផ្ទះឱ្យស្ត្រីរូបនេះនិងកូនស្រី បានចូលស្នាក់នៅវិញ នាព្រឹកថ្ងៃទី២៦ វិច្ឆិកា ។
តាមប្រភពព័ត៌មានទាក់ទិននឹងរឿងរ៉ាវខាងលើនេះ បានឱ្យដឹងថា ស្ត្រីឈ្មោះ កុយ កឹមទ្បេង បានស្រទ្បាញ់គ្នាជាមួយឈ្មោះ ស៊ុំ សុផៃ តាំងពីឆ្នាំ២០០៧មកម្ល៉េះ ដោយមានលិខិតបញ្ជាក់ដឹងឮពីភូមិ-សង្កាត់ត្រឹមត្រូវ ប៉ុន្តែមិនបានចុះសំបុត្រអាពាហ៍ពិពាហ៍ជាមួយគ្នាទ្បើយ ។ ក្នុងការរស់នៅជាមួយគ្នា ប្តីប្រពន្ធនេះបង្កើតបានកូនស្រីម្នាក់ឈ្មោះ ផៃ សុចិន្តា ដែលមកដល់ពេលនេះ មានអាយុ៦ឆ្នាំ ហើយរស់នៅក្នុងលំនៅឋានមួយកន្លែង ក្នុងដីទ្បូត៍របស់ខាងប្តី ។ លុះមកដល់ថ្ងៃទី១១ វិច្ឆិកា ឆ្នាំ២០១៤ កន្លងមកនេះ បុរសឈ្មោះ ស៊ុំ សុផៃ ជាប្តីបានទទួលមរណភាព ហើយក្រោយមកស្រាប់តែបងប្អូនបង្កើតរបស់ឈ្មោះ ស៊ុំ សុផៃ នាំគ្នាប្តឹងទៅអាជ្ញាធរ និងបណ្តេញនាង កុយ កឹមទ្បេង និងកូនស្រីម្នាក់ឱ្យចេញពីផ្ទះ ដោយសំអាងទៅលើប័ណ្ណសុំកាន់កាប់ដី ដែលសពឈ្មោះ ស៊ុំ សុផៃ និងនាង កុយ កឹមទ្បេង ស្នាក់នៅជុំគ្នាកន្លងមកនោះ ជាកម្មសិទ្ធិឪពុករបស់ឈ្មោះ ស៊ុំ សុផៃ ។
តាមរយៈរឿងរ៉ាវខាងលើនេះ ស្ត្រីឈ្មោះ កុយ កឹមទ្បេង បានប្តឹងទាមទារសុំរស់នៅលើផ្ទះ ដែលធ្លាប់រស់នៅជាមួយប្តីនោះ តាំងពីក្រោយពេលប្តីគាត់ស្លាប់មកម្ល៉េះ ប៉ុន្តែអាជ្ញាធរមូលដ្ឋានមិនសម្របសម្រួលឱ្យទ្បើយ ដោយសំអាងថា ប្លង់ដីខាងលើនេះ មិនមែនជាកម្មសិទ្ធិរបស់នាង ។ មិនតែប៉ុណ្ណោះ អាជ្ញាធរខណ្ឌច្បារអំពៅ ចាក់សោទ្វារផ្ទះមិនឱ្យនាង កុយ កឹមទ្បេង និងកូនស្រី បានចូលនៅក្នុងលំនៅឋានខាងលើទ្បើយ តែដោយសារនាងបានពឹងពាក់លោកមេធាវី អ៊ូ វុធ ឱ្យជួយសម្របសម្រួលបញ្ហានេះ ទើបនៅព្រឹកថ្ងៃទី២៦ វិច្ឆិកា អាជ្ញាធរមូលដ្ឋានបានទៅបើកទ្វារឱ្យនាងចេញចូលក្នុងលំនៅឋាន ទាំងការភ័យខ្លាចសាច់ញាតិខាងប្តី និងកូនប្រពន្ធដើម ។ សូមបញ្ជាក់ថា ប្តីដែលស្លាប់នោះធ្លាប់មានប្រពន្ធម្តងហើយ តែប្រពន្ធមុននោះបានស្លាប់យូរឆ្នាំមកហើយ ។
បើតាមប្រភពព័ត៌មានពីលោក ស៊ុំ សំអាត អនុប្រធានការិយាល័យភូមិបាល និងសំណង់ស្រុកកៀនស្វាយ ដែលជាដើមបណ្តឹងក្នុងរឿងនេះ និយាយថា លោកមិនទទួលស្គាល់ឈ្មោះ កុយ កឹមទ្បេង ជាប្រពន្ធសពបងប្រុសរបស់ខ្លួនឈ្មោះ ស៊ុំ សុផៃ ទ្បើយ ហើយករណីនេះ លោកត្រូវតែប្តឹងទាមទារយកដីរបស់លោក ដែលមានឈ្មោះឪពុកលោកជាម្ចាស់កម្មសិទ្ធិ ដើម្បីទុកចែកបងប្អូនបង្កើតរបស់លោក ។ យោងតាមច្បាប់ទាយាទបានឱ្យដឹងថា កុមារីឈ្មោះ ផៃ សុចិន្តា និងស្ត្រីឈ្មោះ កុយ កឹមទ្បេង ត្រូវតែមានចំណែកទទួលបានកេរមរតក ពីសពឈ្មោះ ស៊ុំ សុផៃ ជាប្តីនិងជាឪពុក ។ ប៉ុន្តែករណីនេះ ចាំមើលអាជ្ញាធរមូលដ្ឋាន និងសាលាដំបូងរាជធានីភ្នំពេញ វិនិច្ឆ័យលើរឿងរដ្ឋប្បវេណីនេះ ជូនក្មេងស្រីម្នាក់ និងស្ត្រីមេម៉ាយម្នាក់នេះ តាមរបៀបណា ?
ចែករំលែកព័តមាននេះ