រាជធានីភ្នំពេញ ៖ ក្រសួងវប្បធម៌ និងវិចិត្រសិល្បៈ នឹងចាត់វិធានការចំពោះអ្នកដែលរៀបចំពិធីបែបសាសនារបស់ជនជាតិវៀតណាមនៅលើភ្នំបូកគោ ដែលធ្វើឱ្យប៉ះពាល់ដល់វប្បធម៌ជាតិរបស់ខ្មែរ ។ លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានថ្លែងប្រាប់អ្នកសារព័ត៌មានបែបនេះ ក្រោយពីជំនួបបិទទ្វារជាមួយគណៈកម្មការទី៧ នៃរដ្ឋសភាអស់រយៈពេលជិត៣ម៉ោង នារសៀលថ្ងៃទី២៦ វិច្ឆិកា នៅវិមានរដ្ឋសភា ។ លោកជំទាវរដ្ឋមន្ត្រីបញ្ជាក់ថា «យើងនឹងចាត់ឱ្យមន្ត្រីរបស់យើងចុះទៅមើលកន្លែងដែលជនជាតិវៀតណាមយកទីតាំងធ្វើជាកន្លែងគោរពបូជាសាសនារបស់ខ្លួននៅលើភ្នំបូកគោ ។
បើតាមយើងដឹង កន្លែងដែលជនជាតិវៀតណាមធ្វើនោះជាកន្លែងគេមានជំនឿថាស័ក្តិសិទ្ធិ ។ ប៉ុន្តែយើងនឹងទៅកន្លែងនោះផ្ទាល់ថា វាធ្វើឱ្យប៉ះពាល់ដល់វប្បធម៌ជាតិខ្មែរយើងយ៉ាងណាខ្លះ» ។ លោក យ៉ែម បុញ្ញឫទ្ធិ ប្រធានគណៈកម្មការទី៧ នៃរដ្ឋសភាបានលើកឡើងថា លោកក៏ដូចជាតំណាងគណៈកម្មការនានា បានសាកសួរលោកជំទាវរដ្ឋមន្ត្រីជាច្រើនទាក់ទងនឹងវប្បធម៌ពិសេសនោះ ការដែលជនជាតិវៀតណាមយកកន្លែងធ្វើពិធីផ្សេងៗនៅលើភ្នំបូកគោ និងទុក្ខកង្វល់របស់ជនជាតិភាគតិចនៅតំបន់អារ៉ែង និងស្នើឱ្យរដ្ឋមន្ត្រីក្រសួងវប្បធម៌បញ្ចូលកម្មវិធីសិក្សាទាក់ទងនឹងផ្នែកសិល្បៈ ឧបករណ៍តូរតន្ត្រីបុរាណរបស់ខ្មែរដែលជាសម្បត្តិវប្បធម៌របស់ជាតិ ។
ទាក់ទិននឹងការលើកឡើងរបស់ប្រធានគណៈកម្មការទី៧ នៃរដ្ឋសភានៅតំបន់អារ៉ែង លោកជំទាវរដ្ឋមន្ត្រីពុំទាន់ទទួលបានពាក្យបណ្តឹង ក៏ដូចជាឯកសារជាផ្លូវការ ឬជាក់លាក់នោះទេ។ ប៉ុន្តែបន្ទាប់ពិភាក្សាគ្នានេះទៅ ក្រសួងនឹងចុះទៅពិនិត្យនៅតំបន់អារ៉ែងនោះផ្ទាល់ថា តើប៉ះពាល់ដល់វប្បធម៌អ្វីខ្លះ ។ ការស្នើសុំឱ្យមានការបញ្ចូលផ្នែកសិល្បៈឧបករណ៍តូរតន្ត្រីបុរាណរបស់ខ្មែរដែលជាសម្បត្តិវប្បធម៌របស់ជាតិនោះ លោកជំទាវរដ្ឋមន្ត្រីនឹងពិភាក្សាជាមួយលោករដ្ឋមន្ត្រីក្រសួងអប់រំដើម្បីដាក់បញ្ចូលក្នុងកម្មវិធិសិក្សាចាប់ពីពេលនេះតទៅ ។ លោក យ៉ែម បុញ្ញឫទ្ធិ ក៏បានស្នើឱ្យក្រសួងវប្បធម៌ និងវិចិត្រសិល្បៈ គិតគូរពីកម្មសិទ្ធិបញ្ញាផងដែរ និងស្នើសុំឱ្យរាជរដ្ឋាភិបាលបន្ថែមថវិកាដល់ក្រសួងវប្បធម៌ និងវិចិត្រសិល្បៈ ដែលជាក្រសួងមួយសំខាន់ក្នុងការរួមចំណែកទាក់ទាញភ្ញៀវទេសចរ ដូច្នេះត្រូវការមធ្យោបាយ និងមន្ត្រីដែលមានសមត្ថភាពក្នុងការធ្វើការងារឱ្យមានប្រសិទ្ធភាព ។
លោកជំទាវរដ្ឋមន្ត្រីថ្លែងថា គោលនយោបាយរបស់ក្រសួង គឺថែរក្សាវប្បធម៌ទាំងរូបី និងអរូបី និងបញ្ចូលទៅក្នុងវិស័យអប់រំដើម្បីឱ្យក្មេងជំនាន់ក្រោយបានដឹកពីវប្បធម៌ជាតិ និងការពង្រឹងសមត្ថភាពស្ថាប័ន និងដៃគូនានា។ លោកជំទាវបញ្ជាក់ថា បញ្ហាអាទិភាពរបស់ក្រសួងវប្បធម៌ និងវិចិត្រសិល្បៈ គឺការចុះបញ្ជីសារពើពន្ធបេតិកភណ្ឌរូបី និងអរូបី ទាំងអស់ដែលមាននៅក្នុងប្រទេសកម្ពុជា ។ ពិសេសនោះ នៅដើមឆ្នាំ២០១៥ ក្រសួងនឹងចុះបញ្ជីបេតិភណ្ឌពិភពលោកនូវប្រាសាទសំបូរព្រៃគុកនៅខេត្តកំពង់ធំ នៅអង្គការយូណេស្កូ និងរៀបចំការចុះបញ្ជីនូវបេតិកភណ្ឌផ្នែកមនុស្សជាតិ ចាប៉ីដងវែង ៕
ចែករំលែកព័តមាននេះ