រាជធានីភ្នំពេញ ៖ លោក ឱម យិុនទៀង ប្រធានអង្គភាពប្រឆាំងអំពើពុករលួយ(ACU) បានថ្លែងកាលពីថ្ងៃទី២៥ វិច្ឆិកា ថា អង្គភាពប្រឆាំងអំពើពុករលួយ(ACU)មានកញ្ចប់ថវិកាឯករាជ្យរបស់ខ្លួនដែលរាជរដ្ឋាភិបាលផ្តល់ឲ្យស្មើនឹង០,០២%នៃថវិកាជាតិ ។ ក្នុងឆ្នាំ២០១៣ កន្លងទៅ អង្គភាពប្រឆាំងអំពើពុករលួយ(ACU)បានទទួលថវិកាពីរាជរដ្ឋាភិបាលសរុបប្រមាណ៧លានដុល្លារអាមេរិក ។ កញ្ចប់ថវិកាទាំងនេះត្រូវបានប្រើប្រាស់លើផ្នែកផ្សេងៗរបស់អង្គភាពប្រឆាំងអំពើពុករលួយ(ACU) រួមមានប្រាក់ខែបុគ្គលិក ដំណើរការស៊ើបអង្កេត ការឃាត់ខ្លួន សាកសួរចម្លើយ និងបញ្ជូនជនសង្ស័យទៅតុលាការ ។
លោក ឱម យិុនទៀង បានថ្លែងបែបនេះក្នុងជំនួបពិភាក្សាជាមួយគណៈប្រតិភូនៃអង្គភាពប្រឆាំងអំពើពុករលួយនៃប្រទេសឡាវ ដឹកនាំដោយលោក ខាំស្កុក ប៊ុនហ្គាវង្ស (Khmascuk Boungavong) ប្រធានអង្គភាពប្រឆាំងអំពើពុករលួយនៃសាធារណរដ្ឋប្រជាមានិតប្រជាធិបតេយ្យឡាវ ។ បន្ទាប់ពីកិច្ចពិភាក្សាជាមួយសមភាគីនៅអង្គភាព ACU គណៈប្រតិភូប្រឆាំងអំពើពុករលួយឡាវក៏បានចូលពិនិត្យបន្ទប់សួរចម្លើយ និងបន្ទប់ឃុំឃាំងអ្នកទោសនៅទីស្តីការអង្គភាពប្រឆាំងអំពើពុករលួយផងដែរ ។ យោងតាមអង្គភាពប្រឆាំងអំពើពុករលួយ(ACU) បានបញ្ជាក់ថា គណៈប្រតិភូអង្គភាពប្រឆាំងអំពើពុករលួយនៃប្រទេសឡាវដឹកនាំដោយលោក ខាំស្កុក ប៊ុនហ្គាវង្ស (Khmascuk Boungavong) បានមកបំពេញទស្សនកិច្ចនៅកម្ពុជា ចាប់ពីថ្ងៃទី២៤ដល់ថ្ងៃទី២៨ វិច្ឆិកា ឆ្នាំ២០១៤ ។
កិច្ចពិភាក្សាទ្វេភាគីនេះ ភាគីកម្ពុជា និងឡាវ បានលើកឡើងពីកិច្ចសហប្រតិបត្តិការ ផ្លាស់ប្តូរបទពិសោធន៍ការងារប្រឆាំងអំពើពុករលួយរវាងអង្គភាពទាំងពីរឲ្យកាន់តែមានប្រសិទ្ធភាពថែមទៀត ។ លោក ឱម យិុនទៀង បានថ្លែងប្រាប់គណៈប្រតិភូឡាវថា បន្ទាប់ពីការចាប់ខ្លួនជនសង្ស័យត្រូវបាននាំទៅកាន់អង្គភាពប្រឆាំងអំពើពុករលួយ (ACU) ដើម្បីសួរចម្លើយ បន្ទាប់មកឃុំខ្លួនរយៈពេល២ថ្ងៃនៅអង្គភាពប្រឆាំងអំពើពុករលួយ(ACU) និងបន្ទាប់មកទៀតបញ្ជូនទៅតុលាការដើម្បីចោទប្រកាន់តាមច្បាប់ ។ នៅក្នុងបន្ទប់សួរចម្លើយមានបំពាក់ដោយម៉ាស៊ីនត្រជាក់ ហើយគេមិនអាចប្រើទណ្ឌកម្មខ្លាំងដល់អ្នកទោសទេ តែបន្ថែមភាពត្រជាក់ខ្លាំងបន្តិចប្រសិនបើមិនព្រមឆ្លើយ ។
លោក ឱម យិុនទៀង បានថ្លែងថា នៅពេលដែលអង្គភាពប្រឆាំងអំពើពុករលួយ(ACU)ធ្វើការសាកសួរជនជាប់ចោទមិនទាន់ចប់ទេ មិនអាចបន្តឃុំខ្លួនក្នុងបន្ទប់សួរចម្លើយទេ ត្រូវយកមនុស្សទៅដាក់ចូលក្នុងរថយន្តដោយបញ្ឆេះម៉ាស៊ីនរថយន្ត ព្រោះច្បាប់ចែងថា ធ្វើដំណើរគេមិនគិតពីម៉ោងទេ មុនបញ្ជូនទៅតុលាការ។ ករណីខ្លះត្រូវបញ្ជូនជនសង្ស័យទៅដល់សាលាដំបូងខេត្តសៀមរាប ដែលត្រូវចំណាយពេលពី៧ម៉ោងទៅ៨ម៉ោង ។ ក្នុងដំណើរទស្សនកិច្ចនេះ គណៈប្រតិភូប្រឆាំងអំពើពុករលួយឡាវបានទៅធ្វើទស្សនកិច្ចនៅគណៈកម្មការត្រួតពិនិត្យ គណៈកម្មាធិការកណ្តាលគណបក្សប្រជាជនកម្ពុជា និងក្រសួង-ស្ថាប័នចំនួនបីផ្សេងទៀត រួមមាន ក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច អគ្គសវនកម្មនៃអាជ្ញាធរសវនកម្មជាតិ និងក្រសួងយុត្តិធម៌ ។ អង្គភាពប្រឆាំងអំពើពុករលួយ(ACU) បានចុះអនុស្សរណៈនៃការយោគយល់គ្នាស្តីពីការប្រឆាំងអំពើពុករលួយជាមួយអាជ្ញាធរអធិការកិច្ចរដ្ឋ និងប្រឆាំងអំពើពុករលួយឡាវ កាលពីថ្ងៃទី១៥ ខែវិច្ឆិកា ឆ្នាំ២០១៣ ៕
ចែករំលែកព័តមាននេះ