រាជធានីភ្នំពេញ ៖ យុវជនមួយក្រុមមានគ្នា៤នាក់ ជិះម៉ូតូ២គ្រឿងជាមធ្យោបាយធ្វើសកម្មភាព កាលពីវេលាម៉ោង១០ និង៣០នាទី ព្រឹកថ្ងៃទី២៥ វិច្ឆិកា បានឆក់កាបូបអ្នកដំណើរនៅតាមដងមហាវិថីព្រះមុនីវង្ស ជិតស្ថានទូតវៀតណាម ទឹកដីខណ្ឌចំការមន ត្រូវកំលាំងសមត្តកិច្ចនគរបាលខណ្ឌ៧មករា ដេញតាមប្រមាញ់ទៅដល់បុរីកាំកូស៊ីធី ក្នុងខណ្ឌទួលគោក ចាប់បាន២នាក់ ។
យុវជនជាជនសង្ស័យដែលសមត្តកិច្ចចាប់ខ្លួនម្នាក់ឈ្មោះអ៊ុំ សុវណ្ណារ៉ាត់ អាយុ១៩ ឆ្នាំស្នាក់នៅម្តុំបុរី១០០ខ្នង សង្កាត់ទឹកថ្លា ខណ្ឌសែនសុខ រាជធានីភ្នំពេញ នឹងម្នាក់ឈ្មោះអឿន ណុប អាយុ២០ឆ្នាំ ស្នាក់នៅម្តុំរ៉ាដា ខណ្ឌទួលគោក រាជធានីភ្នំពេញ ពួកគេសុទ្ធតែជាជនបោះបង់ចោលការសិក្សារ និងផ្ទះសម្បែង ។
ទាក់ទិននឹងការចាប់ឃាត់ខ្លួនជនសង្ស័យឆក់កាបូបប្រាក់២នាក់ខាងលើនេះ លោកអនុសេនីយ៍ទោរស់ ស៊ីណា ប្រធានផ្នែកនគរបាលព្រហ្មទណ្ឌខណ្ឌ៧មករា បានឲ្យដឹងថា ក្រោមការណែនាំជាប្រចាំពីសំណាក់លោកវរៈសេនីយ៍ទោនេត ស៊ីថុន អធិការខណ្ឌ កំលាំងផ្នែកជំនាញព្រហ្មទណ្ឌរបស់លោកបានចេញល្បាតក្នុងមូលដ្ឋានគ្រប់ច្រកល្ហកទាំងយប់ទាំងថ្ងៃ ជាការស្រាវជ្រាវនឹងស្វែងរកបទល្មើស ។ ជាក់ស្តែងនៅវេលាព្រឹកថ្ងៃទី២៥ វិច្ឆិកា កំលាំងល្បាតបានជួបយុវជនមួយក្រុមមានគ្នា៤នាក់ ជិះម៉ូតូឌ្រីម២គ្រឿង ដោយឃើញមានការសង្ស័យយុវជនទាំង៤នាក់នោះ កំលាំងនគរបាលជំនាញផ្នែកព្រហ្មទណ្ឌបានជិះម៉ូតូតាមពីក្រោយ ដើម្បីឃ្លាំមើលសកម្មភាពពួកគេ ។ លោករស់ ស៊ីណា បន្តថា ពេលកំលាំងយើងតាមជិតដល់ស្ថានទូតវៀតណាមក្នុងខណ្ឌចំការមន ស្រាប់តែពួកគេបានធ្វើសកម្មភាពឆក់ការបូបពីស្ត្រីម្នាក់ជាអ្នកដំណើរ ។ ពេលឆក់កាបូបបានពីស្ត្រីម្នាក់នោះភ្លាពជនសង្ស័យបានជិះម៉ូតូគេចខ្លួនយ៉ាងលឿន ខណៈពេលជនរងគ្រោះស្រែករកសមត្តកិច្ចឲ្យជួយអន្តរាគមន៍ ស្របពេលនោះកំលាំងល្បាតដែលនៅពីក្រោយបានដេញតាមប្រមាញ់ជនសង្ស័យពីខណ្ឌចំការមនជាកន្លែងកើតហេតុ ទៅដល់បុរីកាំកូស៊ីធី ទើបចាប់បាន២នាក់ នឹងដកហូតបានកាបូបជនរងគ្រោះមកវិញ ។ នៅក្នុងការបូបនោះមានប្រាក់១ម៉ឺនរៀល ទូរសព្ទ័១គ្រឿង និងឯកសារមួយចំនួន ហើយត្រូវបានសមត្តកិច្ចប្រគល់ឲ្យទៅម្ចាស់វិញ ។ ជនសង្ស័យនឹងត្រូវកសាងសំណុំរឿបញ្ជួនទៅកាន់សាលាដំបូងរាជធានីភ្នំពេញ ៕
ចែករំលែកព័តមាននេះ