រាជធានីភ្នំពេញ ៖ តារាសម្តែង និងតារាម៉ូដែល អ្នកនាង ច័ន្ទ សុធារ័ត្ន ជាតារាស្រីមួយដួងដែលមានសំណាងគ្រាន់បើ ព្រោះតែស្វាមីជាអ្នកជំនួញបានទុកចិត្តឲ្យមើលមុខរបរធំដុំក្នុងដៃយ៉ាងពេញអំណាចអត់ខ្វល់លំបាកឡើយ ព្រោះតែនាងមានមន្តស្នេហ៍នៃដួងជីវិតស្វាមីផ្ទាល់ ។ ស្ថិតក្នុងតួនាទីជាថៅកែហាងដល់ទៅ២មើលខុសត្រូវ ច័ន្ទ សុធារ័ត្ន ដែលបានបាត់មុខពីសិល្បៈជាង១ឆ្នាំ បានបង្ហាញអារម្មណ៍នឹកនាសិល្បៈរហូតនៅតែទទួលសម្តែងដូចមុន ខណៈស្វាមីក៏បានបើកបេះដូងព្រមទទួលយកសំណើភរិយាអត់បដិសេធនោះ។
អ្នកនាងច័ន្ទ សុធារ័ត្ន បន្ទាប់ពីរកបានម្ចាស់ស្នេហ៍ជាស្វាមីចំណាស់ ចេះថ្នមចិត្តមកបានរសាត់បាត់ពីសិល្បៈមួយរយៈ ដើម្បីបំពេញតួនាទីជាស្ត្រីមេផ្ទះ និងមើលថែមុខរបរជំនួញក្នុងដៃដែលស្ចាមីបានផ្តល់ទំនុកចិត្តបើកសិទ្ធិមើលថែទាំ ដោយជំនួញទាំង២នោះមានហាងស្ប៉ាមួយកន្លែង ឈ្មោះថា «ឡាពែកស្ប៉ា» ស្ថិតនៅផ្លូវ៣១០ សង្កាត់បឹងកេងកងកែង ផ្លូត្រសក់ផ្អែម និងភោជនីយដ្ឋាន «MINGO MINGO» ស្ថិតនៅខាងក្រោយស្ថានទូតរុស្ស៉ី ដែលជាហាងទំនើបទាក់ទាញមានតារាទៅច្រើន និងជាកន្លែងដែលផលិតកម្ម ព្រមទាំងស្ថានីយទូរទស្សន៍នានាឧស្សាហ៍ចេញថតចម្រៀង និងរឿងនៅទីនោះ។ ក្នុងចំណងស្នេហ៍ខុសវ័យ តែប្រកបដោយសេចក្តីសុខក្នុងវិថីស្នេហ៍ សុធារ័ត្ន បានបន្សល់ទុកនូវចំណងដៃកូនស្រីមួយជាមួយម្ចាស់ចិត្តរបស់នាងធ្វើឲ្យស្នេហាមួយនេះកាន់តែរឹងមាំឡើងបន្ថែមទៀត។ ព្រោះតែធ្លាប់ជាប់ឈ្មោះជាតារាសម្តែង និងម៉ូដែល អ្នកនាង ច័ន្ទ សុធារ័ត្ន ទោះជាក្លាយជាថៅកែហាងមានបុគ្គលិកឆ្វេងស្តាំឱនគោរព ក៏នាងមិនបានដកខ្លួនឲ្យផុតពីទឹកចិត្តស្រឡាញ់អាជីពសិល្បៈនោះឡើយ ហើយសន្យាថា នឹងនៅតែបន្តការងារសិល្បៈប្រសិនបើនៅតែមានគេត្រូវការ។
ក្នុងជំនួបផ្តាច់មុខមួយជាមួយអ្នកយកព័ត៌មានយើងកាលពីពេលថ្មីៗ ស្ថិតទីតាំងហាងស្ប៉ាដែលរចនាបែបបុរាណស្រគត់ស្រគំអ្នកនាងច័ន្ទ សុធារ័ត្ន ដែលបានក្លាយជាម្តាយរបស់កូនស្រីមួយ និងនៅតែស្អាតបានរៀបរ៉ាប់ថា « បច្ចុប្បន្ននេះ នាងពិតជារវល់ជាមួយមុខរបរទាំង២ក្នុងដៃមើលគ្រប់គ្រង ដូចជាហាងស្ប៉ា និងភោជនីយដ្ឋានដែលមុខរបរទាំង២នេះ សុទ្ធតែទទួលបានការគាំទ្រពីអតិថិជន។ បើនិយាយពីហាង «ឡាពែកស្ប៉ា» វិញ មានទាំងភ្ញៀវបរទេស និងមហាជនទូទៅ ព្រមទាំងតារាយើងក៏ឧស្សាហ៍មកសម្រួលសរសៃនៅទីនេះដែរ ដូចជាអ្នកនាងចន ច័ន្ទលក្ខិណា, ឌុច លីដា, សួស វីហ្សា, ញឹម ចាន់ថន, ត្រកូលអោក ព្រមទាំងតារាជាច្រើនទៀត ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ