រាជធានីភ្នំពេញ ៖ គិតចាប់ពីការចាប់ផ្តើមចរចាត្រីភាគីស្តីពីប្រាក់ឈ្នួលអប្បបរមា ដោយសមាសភាពម្ខាង៩រូប រហូតឈានដល់ការបញ្ចប់តាមនីតិវិធី គឺកំណត់រយៈពេល១០ថ្ងៃ ហើយអ្វីដែលកម្មករនិយោជិត ក៏ដូចជាអ្នកតាមដានអំពីប្រាក់ឈ្នួលកម្មករសម្រាប់ឆ្នាំ២០១៥ ទន្ទឹងរង់ចាំដូចគ្នាថាទទួលបានប៉ុន្មាននោះ នឹងត្រូវបញ្ចប់នៅថ្ងៃទី៣០ តុលា ខាងមុខនេះ ។
លោក ហេង សួគ៌ អ្នកនាំពាក្យក្រសួងការងារ និងជាប្រធានក្រុមការងារកិច្ចចរចាត្រីភាគី បានឱ្យដឹងកាលពីល្ងាចថ្ងៃទី២៧ តុលានៅទីស្តីការក្រសួងថា កិច្ចចរចាប្រាក់ឈ្នួលកម្មករនិយោជិតនឹងត្រូវបញ្ចប់តាមនីតិវិធីដែលបានកំណត់ ។ និយាយរួមទៅ គិតតាំងពីពេលចាប់ផ្តើមចរចាមកមានភាពវិជ្ជាមានរហូត ដែលជាការបង្ហាញថា ទាំងភាគីសហជីព និងភាគីនិយោជកមានភាពយល់ដឹងបានច្រើន និងគោរពគ្នាទៅវិញទៅមក ។ លោកបញ្ជាក់ថា «នៅថ្ងៃនេះ យើងមិននឹកស្មានដល់ថា លើសពីអ្វីដែលយើងគិតទៅទៀត គឺគ្រប់ភាគីទាំងអស់បានលើកយកអ្វីដែលគិតពីផលប្រយោជន៍ដល់ភាគីនិយោជិត ក៏ដូចជាការគោរពសុច្ឆន្ទៈរបស់និយោជកមួយចំនួនដែលគោរពតាមលក្ខខណ្ឌការងារទាក់ទិននឹងវិស័យកាត់ដេរ ។ កិច្ចប្រជុំបានបានលើកយកតម្លៃ ឬតួលេខមកសិក្សា ដែលហាក់បីដូចជាជម្រើសសម្រាប់ភាគី ។ តាមការលើកឡើង ខ្ញុំសុំមិននិយាយរឿងតួលេខណាមួយឱ្យដឹងទេ ប៉ុន្តែក្នុងនាមអាជ្ញាកណ្តាលបានព្យាយាមថ្លឹងថ្លែងឱ្យត្រូវគ្នាជានិច្ច» ។
តាមការអះអាងរបស់លោក ហេង សួគ៌ ថានៅថ្ងៃទី៣០ តុលា ក្រុមការងារត្រីភាគីនឹង បើកកិច្ចប្រជុំចាប់ពីម៉ោង៩និង៣០នាទី ហើយកិច្ចប្រជុំនោះអាចនឹងជាកិច្ចប្រជុំចុងក្រោយរបស់ក្រុមការងារត្រីភាគីរឿងចរចាបញ្ហាប្រាក់ឈ្នួលអប្បបរមារបស់កម្មករនិយោជិតដើម្បីដាក់ទៅគណៈកម្មការប្រឹក្សាការងារពិភាក្សាបញ្ចប់។ កិច្ចប្រជុំនេះ ភាគីនិយោជកមិនបានកំណត់ ឬឱ្យតម្លៃប្រាក់ឈ្នួលអប្បបរមាដូចអ្វីដែលហ៊ាន (១១០ដុល្លារ) នោះទេ ។ បញ្ហានេះត្រូវបានលោក ហេង សួគ៌ ថា ប្រសិនបើភាគីនិយោជកមិនហ៊ានយ៉ាងណានោះ រាជរដ្ឋាភិបាលបានត្រៀមយន្តការផ្សេងៗដើម្បីសម្រួលពីបញ្ហាប្រាក់ឈ្នួលអប្បបរមាដែលលើសពីអ្វីដែលភាគីនិយោជកអាចផ្តល់ឱ្យកម្មករ ។ ការគិតរបស់រាជរដ្ឋាភិបាលនេះសង្ឃឹមថា កម្មករទាំងអស់នឹងទទួលបានជីវភាពរស់នៅសមរម្យប្រសើរជាងមុន ។
ទោះជាភាគីនិយោជកមិនហ៊ានកំណត់ចំនួនពិតប្រាកដយ៉ាងណាក្តី លោក ហេង សួគ៌ មិនបង្ហាញពីតួលេខពិតប្រាកដដែលរាជរដ្ឋាភិបាលគ្រោងសម្រេចយ៉ាងណាដល់ភាគីទាំងអស់នោះ ទេ គ្រាន់តែនៅពេលនេះចំនួនតួលេខដែលរាជរដ្ឋាភិបាលកំណត់ហើយ និងសង្ឃឹមថា ភាគីនិយោជកនឹងទទួលយកចំនួនតួលេខនោះ ។ តួលេខដែលរាជរដ្ឋាភិបាលដាក់ជូននោះ ត្រូវបានស្រាវជ្រាវ និងទទួលស្គាល់ពីស្ថាប័នមួយចំនួនផងដែរ។ ដូច្នេះប្រសិនបើគាត់ទទួលយកនោះ ភាគីនិយោជក ក៏ដូចជាកេរ្តិ៍នៃទំនាក់ទំនងវិជ្ជាជីវៈនៅកម្ពុជាកាន់តែប្រសើរឡើង និងអាចទាញកម្លាំងចិត្តអ្នកបញ្ជាទិញមកវិញផងដែរ ។
លោក ហេង សួគ៌ សង្កត់ធ្ងន់ថា ទោះបីជាការកំណត់តួលេខរបស់រាជរដ្ឋាភិបាលមិនបានត្រូវនឹងចំនួនរបស់ភាគីណាមួយក្តី ភាគីទាំងអស់នឹងចាប់ដៃធ្វើការជាមួយគ្នាដើម្បីអំពាវនាវដល់អ្នកបញ្ជាទិញធំៗនៅលើពិភពលោកឱ្យវិលត្រឡប់មកស្រុកខែ្មរវិញ ។ លើសពីនេះ ត្រូវការបញ្ជាទិញឱ្យលើសពីការបញ្ជាទិញនៅឆ្នាំកន្លងមកថែមទៀត ។ ពេលដែលធ្វើការចាប់ដៃគ្នាហើយនៅពេលនោះយើងនឹងឃើញថា តើអ្នកបញ្ជាទិញមួយណា គិតពីជីវភាពកម្មករ និងហ៊ានឱ្យតម្លៃប្រាក់ឈ្នួលកម្មករច្រើនសម្រាប់ជីវភាពរស់នៅរបស់ពួកគាត់ ។ លោក គង់ អាទិត្យ តំណាងសហជីពដែលចូលរួមចរចាបានលើកឡើងថា កិច្ចប្រជុំនេះមានភាពច្បាស់ជាងកិច្ចប្រជុំចរចាប្រាក់ឈ្នួលកន្លងមក ក៏ដូចជាមុននឹងកិច្ចប្រជុំសម្រេចនៅថ្ងៃទី៣០ តុលា ខាងមុខ ។ ភាគីនិយោជិត (កម្មករ) សង្ឃឹមថាភាគីរាជរដ្ឋាភិបាល ក៏ដូចជាភាគីនិយោជកនឹងយោគយល់ដល់ភាគីនិយោជិតក្នុងការផ្តល់ប្រាក់ឈ្នួលអប្បបរមាសម្រាប់ឆ្នាំ២០១៥ ដើម្បីរក្សាសន្តិភាពទាំងអស់គ្នា ។
លោកបញ្ជាក់ថា «ប្រសិនបើភាគីរាជរដ្ឋាភិបាលយល់ និងភាគីនិយោជកយល់នោះការសម្រេចនៅគណៈកម្មការប្រឹក្សាការងារខាងមុខនេះនឹងមានភាពវិជ្ជាមាននាំមកនូវសន្តិភាពដើម្បីប្រទេសជាតិយើងទាំងអស់គ្នា» ។ តំណាងនិយោជកបញ្ជាក់ថា «ខ្ញុំយល់ពីកង្វល់របស់អ្នកបញ្ជាទិញ ប៉ុន្តែនៅពេលដែលបញ្ហានេះដោះស្រាយចប់នោះ ខ្ញុំសង្ឃឹមថាអ្នកបញ្ជាទិញនឹងវិញត្រឡប់មកវិញ» ។ ចំណែកលោក ប៉ាវ ស៊ីណា ប្រធានសហព័ន្ធសហជីពចលនាកម្មករ ក៏បានឱ្យដឹងនៅព្រឹកថ្ងៃទី២៨ តុលាដែរថា សម្រាប់កិច្ចប្រជុំនៅថ្ងៃទី៣០ តុលា គឺនៅពេលដែលមិនមានការព្រមព្រៀងណាមួយនោះ នឹងមានការបោះឆ្នោតដើម្បីជ្រើសចំនួនដាក់ទៅគណៈកម្មការប្រឹក្សាការងារជាអ្នកសម្រេច។ ចំពោះការដាក់ចំនួន១២០ដុល្លាររបស់ក្រសួងការងារថា លើបន្ទាត់ភាពក្រីក្រនោះ លោកប៉ាវ ស៊ីណា ស្វាគមន៍ នឹងអះអាងថា ការកំណត់នេះធ្វើឱ្យភាគីនិយោជកមិនចាំបាច់ពិភាក្សាគ្នាឡើយ ។
ទោះជាយ៉ាងណាក្តី លោកបញ្ជាក់ថា ការដាក់ចំនួន១២០ដុល្លារនោះគ្រាន់តែជាចំនួនមួយដែលដាក់សម្រាប់ឱ្យភាគីពិភាក្សាគ្នា គឺមិនកំណត់ចំនួនពិតប្រាកដនឹងទទួលយកនោះទេ ចំណែកភាគីនិយោជិតបានដាក់ចំនួន១៤០ដុល្លារមកពិភាក្សា ។ តាមការលើកឡើងរបស់ប្រធានសហជីពដដែលថា ក្នុងកិច្ចប្រជុំភាគីនិយោជកមិនបានលើកឡើងពីចំនួនពិតប្រាកដនោះទេ គ្រាន់តែថា ទុកឱ្យរាជរដ្ឋាភិបាលជាអ្នកកំណត់ ។ លោកបន្តថា ក្រុមសហជីពបានកំណត់ដាក់ចំនួន១៤០ដុល្លារទៅគណៈកម្មការប្រឹក្សាការងារសម្រេចចុងក្រោយ ហើយសម្រាប់សហជីពរំពឹងថា នឹងទទួលបានចំនួនតួលេខណាមួយដែលសមរម្យ ។ លោក ប៉ាវ ស៊ីណា ព្រមានថា ប្រសិនបើភាគីនិយោជក និងរាជរដ្ឋាភិបាលមិនបានគិតគូរប្រាក់ឈ្នួលកម្មករនោះទេ នឹងកើតមានបញ្ហា (បាតុកម្ម, កូដកម្ម) ដោយសារមានបទពិសោធន៍កន្លងមកហើយ ។
ទោះបីជាមានប្រភពក្រៅផ្លូវការលើកឡើងថា ប្រាក់ឈ្នួលកម្មករនឹងអាចទទួលបានពីចន្លោះ ១២៥ដុល្លារនោះ លោក ប៉ាវ ស៊ីណា ប្រកាសថា មិនទទួលយកជាដាច់ខាត ។ ចំណែកតួលេខណាមួយជាក់លាក់នោះ ត្រូវបានលោកបដិសេធមិនបញ្ចេញឱ្យដឹងនោះទេដោយថា រង់ចាំពិភាក្សាផ្ទៃក្នុង ៕
ចែករំលែកព័តមាននេះ