រាជធានីភ្នំពេញ ៖ សមាជិកក្រុមចលនារណសិរ្សរំដោះជាតិខ្មែរចំនួន១០នាក់ កាលពី វេលាម៉ោង៣រសៀល ថ្ងៃទី២៤ តុលា ត្រូវនគរបាលការិយាល័យសន្តិសុខនៃស្នងការដ្ឋាននគរបាលរាជធានីភ្នំពេញ បញ្ជូនទៅដល់សាលាដំបូងហើយ ។ ជនជាប់សង្ស័យទាំង១០នាក់ ត្រូវបាននគរបាលការិយាល័យសន្តិសុខរាជធានីភ្នំពេញ សហការជាមួយកម្លាំងមូលដ្ឋាន បើកកិច្ចប្រតិបត្តិការចាប់ខ្លួន កាលពីវេលាយប់ថ្ងៃទី២២ និងថ្ងៃទី២៣ តុលា នៅទឹកដីខណ្ឌមានជ័យ និងខណ្ឌចំការមន ក្នុងរាជធានីភ្នំពេញ ។
យោងតាមគេហទំព័ររបស់នគរបាលក្រសួងមហាផ្ទៃ លោក គៀត ច័ន្ទថារិទ្ធ ដែលជាអ្នកនាំពាក្យនៃអគ្គស្នងការដ្ឋាននគរបាលជាតិ បានមានប្រសាសន៍ថា ពួកគេទាំង១០នាក់គឺជាសមាជិកក្រុមចលនារណសិរ្សរំដោះជាតិខ្មែរ ដែលបង្កើតឡើង ដោយឈ្មោះ សម សេរី ហៅ ស សេរី ហៅ យាន យៀប និងបក្ខពួក១ក្រុមដែលមានមូលដ្ឋាននៅប្រទេសដាណឺម៉ាក ។ ចលនាក្រុមនេះត្រូវបានគេប្រកាសជាផ្លូវការនៅថ្ងៃទី១២ ធ្នូ២០១២ នៅប្រទេសថៃ ។
ក្រុមនេះត្រូវបានចោទប្រកាន់ថាបានធ្វើសកម្មភាពបាចខិត្តប័ណ្ណប្រឆាំងនឹងប្រមុខរាជរដ្ឋាភិបាល ហ្វឹកហាត់កម្លាំងភេរវកម្ម ដាក់គ្រឿងផ្ទុះដោយសម្ងាត់នៅតាមជាយដែនប្រទេសថៃ ។ កសាងបណ្តាញនៅកម្ពុជា ដើម្បីប្រមូលព័ត៌មាន និងបញ្ជូនព័ត៌មានចេញទៅឱ្យមេខ្លោងរបស់ពួកគេមានទីតាំងនៅក្រៅប្រទេស ដែលចលនានេះមានគោលបំណងផ្តួលរំលំរាជរដ្ឋាភិបាលកម្ពុជា ។
ជនជាប់សង្សយ័ត្រូវបានតំណាងអយ្យការអមសាលាដំបូងរាជធានីភ្នំពេញ ដំណើរការសាកសួរស្រាវជ្រាវរកបទល្មើសចោទប្រកាន់ជាផ្លូវការ សម្រាប់ប្រគល់ជូនទៅចៅក្រមស៊ើបសួរដើម្បីសម្រេចចុងក្រោយ ។ នៅល្ងាចថ្ងៃទី២៤ តុលា ដោយសារការសួរចម្លើយមិនទាន់ចប់ តុលាការក៏បានផ្ញើជនទាំង១០នាក់នេះទុកនៅកន្លែងនគរបាលសិន ហើយត្រូវបញ្ជូនមកសាលាដំបូងម្តងទៀតនៅថ្ងៃនេះ ។ យោងតាមគេហទំព័រនគរបាលបានសរសេរបញ្ជាក់ថា លោក គៀត ច័ន្ទថារិទ្ធ ដែលជាអ្នកនាំពាក្យអគ្គស្នងការដ្ឋាននគរបាលជាតិ បានមានប្រសាសន៍ថា សមាជិករណសិរ្សរំដោះជាតិ ដែលបានត្រូវចាប់ខ្លួនមាន ៖
១-ឈ្មោះ ឈុន ណាគង់ ភេទប្រុស អាយុ២៨ឆ្នាំ ជាគ្រូបង្រៀន ។
២-ឈ្មោះ លីវ យី ភេទប្រុស អាយុ២៩ឆ្នាំ ជាកសិករ និងធ្វើសំណង់ ។
៣-ឈ្មោះ ឈុន ឆាត ភេទប្រុស អាយុ២៩ឆ្នាំ ជាកម្មករនៅប្រទេសថៃ ។
៤-ឈ្មោះ ច្រាញ់ ម៉ុច ភេទប្រុស អាយុ២៤ឆ្នាំ ជានិស្សិតឆ្នាំទី៣ ផ្នែករដ្ឋបាលនៃសាកលវិទ្យាល័យបាត់ដំបង ។
៥-ឈ្មោះ ឡាត់ លីហេង ភេទប្រុស អាយុ២២ឆ្នាំ ជាកសិករ ។
៦-ឈ្មោះ ឆាយ វិុច ភេទប្រុស អាយុ៤០ឆ្នាំ ជាគ្រូបង្រៀន ។
៧-ឈ្មោះ ឈឹម ស្ម័គ្រ ភេទប្រុស អាយុ៥៧ឆ្នាំ ជាកសិករ ។
៨-ឈ្មោះ ចាន់ រ៉ា ភេទប្រុស អាយុ២៣ឆ្នាំ ជាកសិករ ។
៩-ឈ្មោះ អាន ចាន់ ភេទប្រុស អាយុ៣៥ឆ្នាំ ជាកសិករ
១០-ឈ្មោះ ចាន់ ស្នា ភេទប្រុស អាយុ២៧ឆ្នាំ ជាកសិករ ។
មន្ត្រីនគរបាលបានឲ្យដឹងថា នៅក្នុងការឃាត់ខ្លួនជនសង្ស័យទាំងនោះ សមត្ថកិច្ចបានដកហូតវត្ថុតាងមួយចំនួន ហើយសមាជិកចលនារណសិរ្សរំដោះជាតិទាំង១០នាក់នោះត្រូវបានសមត្ថកិច្ចធ្វើការសាកសួរនិងបំពេញសំណុំរឿងតាមនីតិវិធីដើម្បីបញ្ជូនទៅតុលាការ ។
គួរបញ្ជាក់ថា ចលនារណសិរ្សរំដោះជាតិខ្មែរនេះ ត្រូវបានបង្កើតឡើងដោយឈ្មោះ សម សេរី ហៅ ស សេរី ហៅ យាន យៀប និងបក្សពួកដែលមានមូលដ្ឋាននៅប្រទេសដាណឺម៉ាក ។ ចលនានេះ ត្រូវបានប្រកាសជាផ្លូវការនៅថ្ងៃទី១២ ខែធ្នូឆ្នាំ២០១២នៅប្រទេសថៃ ។
នគរបាលបានបញ្ជាក់ថា ជនសង្ស័យធ្លាប់មានប្រវត្តិធ្វើសកម្មភាពឱ្យមេចលនារណសិរ្សរំដោះជាតិខ្មែរឈ្មោះ សម សេរី ហៅ ស សេរី ហៅ យាន យៀប ជាសមាជិកក្នុងចលនាខ្លារំដោះ (សោម ឯក ជាប្រធាន) ដែលបានរត់គេចខ្លួន បន្ទាប់ពីតុលាការចេញដីកាបង្គាប់ឱ្យចាប់ខ្លួនពាក់ព័ន្ធនឹងសកម្មភាពភេរវកម្មដាក់បង្កៃគ្រឿងបំផ្ទុះក្នុងសួនច្បារមុខទីស្តីការគណៈរដ្ឋមន្ត្រី និងមុខអតីតស្ថានីយទូរទស្សន៍រាជធានីភ្នំពេញ ប៉ុស្តិ៍លេខ៣ កាលពីដើមឆ្នាំ២០០៩ និងសកម្មភាពចាប់ជំរិតប្លន់ប្រដាប់អាវុធ ។
ដោយទ្បែក កាលពីថ្ងៃទី១៤ មីនា ឆ្នាំ២០១៣ សមត្ថកិច្ចនគរបាលជាតិកម្ពុជា សហការជាមួយភូមិន្ទនគរបាលជាតិថៃ បានចាប់ខ្លួនមេខ្លោងរណសិរ្សរំដោះជាតិខ្មែរចំនួន៤នាក់ រួមមាន ៖
១-ឈ្មោះ ថាច់ កុងភួង ហៅ ថាច់ ហ្វាង ហៅ ថាច់ កុសល ភេទប្រុស អនុប្រធានរណសិរ្សរំដោះជាតិខ្មែរ ។
២-ឈ្មោះ កែវ គឹមយ៉ាន ហៅ កែវ គឹមស្រុ៊ន ហៅ យ៉ាន គឹមស្រ៊ុន ភេទប្រុស ជានាយកប្រតិបត្តិការទូទៅរបស់រណសិរ្សរំដោះជាតិខ្មែរ ។
៣-ឈ្មោះ យាន យឿប ភេទប្រុស សកម្មជនរបស់រណសិរ្សរំដោះជាតិខ្មែរ ។
៤-ឈ្មោះ ខេម រ៉ា ភេទប្រុស សកម្មជនរណសិរ្សរំដោះជាតិខ្មែរ ៕
ចែករំលែកព័តមាននេះ