ខេត្តប៉ៃលិន ៖ មានហេតុការណ៍ភ្ញាក់ផ្អើលមួយទាំងព្រឹកព្រលឹម ខណៈកម្លាំងសមត្ថកិច្ចស្នងការនគរបាលខេត្តប៉ៃលិនប្រមាណជាង២០នាក់ ប្រដាប់ដោយអាវុធគ្រប់ដៃ ដែលដឹកនាំដោយលោកជុំ សែនសទ្ធា ព្រះរាជអាជ្ញាអមសាលាដំបូង បាននាំគ្នាសម្រុកចូល
ឆែកឆេរក្នុងផ្ទះថៅកែធ្វើនំប៉័ងមួយកន្លែង ដោយសង្ស័យថា មានលាក់ឈើប្រណីតប្រភេទគ្រញូងរាប់សិបតោន តែដោយធ្វើការឆែកឆេរអស់រយៈពេលរាប់ម៉ោងរកមិនឃើញ គឺមានតែឈើគ្រញូងប៉ុន្មានដុំតូចៗ ដែលម្ចាស់ផ្ទះទុកធ្វើជើងតុប៉ុណ្ណោះ ។ ក្រោយមក កម្លាំងសមត្ថកិច្ចនាំគ្នាត្រឡប់ទៅផ្ទះរៀងៗខ្លួនវិញដោយដៃទទេ ហើយទទួលរងការរិះគន់ពីប្រជាពលរដ្ឋថា នាំកម្លាំងធ្វើការឆែកឆេរផ្ទះប្រជាពលរដ្ឋដោយគ្មានប្រភពច្បាស់លាស់ ។
ហេតុការណ៍នេះ កើតឡើងកាលពីវេលាព្រឹកថ្ងៃទី២៣ តុលា ២០១៤ ស្ថិតនៅភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ។
ប្រភពពីម្ចាស់ផ្ទះឈ្មោះចាន់ សោភា ភេទស្រី អាយុ៤០ឆ្នាំ ជាអ្នកប្រកបរបរធ្វើនំប៉័ង រស់នៅក្នុងភូមិ-សង្កាត់ខាងលើ បានឱ្យដឹងថា នៅវេលាព្រឹកថ្ងៃកើតហេតុ ខណៈមនុស្សម្នាកំពុងនៅក្នុងផ្ទះសុខៗ ស្រាប់តែមានកងកម្លាំងនគរបាលមួយក្រុម ដែលមានគ្នាជាង២០នាក់ ប្រដាប់ដោយកាំភ្លើងវែងខ្លីគ្រប់ដៃ បានរុញទ្វាររបងផ្ទះរបស់គាត់សម្រុកចូលដោយមិនបានសួរនាំអ្វីទាំងអស់ ដូចជាចោរចូលមកប្លន់នៅក្នុងផ្ទះរបស់គាត់អ៊ីចឹង ទើបធ្វើឱ្យគាត់មានការភ័យស្លន់ស្លោយ៉ាងខ្លាំង ។
ស្ត្រីម្ចាស់ផ្ទះបន្តទៀតថា ផ្ទះរបស់គាត់ប្រកបមុខរបររកស៊ីស្របច្បាប់ មិនធ្លាប់មានរកស៊ីបទល្មើសឈើប្រណីតខុសច្បាប់ឡើយ ។ ម្យ៉ាងវិញទៀត បើមាននរណាម្នាក់រាយការណ៍ថា មានបទល្មើសឈើប្រណីត ឬអ្វីផ្សេងៗ ខាងសមត្ថកិច្ចគួរតែមកសួរនាំជាមុនសិន បើសិនជាម្ចាស់ផ្ទះមិនអនុញាតឱ្យចូល ទើបសមនឹងសម្រុកចូលទៅធ្វើការឆែកឆរចុះ ។
ពាក់ព័ន្ធទៅនឹងបញ្ហានេះ លោកជា រ៉ាវុធ នាយរងការិយាល័យព្រហ្មទណ្ឌកម្រិតស្រាលនៃស្នងការនគរបាលខេត្ត ដែលជាអ្នកដឹកនាំកម្លាំងចុះប្រតិបត្តិការរឿងនេះ បានប្រាប់ឱ្យដឹងថា ការចុះទៅឆែកឆេរនេះ គឺធ្វើឡើងដោយមានការសង្ស័យថា ផ្ទះអ្នកធ្វើនំប៉័ងលក់ខាងលើ មានការលាក់ ឬជួញដូរឈើប្រណីតដែលខុសច្បាប់ ទើបកម្លាំងរបស់លោក ដឹកនាំបញ្ជាផ្ទាល់ពីលោកជុំ សែនសទ្ធា ព្រះរាជអាជ្ញាអមសាលាដំបូងខេត្ត និងក្រឡាបញ្ជី២រូបទៀត ដើម្បីចុះទៅធ្វើការឆែកឆេរលំនៅដ្ឋាននោះតែម្តង ។
ចំណែកលោកឧត្តមសេនីយ៍ត្រីជា ចាន់ឌិន ស្នងការនគរបាលខេត្តប៉ៃលិនបានឱ្យដឹងតាមទូរស័ព្ទ កាលពីវេលាម៉ោង១០ និង៣៨នាទីព្រឹកថ្ងៃទី២៤ តុលា នេះថា សមត្ថកិច្ចលោកមួយចំនួន មានព្រហ្មទណ្ឌកម្រិតស្រាល កងកម្លាំងអន្តរាគមន៍ ពិតជាបានចុះទៅឆែកឆេរផ្ទះលក់នំប៉័ងមួយកន្លែងនោះមែន ព្រោះមានគេរាយការណ៍ថា នៅក្នុងផ្ទះនោះមានលួចលាក់ដាក់ឈើប្រណីតជាច្រើនដុំ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ