រាជធានីភ្នំពេញ ៖ រហូតមកទល់ពេលនេះ តារាសម្តែង និងតារាចម្រៀងបញ្ញា សិទ្ធិ នៅមិនទាន់ស្ថានទូតអាមេរិកផ្តល់ទិដ្ឋាការឱ្យទៅសម្តែងនៅអាមេរិកនៅឡើយទេ បន្ទាប់ពីរាំងស្ទះ៣ខែ មកហើយ ។ ការរាំងស្ទះដំណើរនោះព្រោះតែស្ថានទូតមិនទុកចិត្តបន្ទាប់ពីមានតារាខ្មែរគេចមិនត្រឡប់មកស្រុកវិញពេលទៅសម្តែងនៅអាមេ រិក ។ ដោយសារតែចង់ឱ្យស្ថានទូតទុកចិត្ត លោកបញ្ញា សិទ្ធិ យកប្លង់ដី ប្លង់ផ្ទះមានតម្លៃរាប់ម៉ឺនដុល្លារទៅរក្សាទុកនៅស្ថានទូត ដើម្បីធានាខ្លួន ។
រយៈពេលប៉ុន្មានលើកមកហើយ ស្ថានទូតអាមេរិក ណាត់សម្ភាសន៍តារាសម្តែង និងអតីតតារាចម្រៀងប្រចាំផលិតកម្មក្លាសីុក លោកបញ្ញា សិទ្ធិ តែបរាជ័យរហូតធ្វើឱ្យលោកល្វីងមុខ។ បន្ទាប់ពីសម្ភាសន៍ធ្លាក់លើកទីមួយមក លោកបញ្ញា សិទ្ធិ បានរកអ្នកជួយធានាជាម្ចាស់ក្លឹបកម្សាន្តល្បីមួយ និងអគ្គនាយកស្ថានីយទូរទស្សន៍មួយ តែនៅតែមិនទទួលលទ្ធផលល្អឡើយ ។
ឱ្យតែមានអ្នកសួរនាំរឿងទៅអាមេរិក លោកបញ្ញា សិទ្ធិ មានអារម្មណ៍ខឹងសិល្បករមួយចំនួនដែលគេចមិនត្រឡប់មកស្រុកវិញ ជាហេតុធ្វើឱ្យប៉ះពាល់ដល់អ្នកសិល្បៈផ្សេងទៀតរាប់ទាំងរូបលោកផង ។ក្នុងជំនួបកាលពីពេល ថ្មីៗនេះ បញ្ញា សិទ្ធិ ដែលចូលរួមថតចម្រៀងកាយវិការឱ្យផលិតកម្មសាន់ដេ បាននិយាយថា ដំណើរចេញទៅអាមេរិកដើម្បីសម្តែងរបស់លោកដាច់ខាតលោកមិនបោះបង់ឡើយ ព្រោះលោកបានព្យាយាមរត់ការពឹងគេឱ្យជួយបន្តពីមួយទៅមួយ រាប់ទាំងមេនៅកន្លែងធ្វើការទៀតផង ។
លោកសិទ្ធិ បានទៅស្ថានទូតអាមេរិកសម្ភាសន៍ច្រើនលើកហើយ តែនៅតែមិនទាន់បានសិទ្ធិដោយគេថា ខ្វះនេះ ខ្វះនោះ ។ លោកសិទ្ធិ យល់ថា ស្ថានទូតតឹងតែង ព្រោះតែមានអ្នកទៅសម្តែងនៅអាមេរិកមិនត្រឡប់មកស្រុកវិញ ដែលជាគំរូអាក្រក់។ លោកបញ្ញាសិទ្ធិ និយាយទាំងខឹងថា «ការសម្ភាសមិនជាលំបាកទេ គេសួរ ធម្មតាៗដូចជាទៅប៉ុន្មានខែ0x017d7 ចូលសិល្បៈយូរ ឬនៅ? ធ្លាប់សម្តែងនៅបរទេសច្រើនដង ឬទេ0x017d7 លុះសួរនាំចប់បែរជាអត់ទាន់មានភ្លើងខៀវម្តងហើយម្តងទៀត ។ ម្ល៉ោះហើយ ដើម្បីឱ្យគេជឿជាក់ខ្ញុំបានយកប្លង់ដីប្លង់ផ្ទះដាក់នៅទូតតម្កល់ទុកឱ្យណាណីម្តង ដើម្បីឱ្យគេជឿថា ខ្ញុំគ្មានបំណងរត់ទៅណាទេ ព្រោះប្លង់ទាំងនោះគិតជាដុល្លាររាប់ម៉ឺនដុល្លារឯណោះ រឿងអីខ្ញុំរត់ចោល ទទេៗ» ។ ប្លង់ដី ប្លង់ផ្ទះនោះជារបស់ឪពុកលោកបញ្ញាសិទ្ធិ នៅខេត្តបាត់ដំបង សម្រាប់ធានាខ្លួន ព្រោះតែលោកចង់ចេញទៅសម្តែងនៅអាមេរិក ។
ក្រៅពីលោកបញ្ញា សិទ្ធិ តារាចម្រៀង កញ្ញាអេនីហ្សាម របស់ផលិតកម្មថោន ក៏បានយកប្លង់ដី ប្លង់ផ្ទះដាក់តម្កល់នៅស្ថានទូតអាមេរិកដែរ ដើម្បីធានាខ្លួនបានទៅអាមេរិក ។ លោកបញ្ញា សិទ្ធិ ឱ្យដឹងថា ស្ថានទូតអាមេរិក នៅមិនទាន់អនុញ្ញាតឱ្យលោកទៅអាមេរិកដោយសារតែលោកឮថាគេកំពុងតែពិនិត្យមើលឈ្មោះអ្នកសិល្បៈដែលទៅសម្តែងនៅអាមេរិក ហើយអត់បានមកវិញដើម្បីចាត់ការឱ្យរួចរាល់សិន ។
ក្នុងអំឡុងពេេលមិនទាន់មានសិទ្ធិទៅអាមេរិកនេះ លោកបញ្ញា សិទ្ធិ ទទួលយកការងារសិល្បៈជាបន្តបន្ទាប់ ពិសេសក្នុងពិធីបុណ្យអុំទូកនាពេលខាងមុខនេះ លោកមានកម្មវិធីសម្តែងឱ្យទូរទស្សន៍ និងក្រុមហ៊ុនមួយចំនួន ៕
ចែករំលែកព័តមាននេះ