រាជធានីភ្នំពេញ ៖ បុរសម្នាក់បាននាំមិត្តភក្តិ២នាក់ទៀតមកចូលរួមកម្មវិធីខួបកំណើតសង្សាររបស់ខ្លួន ដោយសង្ឃឹមថានឹងបានសប្យាយ ប៉ុន្តែបានក្លាយជាទុក្ខទៅវិញ បន្ទាប់ពីបុរសរូបនេះអន់ចិត្តជាមួយនារីជាសង្សារ មិនសូវរវីរវល់ជាមួយ រហូតឈានទៅមានជម្លោះគ្នាជាមួយភ្ញៀវដែលចូលរួមក្នុងពិធី ហើយត្រូវគូជម្លោះព្រួតគ្នាវាយយ៉ាងដំណំ ។ហេតុការណ៍នេះកើតឡើងកាលពីវេលាម៉ោង១ និង ២០ នាទីអាធ្រាត្រ ឈានចូលថ្ងៃទី២២ តុលា ២០១៤ នៅចំណុចមុខភោជនីយដ្ឋាន ហេង ហេង ផ្លូវ២២១កែង និងផ្លូវលេខ១១២ ស្ថិតក្នុងសង្កាត់ផ្សារដេប៉ូ៣ ខណ្ឌទួលគោក។
ប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញបុរសម្នាក់ ដែលជាសង្សារម្ចាស់ខួប កំណើតបាននាំបុរសពីរនាក់ទៀតដែលជាមិត្តភក្តិរបស់ខ្លួន ដើម្បីមកចូលរួមក្នុងពិធីខួបកំណើតសង្សាររបស់ខ្លូន ដោយនាំគ្នាផឹកស៊ីសប្បាយជុំគ្នាតាំងពីម៉ោង៩យប់ រហូតមកដល់ម៉ោងកើតហេតុ ។ ពេលនោះបុរសជាសង្សារម្ចាស់ខួបកំណើតមានការអន់ចិត្តជាមួយនារីជាសង្សារ ដោយមិនសូវមករវីរវល់មកជល់កែវស្រាជាមួយគេទើបបុរសរូបនោះខឹងក៏បានបោកកែវស្រាលាន់ប្រាវបង្កឱ្យមានការភ្ញាក់ផ្អើលដល់ភ្ញៀវ ដែលម្ចាស់ខួបបានអញ្ជើញមកចូលរួមហើយក៏ឈានទៅមានជម្លោះជាមួយក្រុមក្មេងស្ទាវមួយក្រុមដែលចូលរួមក្នុងពិធីនោះផងដែរ។
បើតាមលោកអនុសេនីយ៍ទោ ផាន សារ៉ាត់ នាយប៉ុស្តិ៍នគរបាលរដ្ឋបាលផ្សារដេប៉ូ៣ដែលដឹកនាំកម្លាំងចុះអន្តរាគមន៍ផ្ទាល់បានឱ្យដឹងថា ដោយយោងទៅតាមប្រភពព័ត៌មានដែលទទួលបាន គឺបន្ទាប់ពីឈ្លោះប្រកែកគ្នាជាមួយ និងក្រុមក្មេងស្ទាវមួយក្រុមហើយនោះ បុរសរងគ្រោះទាំងបីនាក់នាំគ្នាដើរចេញពីក្នុងហាងដើម្បីយកម៉ូតូជិះត្រឡប់ទៅផ្ទះ ព្រោះភាគីជម្លោះគេមានគ្នាច្រើន ។ ខណៈជិះម៉ូតូចេញបានប្រហែល១០ម៉ែត្រពីកន្លែងធ្វើពីធីខួបកំណើត ស្រាប់តែដួលម៉ូតូដោយសារអ្នកបើកភ័យខ្លាចក្រុមក្មេងស្ទាវដេញវាយ ពេលនោះហើយក្រុមក្មេងស្ទាវដែលជាគូជម្លោះឃើញឱកាសល្អ ក៏នាំគ្នាព្រួតគ្នាវាយបុរសទាំងបីនាក់រងរបួសយ៉ាងដំណំហើយត្រូវកម្លាំងសមត្ថកិច្ចរបសលោកមកជួយអន្តរាគមន៍ ឃាត់ខ្លួនបានមនុស្សប្រុស-ស្រី៤នាក់ ។
ក្រោយពេលកើតហេតុជនរងគ្រោះទាំង៣នាក់ ត្រូវបានគេបញ្ជូនទៅសង្រ្គោះនៅមន្ទីរពេទ្យ ចំណែកជនសង្ស័យប្រុស-ស្រី ៤នាក់ដែលសមត្ថកិច្ចឃាត់ខ្លួនបានគឺត្រូវបាននាំទៅសួរនាំនៅប៉ុស្តិ៍នគរបាលរដ្ឋាបាលផ្សារដេប៉ូ៣ ។
ចែករំលែកព័តមាននេះ