រាជធានីភ្នំពេញ ៖ វិថីទំនប់បឹងទំពុន ហៅផ្លូវ៣៧១ មានប្រវែង៤.៣៦៥ម៉ែត្រ ស្ថាបនាដោយបេតុងឆ្អឹងដែក កម្រាស់២តឹក ដោយក្រុមហ៊ុន BBE ដែលមានលោក សៅ សាវ័ន្ត ជាប្រធាន បានបើកការដ្ឋានថ្ងៃទី១១ មិថុនា ២០១៣ ។ កាលអើយ… កាលណោះ… ពេលបើកការដ្ឋាន កោះសន្តិភាពបានផ្សាយតាមពាក្យគេអួតអាងថា ផ្លូវនេះជាផ្លូវគំរូ… ទំហំនៃការសាងសង់ និងការចំណាយប្រមាណជាង២លានដុល្លារ ជាថវិការដ្ឋ អាចមានគុណភាព និងប្រើប្រាស់បានពី២០ទៅ៣០ឆ្នាំ អត់ខូចឡើយ ។
ប៉ុន្តែម្ចាស់ថ្លៃអើយ… គួរឱ្យទុកចិត្តដូចអាំងផេះមែន… វាពុកផុយ… បាក់ដោយដុំធំៗប្រមាណ៦កន្លែង… តាំងតែពី៣ខែមុនមកម្លេ៉ះ ហើយត្រូវបានក្រុមហ៊ុន BBE ជួសជុលផាត់ម្សៅ វ៉ៃក្រែម រួចទៅហើយដែរ គឺវ៉ៃរហ័ស ដករហ័ស… ដែលមើលសម្បកក្រៅទៅ ស្អាតភ្លឹងដូចតួល្ខោន-យីកេពីបុរាណ ឱ្យល្អគយគន់នៅលើឆាក… ដែលស្ថាបនារួចបានជាងមួយឆ្នាំប៉ុណ្ណោះ ។ អ្នកអានពីគ្រប់មជ្ឈដ្ឋានទូរស័ព្ទប្រាប់កោះសន្តិភាពជាបន្តបន្ទាប់ថា ក្រណាត់កាលណាពុកផុយហើយ… ប៉ះពីកន្លែងមួួយ វាទៅរហែកកន្លែងមួយទៀត… មិនយូរទេវានឹងក្លាយទៅជា «បំណះ» ចម្រុះពណ៌យ៉ាងពិតប្រាកដមិនខានឡើយ ។
មិនអាចនិយាយបានថារដ្ឋចាញ់បោកក្រុមហ៊ុនបានទេ ហើយក៏មិនអាចនិយាយថាឱ្យ BBE សងវិញបានដែរ… ព្រោះគេយកប្រាក់ យកគំនិតឈ្នះអស់ទៅហើយ ។ គឺរដ្ឋទេដែលអន់ ឱ្យគេបោកប្រាស់បាន ហើយគួរតែរាង… ។ ផ្លូវ «គំរក់» មួយនេះ រំលងចប់ទៅដោយស្ងៀមស្ងាត់… ស្រាប់តែមានដំណឹងច្បាស់ការណ៍ថា ក្រុមហ៊ុនដ៏អស្ចារ្យរ៉ុយៗនេះមានសំណាងសាងសង់ផ្លូវបេតុងលេខ១០០៣ ក្នុងខណ្ឌសែនសុខ ផ្លូវលេខ៥៩៨ ហៅផ្លូវ ជា សុផារ៉ា ផ្លូវហាណូយ ផ្លូវលេខ៤៣០ ក្រោយមន្ទីរពេទ្យរុស្ស៊ី… គម្រោងមួយៗសុទ្ធតែមានតម្លៃរាប់លានដុល្លារ… អត់ដេញថ្លៃទេ… ដែលសុទ្ធតែយកគំរូតាមផ្លូវលេខ៣៧១ ដូចគ្នា ត្រូវបានក្រុមហ៊ុនមានស្នាដៃល្អដូចផ្លូវលេខ៣៧១នេះ ទទួលស្ថាបនាដែរ… ហេ ! ហេ !
ក្រុមអ្នកសង្កេតការណ៍យល់ថា បើផ្លូវធំៗដូចរៀបរាប់ខាងលើ ទុកឱ្យក្រុមហ៊ុនសាងសង់យកគំរូតាមផ្លូវលេខ៣៧១ សង្ស័យក្លាយជា «ផ្លូវគំរក់» ដូចគ្នាមិនខានឡើយ ។ គេថាក្រុមហ៊ុននេះគ្មានគ្រឿងចក្រគ្រប់គ្រាន់សម្រាប់ស្ថាបនាទេ ទំនងជួលបន្តពីគេស្ទើរទាំងអស់ ។ ប្រទេសដែលកំពុងអភិវឌ្ឍ គេសាងសង់អត់ឈប់ទេ… ធ្វើទៅមុខ ខូចអាក្រោយ… រួចធ្វើដដែលឡើងវិញ… គិតតែពីធ្វើអាដែលៗ… រាប់ឆ្នាំតរៀងទៅ ទើបអាចឱ្យឈ្មោះបានថាជាប្រទេសកំពុងអភិវឌ្ឍ ហើយកុំអាលដេកសង្ឃឹមថាអាចរីកចម្រើនបាន ។ បើមិនអុីចឹង ម៉េចត្រូវពិភពលោកឱ្យឈ្មោះថាប្រទេសកំពុងអភិវឌ្ឍ ? កម្ពុជាឧស្សាហ៍ព្យាយាមណាស់ គួរឱ្យអាណិតស្រឡាញ់ គួរឱ្យជំនួយ… គិតតែពីកសាង ស្ថាបនាអត់ឈប់ !!!
មតិជាច្រើនបានកត់សម្គាល់ថា មានតែផ្លូវលេខ២៧១ និងផ្លូវកម្ពុជាក្រោមទេដែលរឹងមាំ ស្អាតភ្លឹងជាង១០ឆ្នាំកន្លងមកនេះ ។ ផ្លូវ២ខ្សែនេះអាចជាគំរូបានសម្រាប់រាជធានីភ្នំពេញ មិនមែនផ្លូវលេខ៣៧១ ដ៏ចម្លែកនេះទេ ។ ផ្លូវពីរខ្សែនេះជាស្នាដៃរបស់ក្រុមហ៊ុនឧកញ៉ា ម៉ុង ឫទ្ធី ដែលគួរកត់ត្រាទុក ដែលក្រៅពីនេះ ចោលលុយស្ទើរទាំងអស់… មើលចុះផ្លូវ៥០+៥០ ក្នុងរាជធានី រលាយរលំស្ទើរអស់ទៅហើយ ។ កោះសន្តិភាពមិនអាចសុំការបំភ្លឺបានទេពីក្រុមហ៊ុន BBE ម្សិលមិញនេះ ព្រោះទូរស័ព្ទមិនចូល ៕
ចែករំលែកព័តមាននេះ