ខេត្តមណ្ឌលគិរី ៖ ប្រជាសហគមន៍ជនជាតិដើមភាគតិចព្នងជិត៣០០នាក់មកពី៧ភូមិក្នុងឃុំប៊ូស្រា ស្រុកពេជ្រាដា បានប្រមូលផ្តុំគ្នាធ្វើបាតុកម្មអហិង្សាមួយនៅមុខសាលាឃុំប៊ូស្រា កាលពីថ្ងៃទី១៥ កញ្ញា តវ៉ាឱ្យរាជរដ្ឋាភិបាលបញ្ឈប់ក្រុមហ៊ុនសម្បទាន ដែលធ្វើទុក្ខបុកម្នេញរំលោភសិទ្ធិជនជាតិដើម ។ ក្នុងសកម្មភាពនោះគេសង្កេតឃើញថា ក្រុមអ្នកភូមិបានទាមទារឱ្យអាជ្ញាធរផ្ដល់ដំណោះស្រាយពិតប្រាកដ ទើបពួក គាត់បញ្ឈប់ការតវ៉ា ។
ប្រជាពលរដ្ឋបានលើកបដា និងថ្លែងថ្កោលទោសក្រុមហ៊ុនសម្បទានសេដ្ឋកិច្ចនៅតំបន់នោះពីការរំលោភសិទ្ធិដីធ្លី ព្រៃឈើធនធានធម្មជាតិ ការប្រើប្រាស់កងសន្តិសុខក្រុមហ៊ុនប្រដាប់ដោយអាវុធបាញ់គំរាមកំហែងពលរដ្ឋ និងជីកប្រឡាយបិទផ្លូវធ្វើដំណើររបស់ពលរដ្ឋចូលព្រៃរកអនុផលព្រៃឈើ រួមទាំងទាមទារឱ្យរាជរដ្ឋាភិបាលបញ្ឈប់អាជ្ញាប័ណ្ណក្រុមហ៊ុន និងទាមទារឱ្យអាជ្ញាធរដោះស្រាយបញ្ហាពាក់ព័ន្ធទាំងអស់ឱ្យមានប្រសិទ្ធភាព ។ សមត្ថកិច្ចនគរបាល និងកងរាជអាវុធហត្ថជាង២០នាក់ត្រូវបានដាក់ពង្រាយការពារសុវត្ថិភាពនៅកន្លែងធ្វើបាតុកម្ម ក៏ប៉ុន្តែមិនមានការរារាំង ឬប៉ះទង្គិចណាមួយរវាងកងកម្លាំង និងអ្នកតវ៉ានោះទេ ហើយលោកអភិបាលស្រុក និងមន្ត្រីក្រុមប្រឹក្សាស្រុក ព្រមទាំងក្រុមប្រឹក្សាឃុុំ ក៏បានចូលរួមស្ដាប់ការតវ៉ានោះដែរ ។
ឆ្លើយតបភា្លមៗចំពោះអ្នកតវ៉ា អភិបាលស្រុកពេជ្រាដា លោក នួន សារ៉ន មានប្រសាសន៍ថា សំណូមពរប្រជាពលរដ្ឋទាក់ទិនបញ្ហាជីកប្រឡាយបិទផ្លូវ គឺអាជ្ញាធរបានសម្រេចឱ្យក្រុមហ៊ុនលុបប្រឡាយនោះវិញហើយ។ ដោយឡែកបញ្ហាសន្តិសុខក្រុមហ៊ុនដែលបាញ់បង្ករបួសស្នាមប្រជាពលរដ្ឋ អាជ្ញាធរបានចាត់វិធានការតាមចាប់ខ្លួនហើយដែរ ។ ចំណែកបញ្ហាទាមទារឱ្យបញ្ឈប់អាជ្ញាប័ណ្ណក្រុមហ៊ុន លោកអភិបាលស្រុកសន្យាថា នឹងធ្វើរបាយការណ៍ជូនអាជ្ញាធរខេត្តដោះស្រាយបន្ត។ ជាមួយនោះដែរ លោកក៏បានសំណូមពរឱ្យប្រជាពលរដ្ឋអត់ធ្មត់ រង់ចាំដំណោះស្រាយចៀសវាងប្រព្រឹត្តអំពើអ្វីធ្វើឱ្យប៉ះពាល់វិធានការច្បាប់ទាក់ទិនការធ្វើបាតុកម្ម ។
គួរបញ្ជាក់ដែរថា កាលពីថ្ងៃទី១២ កញ្ញា សហគមន៍ឃុំប៊ូស្រា បានធ្វើលិខិតជូនដំណឹងមកអាជ្ញាធរឃុំ ស្រុក ស្ដីពីការធ្វើបាតុកម្មអហិង្សានៅមុខសាលាឃុំ ចាប់ពីថ្ងៃទី១៥ ដល់ថ្ងៃទី៣០ កញ្ញា តវ៉ាប្រឆាំងក្រុមហ៊ុនសម្បទានសេដ្ឋកិច្ចចំនួន៥ រួមមាន ក្រុមហ៊ុនអិល.ខេ.អិល (LKL) ក្រុមហ៊ុនខេ.ហ្វើស (K-First) ក្រុមហ៊ុនមេហ្គា ហ្វើស (Mega-First) ក្រុមហ៊ុនសុខហ្វីន (Socfin) និងក្រុមហ៊ុនដាក់ឡាក់ (Daclak) ។
រហូតមកដល់ម៉ោងជាង៤រសៀលថ្ងៃដដែល (ថ្ងៃទី១៥ កញ្ញា) ក្រុមអ្នកតវ៉ាបាននាំគ្នារំសាយចាកចេញពីកន្លែងតវ៉ា ។ បុ៉ន្តែពួកគេបានអះអាងថា បើសិនជាការទាមទារមិនបានសម្រេចទេ គេមានគម្រោងធ្វើបាតុកម្មបិទផ្លូវតំបន់ទេសចរណ៍ទឹកជ្រោះប៊ូស្រា រួមទាំងនាំគ្នាប្រមូលផ្តុំធ្វើបាតុកម្មប្រឆាំងនៅការដ្ឋានក្រុមហ៊ុន និងមុខសាលាស្រុកបន្តទៀត រហូតទទួលបានដំណោះស្រាយដែលអាចទទួលយកបាន ៕
ចែករំលែកព័តមាននេះ