ខេត្តព្រះសីហនុ ៖ ម្តាយមីងវ័យជាង៤០ឆ្នាំម្នាក់ និងក្មួយប្រុសអាយុ៥ឆ្នាំបានលង់ទឹកស្លាប់ទាំង២នាក់ ខណៈពួកគេទៅបោកសំលៀកបំពាក់នៅក្បែរស្រះទឹក(រណ្តៅជីកយកអាចម៍ដី)ដែលមានជម្រៅជាង៣ម៉ែត្រ។
ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង២ និង៣០នាទីរសៀល ថ្ងៃទី២ កញ្ញា ២០១៤ នៅចំណុចស្រះទឹកខាងក្រោយសាលាឃុំជើងគោ ស្ថិតក្នុងភូមិចំការកៅស៊ូ ឃុំជើងគោ ស្រុកព្រៃនប់។
តាមប៉ូលិសស្រុកព្រៃនប់ដែលចុះទៅចំណុចកើតហេតុបានឱ្យដឹងថា ស្ត្រីដែលលង់ទឹកស្លាប់ឈ្មោះយ៉ា ខ្នេរ អាយុ៣៩ឆ្នាំ រីឯក្មួយប្រុសបង្កើតដែលស្លាប់ជាមួយគ្នាដែរនោះឈ្មោះយ៉ា ណារី អាយុ៥ឆ្នាំ មានទីលំនៅក្នុងក្រុម៤ ភូមិ-ឃុំកើតហេតុខាងលើចម្ងាយប្រហែល១០០ម៉ែត្រពីកន្លែងកើតហេតុ។
ប្រភពដដែលបានបន្តថា មុនពេលមានការផ្អើលឆោឡោពីអ្នករស់នៅក្បែរកន្លែងកើតហេតុនោះគេឃើញស្ត្រីរងគ្រោះ និងក្មួយប្រុសយកសម្លៀកបំពាក់ទៅបោកនៅមាត់ស្រះដែលជាកន្លែងបោកគក់រាល់ដង លុះទៅដល់មាត់ស្រះបានមួយសន្ទុះ ក្មួយប្រុសដែលទៅជាមួយបានជ្រុះស្បែកជើងចូលក្នុងស្រះក៏ឈោងដៃយកស្រាប់តែរអិលជើងធ្លាក់ចូលក្នុងស្រះ ឃើញដូចនោះស្ត្រីរងគ្រោះបានរត់មកឈោងដៃចាប់ក្មួយបុ្រសក៏រអិលជើងធ្លាក់ទៅក្នុងស្រះទឹកដែលមានជម្រៅជាង៣ម៉ែត្រដែរបណ្តាលឱ្យលង់ស្លាប់ទាំង២នាក់មីង និងក្មួយតែម្តង៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ