រាជធានីភ្នំពេញ ៖ ស្ត្រីម្នាក់បានចេញពីផ្ទះ២ថ្ងៃ មិនដឹងមានវិបត្តិអ្វីទេ ។ ពេលត្រឡប់ទៅដល់ផ្ទះវិញ ស្ត្រីនោះបានទាញកាំបិតដេញកាប់ប្តីមិនឱ្យចូលផ្ទះ រួចបិទទ្វារផ្ទះ និងទ្វាររបង ។ ខណៈនៅក្នុងផ្ទះម្នាក់ឯង នាងផឹកថ្នាំពុលប៉ងធ្វើអត្តឃាត ប៉ុន្តែក្រុមគ្រួសារ និងប៉ូលិសមូលដ្ឋានគាស់ទ្វារផ្ទះចូលទៅមើល ហើយដឹកបញ្ជូនទៅមន្ទីរពេទ្យសង្គ្រោះទាន់ពេលវេលា ។
ហេតុការណ៍បានកើតឡើងកាលពីវេលាម៉ោង១០និង១០នាទីព្រឹក ថ្ងៃទី២ កញ្ញា នៅក្រុមទី៥ ភូមិថ្មគោល សង្កាត់ចោមចៅ ខណ្ឌពោធិ៍សែនជ័យ ។ ស្ត្រីរូបនោះឈ្មោះលី ណាវី អាយុ៣២ឆ្នាំ មានកូន២នាក់ និងប្តីជាវិស្វករ តែមិនប្រាប់ឈ្មោះឡើយ ។ ប៉ូលិសឱ្យដឹងថា ២នាក់ប្តីនិងប្រពន្ធនោះមិនដឹងថាមានទំនាស់អ្វីជាមួយគ្នាទេ ។ ស្ត្រីជាប្រពន្ធចេញពីផ្ទះ២ថ្ងៃ លុះពេលត្រឡប់ទៅផ្ទះវិញបានឈ្លោះគ្នាជាមួយប្តី ។ មិនតែប៉ុណ្ណោះ ស្ត្រីជាប្រពន្ធបានទាញកាំបិតដេញកាប់ប្តី មិនឱ្យចូលផ្ទះ រួចបិទទ្វារផ្ទះ និងចាក់សោទ្វាររបង ។ នៅក្នុងផ្ទះម្នាក់ឯង នាងលី ណាវី ផឹកថ្នាំពុល ប៉ងធ្វើអត្តឃាត ។
ដោយសង្ស័យមានរឿងមិនល្អកើតឡើង ក្រុមគ្រួសារបានប្តឹងប៉ូលិស និងអាជ្ញាធរភូមិ រួចនាំគ្នាគាស់ទ្វារចូលទៅមើល ។ ពេលឃើញនាងលី ណាវី ផឹកថ្នាំពុល ក្រុមគ្រួសារបានដឹកទៅសង្គ្រោះនៅគ្លីនិកឯកជន «អង្គរ» តែដោយមានអាការធ្ងន់ ទើបបញ្ជូនបន្តទៅមន្ទីរពេទ្យមិត្តភាពខ្មែរ-សូវៀត ។ គ្រូពេទ្យបានជួយស្ត្រីរូបនោះ រួចផុតពីក្តីស្លាប់ហើយ ។ មន្ត្រីប៉ូលិសបន្តថា ទំនាស់ឈានដល់ការដេញកាប់ប្តី រួចប៉ងបញ្ចប់ជីវិតខ្លួនឯងនេះ សង្ស័យបណ្តាលមកពីរឿងលេងល្បែងស៊ីសង ។ តាមអ្នកជិតខាងខ្លះប្រាប់ប៉ូលិសថា កន្លងមកស្ត្រីជាប្រពន្ធធ្លាប់ចាញ់ល្បែងអស់ម៉ូតូ២ទៅ៣គ្រឿងមកហើយ នៅតែមិនព្រមកែខ្លួន ។ លើកក្រោយនេះទំនងជាត្រូវប្តីស្តីបន្ទោស ទើបទៅជាឈ្លោះទាស់ទែងគ្នា និងប៉ងសម្លាប់ខ្លួន ។
ទោះបីជាបែបណាក្តី ព័ត៌មាននេះគ្រាន់តែជាការអះអាងរបស់អ្នកជិតខាង និងសមត្ថកិច្ចប៉ុណ្ណោះ រីឯនាងលី ណាវី និងប្តី មិនបានបំភ្លឺឱ្យដឹងបែបណាឡើយ ៕
ចែករំលែកព័តមាននេះ