រាជធានីភ្នំពេញ ៖ ជនសង្ស័យ៣នាក់ពាក់ព័ន្ធនឹងសកម្មភាពឆក់ និងប្លន់ប្រដាប់អាវុធច្រើនករណីកន្លងមក កាលពីថ្ងៃទី១ កញ្ញា ត្រូវបានសមត្ថកិច្ចកងរាជអាវុធហត្ថបញ្ជូនទៅកាន់សាលាដំបូងរាជធានីភ្នំពេញ ។ ជនសង្ស័យទាំង៣នាក់មាន ១-ឈ្មោះ ព្រំ ច័ន្ទសំណាង ហៅរស់ ភេទប្រុស អាយុ២៦ឆ្នាំ ស្នាក់នៅផ្ទះលេខ២០១ ផ្លូវជាតិលេខ៥ ភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ ២-ឈ្មោះ ព្រំ ធារិទ្ធ ហៅបូ ភេទប្រុស អាយុ២៨ឆ្នាំ មុខរបរមិនពិតប្រាកដ ស្នាក់នៅផ្ទះជួល ផ្លូវលំ សង្កាត់ស្រះចក ខណ្ឌដូនពេញ និង៣-ឈ្មោះ ផល សកណា ហៅជ្រូក ភេទប្រុស អាយុ២៦ឆ្នាំ មុខរបរនិងស្នាក់នៅមិនពិតប្រាកដ ។
លោកវរសេនីយ៍ទោ ម៉ាំង សុខលុច ប្រធានការិយាល័យស្រាវជ្រាវបទល្មើសព្រហ្មទណ្ឌនៃទីបញ្ជាការកងរាជអាវុធហត្ថរាជធានីភ្នំពេញឱ្យដឹងថា ជនសង្ស័យ២នាក់ក្នុងចំណោមពួកគេ ត្រូវបានកម្លាំងកងរាជអាវុធហត្ថ ខណ្ឌចំការមន ឃាត់ខ្លួនកាលពីថ្ងៃទី២៩ សីហា និងម្នាក់ទៀត កម្លាំងកងរាជអាវុធហត្ថខណ្ឌដូនពេញស្រាវជ្រាវឃាត់ខ្លួននៅថ្ងៃទី៣០ សីហា ។ លោកម៉ាំង សុខលុច បន្តថា ការឃាត់ខ្លួនជនសង្ស័យបានធ្វើឡើងតាមការស្រាវជ្រាវ និងដោយមានបទបញ្ជារបស់លោកឧត្តមសេនីយ៍ទោ រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ ដែលរាល់កិច្ចប្រជុំលោកតែងដាស់តឿនដល់មន្ត្រីជំនាញ ត្រូវធ្វើបែបណាស្រាវជ្រាវចាប់ជនសង្ស័យឱ្យច្បាប់វិនិច្ឆ័យទោស ដោយមិនអាចឱ្យពួកគេរស់នៅក្រៅសំណាញ់ច្បាប់ឡើយ ។
ជនសង្ស័យ៣នាក់មាន២នាក់ជាជនឆក់ និងប្លន់ប្រដាប់អាវុធដែលធ្លាប់ធ្វើសកម្មភាពច្រើនករណីកន្លងមក ហើយត្រូវសមត្ថកិច្ចចាត់ទុកថា ជាមុខសញ្ញាចាស់ និងម្នាក់ទៀតក៏ជាជនសកម្មខាងឆក់ខ្សែក ទូរស័ព្ទដៃ កាបូបប្រាក់ ពីអ្នកដំណើរ និងមានបក្សពួកគេមួយក្រុមផ្សេងទៀត ។ ជនសង្ស័យទាំង៣នាក់ត្រូវបានតំណាងអយ្យការចោទប្រកាន់ជាផ្លូវការពីបទលួច មានស្ថានទម្ងន់ទោស និងប្រើអាវុធភ្ជង់ប្លន់យកម៉ូតូ និងឆក់សម្ភារ ។ ការចោទប្រកាន់របស់តំណាងអយ្យការ នឹងឱ្យខាងចៅក្រមសើុបសួរសម្រេចឃុំខ្លួនពួកគេដាក់ពន្ធនាគារជាបណ្តោះអាសន្ន ៕
ចែករំលែកព័តមាននេះ