ខេត្តព្រះសីហនុ ៖ សំណង់ហ៊ុមព័ទ្ធយកដីឆ្នេរសមុទ្រ និងសំណង់លំនៅដ្ឋាននៅលើដីឆ្នេរសមុទ្រមួយកន្លែងផ្សេងទៀត ដែលមានទីតាំងស្ថិតនៅជិតរោងចក្រប្រេងកាត ភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ កំពុងតែដំណើរការសាងសង់រំលោភយកដីឆ្នេរសមុទ្រធ្វើជាកម្មសិទ្ធផ្ទាល់ខ្លួន ។ បើតាមប្រភពដែលនិយាយក្នុងលក្ខខណ្ឌសុំមិនបញ្ចេញឈ្មោះបានឱ្យដឹងថា សំណង់របងហ៊ុមព័ទ្ធយកដីឆ្នេរនោះ ជារបស់មន្ត្រីធំម្នាក់គ្រប់គ្រងនៅឃ្លាំងស្តុកប្រេងរបស់ក្រុមហ៊ុនមួយ ដោយឡែកសំណង់លំនៅដ្ឋាននៅលើដីឆ្នេរសមុទ្រមួយកន្លែងផ្សេងទៀតនោះ មានម្ចាស់ឈ្មោះឡេង ម៊ូសុង មានតួនាទីជាអនុប្រធានក្រុមសន្តិសុខនៃក្រុមហ៊ុនប្រេងជាមួយគ្នានោះ ។
លោកហាក់ វីយា ទទួលបន្ទុកការងារសំណង់នៅការិយាល័យរៀបចំដែនដីនគររូបនីយកម្ម និងសំណង់ ស្រុកស្ទឹងហាវ បានបញ្ជាក់ឱ្យដឹងតាមទូរស័ព្ទនៅរសៀលថ្ងៃទី២៨ សីហា ២០១៤ ថា សំណង់ទាំង២កន្លែងខាងលើ ពុំមានច្បាប់អនុញ្ញាតឡើយ ដោយហេតុថា គេអាងខ្លួនគេជាមន្ត្រីធំៗ ហើយលោកក៍ទើបទទួលបានព័ត៌មានផ្ដល់ឱ្យពីអ្នកសារព័ត៌មាន ។ លោកថា សំណុំរឿងនេះ លោកនឹងធ្វើរបាយការណ៍ជូនទៅមន្ទីររៀបចំដែនដីនគររូបនីយកម្ម និងសំណង់ ខេត្តព្រះសីហនុ ដើម្បីមានវិធានការបន្តទៀត ។ ចំណែកលោកឆាយ សុគន្ធដា អភិបាលរងស្រុកស្ទឹងហាវ បានឱ្យដឹងនារសៀលថ្ងៃទី២៨ សីហា ២០១៤ ថា លោកបានធ្វើការហាមឃាត់ម្ដងរួចមកហើយ ម្ចាស់សំណង់បានផ្អាកការសាងសង់ ប៉ុន្តែស្រាប់តែពេលនេះ លេចឮរឿងនេះឡើងវិញ លោកនឹងចាត់ឱ្យមន្ត្រីជំនាញចុះទៅត្រួតពិនិត្យ ឫក៏ផ្អាកសកម្មភាព ក្នុងករណីមិនអនុវត្តតាមការណែនាំរបស់អាជ្ញាធរយើង នឹងចាត់ការបន្តទៅតាមនីតិវិធីច្បាប់ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ